ក្តីប្រាថ្នាធំសម្រាប់មិត្តភក្តិ
ដោយSheridan Voysey
December 22, 2024
ហេព្រើរ ១០:១៩-២៥
ត្រូវឲ្យយើងពិចារណាមើលគ្នាទៅវិញទៅមកដែរ ដើម្បីនឹងបណ្តាលឲ្យមានសេចក្តីស្រឡាញ់ ហើយឲ្យប្រព្រឹត្តការល្អផង។ ហេព្រើរ ១០:២៤
លោកគ្រូក្រេកូរី(Gregory) មកពីទីក្រុងណាហ្សៀនហ្ស៊ូស និងលោកគ្រូបាសហ្ស៊ីល(Basil) មកពីក្រុងស៊ីសារា គឺជាអ្នកដឹកនាំដែលមានកេរ្តិ៍ឈ្មោះល្អ ក្នុងពួកជំនុំនៅសតវត្សរ៍ទី៤ និងជាមិត្តជិតស្និទ្ធផងដែរ។ អ្នកទាំងពីរបានជួបគ្នា កាលពួកគេកំពុងរៀនមុខវិជ្ជាទស្សនវិជ្ជា ហើយក្រោយមក លោកគ្រូក្រេកូរីក៏បានមានប្រសាសន៍ថា គាត់និងលោកបាហ្ស៊ីល បានប្រែក្លាយជា “រូបកាយពីរ ដែលមានវិញ្ញាណតែមួយ”។
ផ្លូវនៃអាជីពរបស់ពួកគេ មានភាពស្រដៀងគ្នាយ៉ាងខ្លាំង បានជាការប្រជែងគ្នាមិនអាចកើតមាន រវាងអ្នកទាំងពីរបានទេ។ លោកគ្រូក្រេកូរីក៏បានពន្យល់ថា ពួកគាត់បានជៀសវាងការល្បួងដែលនាំឲ្យប្រជែងគ្នា ដោយមាន “ក្តីប្រាថ្នាធំតែមួយ” ដែលចង់បានជីវិតដែលមានជំនឿ ក្តីសង្ឃឹម និងការប្រព្រឹត្តល្អ បន្ទាប់មក “លើកទឹកចិត្តគ្នាទៅវិញទៅមក” ឲ្យកាន់តែមានជោគជ័យ ក្នុងគោលដៅនេះ ជាជាងជោគជ័យតែម្នាក់ឯង។ ជាលទ្ធផល អ្នកទាំងពីរបានចម្រើនឡើងក្នុងជំនឿ ហើយក៏បានក្លាយជាអ្នកដឹកនាំកំរិតខ្ពស់ ដោយគ្មានការប្រជែងគ្នាឡើយ។
កណ្ឌគម្ពីរហេព្រើរ ត្រូវបាននិពន្ធឡើង ដើម្បីជួយយើង ឲ្យរឹងមាំក្នុងជំនឿ(ហេព្រើរ ២:១) ដោយលើកទឹកចិត្តយើងឲ្យផ្តោតចិត្តទៅលើ “ក្តីសង្ឃឹម ដែលយើងបានចែកចាយ” ហើយ “លើកទឹកចិត្តគ្នាទៅវិញទៅមក ឲ្យមានសេចក្តីស្រឡាញ់ និងការប្រព្រឹត្តល្អ”(១០:២៣-២៤)។ កណ្ឌគម្ពីរហេព្រើរបានបង្គាប់យើងឲ្យអនុវត្តន៍ដូចនេះ មិនគ្រាន់តែនៅក្នុងបរិបទនៃពួកជំនុំប៉ុណ្ណោះទេ(ខ.២៥) ប៉ុន្តែ លោកគ្រូក្រេកូរី និងលោកគ្រូបាហ្ស៊ីលក៏បានអនុវត្តន៍ក្នុងមិត្តភាពផងដែរ ដោយបង្ហាញឲ្យយើងដឹងអំពីរបៀបដែលមិត្តភក្តិអាចលើកទឹកចិត្តគ្នាទៅវិញទៅមក ឲ្យលូតលាស់ និងជៀសវាង “ឫសនៃចិត្តជូរល្វីង” ដែលមានដូចជាការប្រជែងគ្នា ដែលអាចកើតមាន(១២:១៥)។
ចុះបើសិនជាក្នុងមិត្តភាពរបស់យើង យើងមានក្តីប្រាថ្នាធំមួយ ដែលចង់បានការរស់នៅដោយជំនឿ ក្តីសង្ឃឹម និងការប្រព្រឹត្តល្អ ហើយលើកទឹកចិត្តមិត្តភក្តិយើងឲ្យកាន់តែមានភាពជោគជ័យ ក្នុងគោលដៅនេះ ជាជាងខំប្រឹងជោគជ័យតែម្នាក់ឯង? ព្រះវិញ្ញាណបរិសុទ្ធបានត្រៀមជាស្រេចដើម្បីជួយយើង ឲ្យអនុវត្តន៍ដូចនេះ។—Sheridan Voysey
តើអ្នកបានមើលឃើញគុណសម្បត្តិអ្វីខ្លះ នៅក្នុងមិត្តភាពរបស់លោកគ្រូក្រេកូរី និងលោកគ្រូបាហ្ស៊ីល?
តើអ្នកអាចលើកទឹកចិត្តមិត្តភក្តិរបស់អ្នកឲ្យចម្រើនឡើង ក្នុងជំនឿ សេចក្តីសង្ឃឹម និងការប្រព្រឹត្តល្អ ដោយរបៀបណា?
ឱព្រះយេស៊ូវ សូមព្រះអង្គជួយឲ្យមិត្តភាពរបស់ទូលបង្គំ មានការចម្រើនឡើង ក្នុងជំនឿ ក្តីសង្ឃឹម និងការប្រព្រឹត្តល្អ។
គម្រោងអានព្រះគម្ពីររយៈពេល១ឆ្នាំ: ណាហ៊ុម ១-៣ និង វិវរណៈ ១៤