កិច្ចការ ២០:១៧-២៤
ដ្បិតខ្ញុំគ្មានសេចក្តីខ្មាស ចំពោះដំណឹងល្អនៃព្រះគ្រីស្ទទេ ពីព្រោះជាព្រះចេស្តានៃព្រះ សំរាប់នឹងជួយសង្គ្រោះដល់អស់អ្នកណាដែលជឿ គឺដល់ទាំងសាសន៍យូដាជាដើម និងសាសន៍ក្រេកផង។ រ៉ូម ១:១៦
“តើអ្នកដឹងទេថា ព្រះយេស៊ូវស្រឡាញ់អ្នក។ ព្រះអង្គពិតជាស្រឡាញ់អ្នកណាស់”។ នេះជាពាក្យសម្តីចុងក្រោយ របស់លោកចន ដានីយ៉ែល(John Daniels)។ បន្ទាប់ពីគាត់បានឲ្យលុយខ្លះ ដល់បុរសម្នាក់ជាជនអនាថាម្នាក់ គាត់ក៏បាននិយាយលាគ្នា ដោយពាក្យពេចន៍នេះ ហើយប៉ុន្មានវិនាទីក្រោយមក មានឡានមួយបានបុកគាត់ បណ្តាលឲ្យគាត់បាត់បង់ជីវិតភ្លាមៗ។ នៅក្នុងក្រដាសកម្មវិធីបុណ្យសពរបស់លោកចន មានអត្ថបទខ្លីមួយដែលមានខ្លឹមសារយ៉ាងដូចនេះថា “លោកចន ចង់ស្វែងរកវិធីឈោងចាប់មនុស្សឲ្យកាន់តែច្រើន ដូចនេះ នៅពេលរសៀលថ្ងៃអាទិត្យ គាត់បានព្យាយាមជួយយកអសារបុរសម្នាក់។ ព្រះអម្ចាស់ក៏បានប្រទានមធ្យោបាយមួយ ដើម្បីឲ្យគាត់ឈោងចាប់ពិភពលោក។ នៅថ្ងៃនោះ ប៉ុស្តិ៍ទូរទស្សន៍ជាច្រើនបានចាក់ផ្សាយដំណឹងអំពីអំពើសប្បុរសធម៌ និងរបៀបដែលគាត់ចែកចាយអំពីសេចក្តីស្រឡាញ់របស់ព្រះយេស៊ូវដល់ជនអនាថា។ ដំណឹងនេះក៏បានឮទៅដល់ញាតិមិត្ត ក្រុមគ្រួសារ និងមនុស្សជាច្រើនទៀត នៅទូទាំងប្រទេស”។
ទោះលោកចន ដានីយ៉ែល មិនមែនជាគ្រូអធិប្បាយក៏ដោយ គាត់ទទួលបានការបណ្តាលចិត្តឲ្យនិយាយប្រាប់អ្នកដទៃ អំពីព្រះយេស៊ូវ។ សាវ័កប៉ុលក៏បានទទួលការបណ្តាលចិត្តផងដែរ។ ក្នុងបទគម្ពីរកិច្ចការ ជំពូក២០ គាត់បានបង្ហាញអំពីភាពឆេះឆួលរបស់គាត់ នៅក្នុងការផ្សាយដំណឹងល្អ ដោយនិយាយពាក្យផ្តាំផ្ញើដល់អ្នកដឹកនាំពួកជំនុំនៅទីក្រុងអេភេសូរថា “ខ្ញុំក៏មិនរាប់ជីវិតនេះ ទុកជារបស់វិសេសដល់ខ្ញុំដែរ ឲ្យតែខ្ញុំបានបង្ហើយការរត់ប្រណាំងរបស់ខ្ញុំ ដោយអំណរចុះ ព្រមទាំងការងារ ដែលខ្ញុំបានទទួលអំពីព្រះអម្ចាស់យេស៊ូវ គឺឲ្យខ្ញុំបានធ្វើបន្ទាល់សព្វគ្រប់ ពីដំណឹងល្អនៃព្រះគុណព្រះវិញ”(ខ.២៤)។
ដំណឹងល្អអំពីការអត់ទោសបាប និងជីវិតថ្មី ក្នុងព្រះយេស៊ូវ គឺពិតជាសំខាន់ក្រែលែង បានជាយើងគ្មានហេតុផលអ្វី ដែលមិនត្រូវចែកចាយដល់អ្នកដទៃនោះឡើយ។ អ្នកជឿខ្លះមានជំនាញពន្យល់ដំណឹងល្អ ជាងអ្នកដទៃ។ ប៉ុន្តែ ដោយជំនួយមកពីព្រះវិញ្ញាណបរិសុទ្ធ អ្នកអាចដកពិសោធន៍នឹងអំណាចរបស់ដំណឹងល្អ ដែលកែប្រែជីវិត ហើយអាចចែកចាយរឿងនៃសេចក្តីស្រឡាញ់របស់ព្រះដល់អ្នកដទៃ នៅពេលណាមានឱកាស។—Arthur Jackson
តើមាននរណាខ្លះ ដែលត្រូវការឮអំពីសេចក្តីស្រឡាញ់ និងការអត់ទោសរបស់ព្រះ នៅក្នុង និងតាមរយៈព្រះគ្រីស្ទ?
តើមានអ្វីរារាំងអ្នកមិនឲ្យចែកចាយដល់ពួកគេ អំពីកិច្ចការដែលព្រះអង្គបានធ្វើក្នុងជីវិតអ្នក?
ឱព្រះវរបិតា សូមព្រះអង្គអត់ទោសឲ្យទូលបង្គំ ដែលស្ទាក់ស្ទើរមិនបានប្រាប់អ្នកដទៃ អំពីជីវិតថ្មី ដែលកើតឡើង
តាមរយៈព្រះយេស៊ូវ ហើយសូមព្រះអង្គជួយទូលបង្គំឲ្យប្រកាសអំពីសេចក្តីស្រឡាញ់របស់ព្រះអង្គ ដោយចិត្តក្លាហាន។
គម្រោងអានព្រះគម្ពីររយៈពេល១ឆ្នាំ: និក្ខមនំ ២៥-២៦ និង ម៉ាថាយ ២០:១៧-៣៤
