ព្រឹក
ព្រះបន្ទូលសន្យាថា នឹងស្អាងយើងឡើងវិញ
ដោយWinn Collier
January 2, 2025
អេសាយ ៥១:១-៦
ផ្ទៃមេឃនឹងសូន្យបាត់ទៅ ដូចជាផ្សែង ... តែសេចក្តីសង្គ្រោះរបស់អញនឹងនៅជាដរាប។ អេសាយ ៥១:៦
កាលខ្យល់ព្យុះកំបុតត្បូងឡរ៉ា បានបក់បោកយ៉ាងខ្លាំង កាត់តាមតំបន់ឈូងសមុទ្រមិចស៊ីកូ ឆ្ពោះទៅរកតំបន់ឆ្នេរសមុទ្ររបស់សហរដ្ឋអាមេរិកនៅរដ្ឋលូវីស៊ីអាណា គេបានធ្វើការប្រកាសអាសន្នជាបន្ទាន់។ មន្ត្រីប៉ូលិសម្នាក់បានកត់សំគាល់ឃើញថា មានខ្យល់បក់បោកក្នុងល្បឿន១៥០គីឡូម៉ែត្រក្នុង១ម៉ោង ហើយក៏បានផ្តល់ពត៌មានដល់ប្រជាពលរដ្ឋភ្លាមៗថា “សូមធ្វើការជម្លៀសជាបន្ទាន់។ បើអ្នកសម្រេចចិត្តបន្តស្នាក់នៅក្នុងផ្ទះ យើងខ្ញុំមិនអាចចេញទៅរកអ្នកបានទេ ដូចនេះ សូមយកក្រដាសមួយសន្លឹកមកសរសេរឈ្មោះ អាស័យដ្ឋាន អត្ថលេខសន្តិសុខសង្គមរបស់អ្នក និងឈ្មោះសាច់ញាតិសម្រាប់ទំនាក់ទំនង ពេលមានការបន្ទាន់ ហើយដាក់ក្រដាសនោះចូលទៅក្នុងថង់មានរូត ហើយដាក់ចូលក្នុងហោប៉ៅរបស់អ្នក។ ហើយចូរអធិស្ឋានសូមឲ្យអ្នករួចផុតពីគ្រោះថ្នាក់នេះ”។ ភ្នាក់ងារជួយសង្គ្រោះបានដឹងថា ពេលណាខ្យល់ព្យុះឡរ៉ា វាយប្រហារតំបន់ឆ្នេរ ពួកគេមិនអាចធ្វើអ្វីបានទេ ក្រៅពីមើលខ្យល់ព្យុះនោះបំផ្លិចបំផ្លាញអ្វីៗទាំងអស់នៅពីមុខវា។
ពេលណារាស្រ្តរបស់ព្រះ នៅគ្រាសញ្ញាចាស់ជួបគ្រោះធម្មជាតិ ឬមហន្តរាយខាងវិញ្ញាណ ព្រះបន្ទូលព្រះអង្គមានការធានាច្បាស់លាស់ ហើយនាំមកនូវក្តីសង្ឃឹម ដោយសន្យាថា ព្រះអង្គនឹងគង់នៅជាមួយ ទោះពួកគេជួបការបំផ្លិចបំផ្លាញយ៉ាងណាក៏ដោយ។ ព្រះអង្គមានបន្ទូលថា “ទ្រង់បានដោះទុក្ខអស់ទាំងកន្លែងខូចបង់របស់គេ ក៏បានធ្វើឲ្យទីស្ងាត់ឈឹង បានដូចជាច្បារអេដែន ហើយឲ្យវាលប្រៃនោះត្រឡប់ដូចជាសួនរបស់ព្រះយេហូវ៉ាដែរ”(អេសាយ ៥១:៣)។ ហើយជាងនេះទៅទៀត ព្រះអង្គតែងតែធានារាស្រ្តព្រះអង្គថា ព្រះអង្គនឹងប្រទានការសង្គ្រោះ និងការប្រោសឲ្យជា បើសិនជាពួកគេទុកចិត្តព្រះអង្គ។ ព្រះអង្គមានបន្ទូលទៀតថា “ដ្បិតផ្ទៃមេឃនឹងសូន្យបាត់ទៅ ដូចជាផ្សែងហើយផែនដីនឹងចាស់ទៅដូចជាសំលៀកបំពាក់ ឯពួកអ្នកដែលនៅស្ថាននេះ នឹងស្លាប់ទៅបែបដូច្នោះដែរ តែសេចក្តីសង្គ្រោះរបស់អញនឹងនៅជាដរាប”(ខ.៦)។ ទោះពួកគេបានទទួលរងការខូចខាតយ៉ាងណាក៏ដោយ ក៏សេចក្តីល្អរបស់ព្រះអង្គចំពោះពួកគេ នៅស្ថិតស្ថេរនៅជាដរាប។
ព្រះអម្ចាស់មិនបានសន្យាថា ជីវិតរបស់យើងនៅលើផែនដីនឹងមិនមានទុក្ខលំបាកសោះនោះឡើយ តែព្រះអង្គបានសន្យាថា ការប្រោសឲ្យជារបស់ព្រះអង្គ នឹងនាំមកនូវការស្អាងឡើងវិញ ទោះយើងមានភាពប្រេះបែកយ៉ាងណាក៏ដោយ។—Winn Collier
តើអ្នកកំពុងប្រឈមមុខដាក់គ្រោះមហន្តរាយ និងភាពប្រេះបែកនៅកន្លែងណា?
ព្រះយេស៊ូវបានសន្យាថា នឹងគង់នៅជាមួយអ្នក ប្រោសអ្នកឲ្យជា ហើយស្អាងអ្នកឡើងវិញ។ តើអ្នកបានឮព្រះបន្ទូលសន្យានេះដោយរបៀបណា?
ឱព្រះអម្ចាស់ ភាពប្រេះបែកបាននាំឲ្យទូលបង្គំមានការសោកសៅយ៉ាងខ្លាំង។
តែសូមព្រះអង្គជួយទូលបង្គំឲ្យទុកចិត្តថា ព្រះអង្គមានព្រះបន្ទូលសន្យាថា នឹងស្អាងទូលបង្គំឡើងវិញ។
គម្រោងអានព្រះគម្ពីររយៈពេល១ឆ្នាំ: លោកុប្បត្តិ ៤-៦ និង ម៉ាថាយ ២
ប្រភេទ
ល្ងាច
មើលន៏ ព្រះនៃអ្នករាល់គ្នា!
ដោយAlistair Begg
January 2, 2025
«ឱអ្នកដែលនាំដំណឹងល្អ មកដល់ក្រុងស៊ីយ៉ូនអើយ ចូរឡើងទៅប្រកាសប្រាប់ពីលើភ្នំខ្ពស់ចុះ ឱអ្នកដែលនាំដំណឹងល្អមកដល់ក្រុងយេរូសាឡឹមអើយ ចូរបន្លឺសម្លេងឡើងជាខ្លាំង ចូរបន្លឺឡើង កុំខ្លាចឡើយ ចូរប្រាប់ដល់ទីក្រុងនៃស្រុកយូដាទាំងប៉ុន្មានថា មើលន៏ ព្រះនៃអ្នករាល់គ្នា» (អេសាយ ៤០:៩)។
ហោរា អេសាយ បានរស់នៅក្នុងសម័យដែលរាស្ត្ររបស់ព្រះត្រូវសាសន៍ដទៃចាប់ជាឈ្លើយសឹក ហើយនិរទេសឲ្យទៅរស់នៅក្នុងទឹកដីបរទេស។ ពួកគេបានជួបទុក្ខវេទនាជាច្រើន និងបានជាមិនអាចសូម្បីតែច្រៀងសរសើរតម្កើងព្រះអម្ចាស់ (ទំនុកតម្កើង ១៣៧:១-៤)។ ប៉ុន្តែ ខណៈពេលដែលពួកគេកំពុងរស់នៅក្នុងការនិរទេសនោះ ព្រះទ្រង់ក៏បានយាងមករករាស្ត្រព្រះអង្គ ដោយព្រះបន្ទូលកម្សាន្តចិត្ត (អេសាយ ៤០:១) គឺការកម្សាន្តចិត្ត ដែលមាននៅក្នុងការសម្រេចព្រះបន្ទូលសន្យារបស់ព្រះអង្គប៉ុណ្ណោះ។ គឺព្រះបន្ទូលសន្យាថា សិរីល្អរបស់ព្រះអម្ចាស់នឹងបង្ហាញចេញមក មិនមែនសម្រាប់តែពួកអ៊ីស្រាអែល តែសម្រាប់ជាតិសាសន៍ទាំងអស់។
ដំណឹងដ៏ល្អនេះ មិនមែនសម្រាប់ឲ្យពួកគេស្តាប់ ហើយនៅស្ងៀមស្ងាត់មិននិយាយអ្វីសោះនោះទេ។ ព្រះទ្រង់សព្វព្រះទ័យឲ្យពួកគេបន្លឺសម្លេងស្រែកហ៊ោនៃជ័យជម្នះ ដោយបញ្ចេញពន្លឺនៃសេចក្តីសង្ឃឹមដល់គ្នាទៅវិញទៅមក។ កាលពីមុន មានការពិពណ៌នាថា ពួកគេជា «បណ្តាជនដែលដើរក្នុងសេចក្តីងងឹត» តែឥឡូវពួកគេ «បានឃើញពន្លឺយ៉ាងធំ» (អេសាយ ៩:២)។
ភាពខុសគ្នារវាងភាពងងឹត នៃលោកីយ៍ដែលធ្លាក់ចូលអំពើបាប និងពន្លឺនៃស្ថានសួគ៌ គឺជាទិដ្ឋភាពដែលកណ្ឌគម្ពីរអេសាយក៏ដូចជាព្រះគម្ពីរប៊ីបទាំងមូលបានឆ្លុះបញ្ចាំង។ សេចក្តីងងឹតកើតចេញពីការព្រងើយកន្តើយចំពោះព្រះ បះបោរនឹងព្រះអង្គ ហើយមិនព្រមធ្វើតាមព្រះបន្ទូលព្រះអង្គ។ មានព្រះរាជសារមួយបញ្ចេញពន្លឺ ចូលទៅក្នុងភាពងងឹតខ្លាំងយ៉ាងនេះ ធ្វើឲ្យចិត្តគំនិតរបស់ពួកគេមានភាពស្រស់ថ្លាឡើង គឺព្រះរាជសារដែលបានប្រកាសថា «មើលន៍ ព្រះនៃអ្នករាល់គ្នា»។
ព្រះរាជសារនេះនៅតែមានសារៈសំខាន់ចំពោះរាស្ត្រព្រះអង្គ ក្នុងសម័យបច្ចុប្បន្ន ដូចនៅសម័យហោរា អេសាយ ផងដែរ។ ជាញឹកញាប់ ភាពងងឹតហាក់ដូចជាធ្ងន់ខ្លាំង ហើយជួនកាល ពន្លឺហាក់ដូចជាស្រអាប់ណាស់ដែរ។ តែជាញឹកញាប់ ព្រះរាជសារនៃសេចក្តីសង្ឃឹមក៏បានចាប់ផ្ដើមមាន ក្នុងអំឡុងពេលមិនច្បាស់លាស់នោះ។ គឺដូចដែលព្រះអង្គបានសន្យាថា «នោះសិរីល្អនៃព្រះយេហូវ៉ានឹងសម្តែងមក គ្រប់មនុស្សទាំងឡាយនឹងបានឃើញព្រមគ្នា ដ្បិតព្រះឱស្ឋនៃព្រះយេហូវ៉ាបានមានព្រះបន្ទូលហើយ» (អេសាយ ៤០:៥)។ ទីបំផុត ព្រះអង្គសម្រេចព្រះបន្ទូលសន្យាព្រះអង្គ ដោយយាងមកយកកំណើតជាមនុស្ស ហើយបានគង់នៅជាមួយយើង។
កាលសាវ័ក យ៉ូហាន និពន្ធកណ្ឌគម្ពីរដំណឹងល្អយ៉ូហាន គាត់ក៏បានក្រឡេកមកលើទិដ្ឋភាពដដែលនេះ ដែលហោរា អេសាយ ធ្លាប់បានទន្ទឹងរង់ចាំ គឺដូចដែលកណ្ឌគម្ពីរយ៉ូហានបានចែងថា «ព្រះបន្ទូលក៏ត្រឡប់ជាសាច់ឈាម ហើយបានស្នាក់នៅជាមួយនឹងយើងរាល់គ្នា យើងរាល់គ្នាបានឃើញសិរីល្អទ្រង់ គឺជាសិរីល្អនៃព្រះរាជបុត្រាតែ១ ដែលមកពីព្រះវរបិតា មានពេញជាព្រះគុណ និងសេចក្តីពិត» (យ៉ូហាន ១:១៤)។ ព្រះអង្គជាពន្លឺនៃលោកីយ៍ ហើយ «ពន្លឺនោះក៏ភ្លឺមកក្នុងសេចក្តីងងឹត តែសេចក្តីងងឹតយល់មិនដល់ពន្លឺទេ» (ខ.៥)។ ហោរា អេសាយ កំពុងពិពណ៌នាអំពីព្រះអង្គ ដែលត្រូវយាងមក តែយើងអាចពិចារណាអំពីព្រះរាជកិច្ចដែលព្រះអង្គបានសម្រេច ពេលដែលសិរីល្អដែលបានសន្យានោះ បានបង្ហាញចេញមកហើយ គឺដូចដែលកណ្ឌគម្ពីរយ៉ូហានបានចែងមកស្រាប់។
ព្រះទ្រង់បានយាងមករកយើង ដោយបញ្ចេញពន្លឺចូលក្នុងភាពងងឹត ហើយប្រទានសេចក្តីសង្គ្រោះ។ អ្នកអាចមើលទៅព្រះនៃយើង ដែលបានផ្ទំក្នុងស្នូកសត្វ សុគតនៅលើឈើឆ្កាង យាងចេញពីផ្នូរ ហើយសព្វថ្ងៃ ព្រះអង្គកំពុងគ្រងរាជ្យនៅស្ថានដ៏ខ្ពស់។ យើងងាយនឹងមើលឃើញសេចក្តីងងឹត តែយើងត្រូវតែមើលទៅពន្លឺ ដ្បិតក្នុងពន្លឺនោះ យើងរកឃើញក្តីសង្ឃឹម ដែលបណ្ដេញការភ័យខ្លាច និងដំណឹងល្អ ដែលស័ក្តិសមនឹងឲ្យយើងប្រកាស។ នៅថ្ងៃនេះ «មើលន៏ ព្រះនៃអ្នករាល់គ្នា!»
ព្រះគម្ពីរសញ្ជឹងគិត៖ អេសាយ ៤០:១-៣១
គម្រោងអានព្រះគម្ពីររយៈពេល១ឆ្នាំ៖ លោកុប្បត្ដិ ៧-៩ និង រ៉ូម ៣:១១