ព្រឹក
សំលៀកបំពាក់ខាងវិញ្ញាណ
ដោយPatricia Raybon
March 19, 2025
អេសាយ ៦១:១-៣,១០-១១
ទ្រង់បានចាត់ខ្ញុំឲ្យមក ... នឹងចែកឲ្យដល់ពួកអ្នកដែលសោយសោក ... ព្រមទាំងអាវពាក់នៃសេចក្តីសរសើរ ជំនួសទុក្ខធ្ងន់ដែលគ្របសង្កត់។ អេសាយ ៦១:១-៣
ក្មេងពីរនាក់អាយុ៨ឆ្នាំ នៅរដ្ឋមេន ជារដ្ឋដាច់ស្រយាលរបស់សហរដ្ឋអាមេរិក មានភាពល្បីល្បាញ ដោយសារពួកគេស្លៀកពាក់ឈុតខោអាវគ្រ័រសេ មកសាលារៀនរៀងរាល់ថ្ងៃពុធ។ មិនយូរប៉ុន្មាន មិត្តរួមថ្នាក់ដទៃទៀត និងបុគ្គលិករបស់សាលារៀនក៏បាននាំគ្នាស្លៀកពាក់ខោអាវគ្រ័រសេ ឬខោអាវដែលសមសួន រៀងរាល់ថ្ងៃពុធ ដូចពួកគេផងដែរ។ គេក៏បានហៅប្រពៃណីនេះថា “ថ្ងៃពុធសមសួន” ជាថ្ងៃដែលពួកគេចូលចិត្តជាងគេ ក្នុងសប្តាហ៍នីមួយៗ។ ចេមសន៍(James) ជាក្មេងដែលផ្តួចផ្តើមគំនិតនេះ សប្បាយចិត្តនៅពេលដែលបានឮគេសរសើរទម្លាប់ដ៏ល្អនេះ។ គាត់ថា ពាក្យសរសើរនេះបានធ្វើឲ្យចិត្តគាត់មានអារម្មណ៍ល្អខ្លាំងណាស់។ ក្មេងៗដែលស្លៀកពាក់ នៅថ្ងៃពុធយ៉ាងដូចនេះ មានភាពលេចធ្លោ ក្លាយជាក្មេងដែលមានមោទនភាព ប្រចាំសាលា។
សំលៀកបំពាក់ខាងវិញ្ញាណរបស់យើង ដែលបានញែកយើងចេញ ជាកូនរបស់ព្រះ ក៏បានធ្វើឲ្យចិត្តយើងមានអំណរផងដែរ។ គឺដូចដែលហោរាអេសាយបានមានប្រសាសន៍ថា “ខ្ញុំនឹងអរសប្បាយចំពោះព្រះយេហូវ៉ា ព្រលឹងខ្ញុំនឹងរីករាយចំពោះព្រះនៃខ្ញុំ ពីព្រោះទ្រង់បានប្រដាប់ខ្លួនខ្ញុំដោយសំលៀកបំពាក់នៃសេចក្តីសង្គ្រោះ ទ្រង់បានគ្រលុំខ្ញុំដោយអាវជាសេចក្តីសុចរិត ដូចជាប្តីថ្មោងថ្មីតែងខ្លួនដោយគ្រឿងលំអ ហើយដូចជាប្រពន្ធថ្មោងថ្មី ក៏ប្រដាប់ដោយត្បូងរបស់ខ្លួនដែរ”(អេសាយ ៦១:១០)។
កាលពួកអ៊ីស្រាអែលត្រូវគេនិរទេស ឲ្យទៅរស់នៅក្នុងទឹកដីសាសន៍ដទៃ សំលៀកបំពាក់របស់ពួកគេ ទាំងខាងវិញ្ញាណ និងសាច់ឈាម បានប្រែជាចាស់ និងសឹកដាច់។ ហោរាអេសាយក៏បានលើកទឹកចិត្តពួកគេឲ្យមានសង្ឃឹមឡើង ដោយព្រះបន្ទូលដែលបានសន្យាថា ព្រះវិញ្ញាណនៃព្រះ “នឹងចែកឲ្យដល់ពួកអ្នកដែលសោយសោក នៅក្រុងស៊ីយ៉ូនបានភួងលំអជំនួសផេះ ហើយប្រេងនៃសេចក្តីអំណរជំនួសសេចក្តីសោកសៅ ព្រមទាំងអាវពាក់នៃសេចក្តីសរសើរ ជំនួសទុក្ខធ្ងន់ដែលគ្របសង្កត់”(ខ.៣)។
ព្រះទ្រង់នៅតែមានបន្ទូលសន្យាដូចនេះ ដល់រាស្រ្តរបស់ព្រះអង្គ ក្នុងពេលសព្វថ្ងៃផងដែរ។ ព្រះយេស៊ូវមានបន្ទូលថា ដោយអំណាចនៃព្រះវិញ្ញាណបរិសុទ្ធ ព្រះអង្គនឹងដណ្តប់យើង ដោយព្រះចេស្តាពីស្ថានខ្ពស់(លូកា ២៤:៤៩)។ ព្រះគ្រីស្ទបានប្រទាន ឲ្យយើងមានទូរខោអាវខាងវិញ្ញាណ ដែលមានពេញដោយសំលៀកបំពាក់នៃ “ចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់”(កូល៉ុស ៣:១២)។ ពេលណាយើងដណ្តប់វិញ្ញាណយើង ដោយសំលៀកបំពាក់ទាំងអស់នេះ លោកិយនឹងបានស្គាល់សេចក្តីស្រឡាញ់របស់ព្រះអង្គ តាមរយៈការរស់នៅរបស់យើង។—Patricia Raybon
តើព្រះវិញ្ញាណរបស់ព្រះ បានជួយអ្នកឲ្យ “ដណ្តប់វិញ្ញាណ” ដោយចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់យ៉ាងដូចម្តេចខ្លះ?
តើអាកប្បកិរិយារបស់អ្នកដែលព្រះវិញ្ញាណដឹកនាំ មានឥទ្ធិពលយ៉ាងណាខ្លះ មកលើអ្នកដទៃ?
ឱព្រះអម្ចាស់ ពេលណាទូលបង្គំដណ្តប់ខ្លួនដោយគោលតម្លៃរបស់លោកិយ សូមព្រះអង្គកែប្រែទូលបង្គំឲ្យបានស្លៀកពាក់ខោអាវខាងវិញ្ញាណវិញ។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១-៣ និង ម៉ាកុស ១៦
ប្រភេទ
ល្ងាច
សំឡេងរបស់ពួកហោរាពិតប្រាកដ (សៀវភៅសេចក្ដីពិតសម្រាប់ជីវិត)
ដោយAlistair Begg
March 19, 2025
«គេបានមើលរបួសនៃកូនស្រីរបស់រាស្ត្រអញ ឲ្យសះតែបន្តិចបន្តួចទេ ដោយពោលតែពាក្យថា សុខៗប៉ុណ្ណោះក្នុងកាលដែលឥតមានសេចក្តីសុខឡើយ» (យេរេមា ៨:១១)។
ពេលណាយើងមានបញ្ហាសុខភាពធ្ងន់ធ្ងរ គ្មាននរណាចង់ទៅទទួលការព្យាបាលពីពេទ្យដែលអសមត្ថភាពនោះទេ។ សូមយើងស្រមៃថា អ្នកកំពុងរកគ្រូពេទ្យម្នាក់ដែលដើម្បីព្យាបាលដំបៅរលួយនៅលើជើងរបស់អ្នក តែគាត់គ្រាន់តែយកបង់មករុំពីលើដំបៅនោះប៉ុណ្ណោះ ហើយសរសើរអ្នកដែលបានអត់ទ្រាំនឹងការឈឺចាប់នោះ រួចជូនពរអ្នកឲ្យមានចិត្តរីករាយ។ ការនេះបានធ្វើឲ្យអ្នកមានអារម្មណ៍ល្អជាងមុន ប៉ុន្តែ មិនបានធ្វើឲ្យដំបៅរបស់អ្នកជាទេ ហើយមិនយូរប៉ុន្មានអ្នកនឹងមានអារម្មណ៍ថា ពិបាកលើសដើម។
ក្នុងគ្រាសញ្ញាចាស់ តួនាទីរបស់ពួកហោរាគឺត្រូវថ្លែងព្រះបន្ទូលរបស់ព្រះ ហើយអំពាវនាវរាស្ត្ររបស់ព្រះអង្គឲ្យស្តាប់បង្គាប់តាមសេចក្តីសញ្ញារបស់ព្រះអង្គ។ ព្រះអម្ចាស់ដាក់ព្រះបន្ទូលព្រះអង្គក្នុងមាត់របស់ពួកហោរា ហើយពួកគេនឹងប្រកាសព្រះបន្ទូលព្រះអង្គ គឺមិនមែននិយាយតាមគំនិតខ្លួនឯងនោះទេ។ ហើយជាញឹកញាប់ ព្រះរាជសារដែលពួកហោរាប្រកាស គឺជាការដាស់តឿន ឬព្រមានថា «ចូរប្រយ័ត្នខ្លួន!» សេចក្តីជំនុំជម្រះជិតមកដល់ហើយ។ គឺមិនមែនជាការប្រកាសដែលគេចង់ឮនោះទេ។
ដោយសារព្រះបន្ទូលព្រះអង្គពិតជាពិបាកឲ្យគេទទួល បានជាពួកហោរាក្លែងក្លាយបានកើតមានជាច្រើនសន្ធឹក ហើយពួកគេពូកែខាងចាក់ខ្សែ។ ពួកគេតាំងខ្លួនជាហោរា ហើយអាចចេញទៅប្រកាសព្រះបន្ទូល តែពួកគេក៏អាចប្រកាសប្រាប់ពួកបណ្តាជន តែអំពីការអ្វីដែលពួកគេចង់ឮប៉ុណ្ណោះ។ ហោរាក្លែងក្លាយប្រៀបដូចជាគ្រូពេទ្យដែលអាក្រក់ ដែលប្រាប់ពួកបណ្តាជនថា អ្វីៗនឹងមានភាពល្អប្រសើរឡើង ដែលតាមពិតរឿងកាន់តែអាក្រក់ឡើង។ យើងមានអារម្មណ៍ល្អអស្ចារ្យណាស់ ពេលយើងឮគេប្រាប់ថា អ្វីៗនឹងមានភាពល្អប្រសើរ ហើយទឹកដីរបស់អ្នកនឹងមិនបាត់ទៅណាទេ តែនៅពេលដែលអ្នកបានឃើញកងទ័ពខ្មាំងសត្រូវលេចឡើងពីចម្ងាយមក អ្នកនឹងយឺតពេលសម្រាប់ការត្រៀមខ្លួន។
ហោរាពិតប្រាកដប្រកាសអំពីការជំនុំជម្រះរបស់ព្រះអម្ចាស់ដែលត្រូវមកដល់ សាររបស់ពួកគេក៏ដាស់តឿនពួកបណ្តាជនអំពីអំនួតនៃភាពចម្រុងចម្រើន ហើយលើកទឹកចិត្តពួកគេឲ្យមានសង្ឃឹមឡើងវិញ។ ព្រះអម្ចាស់តែងតែធានាថា ព្រះអង្គមានការប្ដូរផ្តាច់ចំពោះរាស្ត្រព្រះអង្គ ដោយសន្យាប្រទានពេលអនាគតដ៏អស្ចារ្យដល់ពួកគេ។ នៅចំពោះមុខនៃការជំនុំជម្រះ ពួកគេគ្រាន់តែអាចសង្ឃឹមថា នឹងរកឃើញកន្លែងជ្រកកោន ក្នុងព្រះអង្គ គឺមិនមែនដាច់ចេញពីព្រះអង្គឡើយ។
សព្វថ្ងៃនេះ ហោរាក្លែងក្លាយនៅតែនាំពួកជំនុំរបស់ព្រះឲ្យវង្វេង។ ពាក្យសម្ភីរបស់ពួកគេ គឺជាពាក្យបញ្ជោរដូចជា «អ្នកទាំងអស់គ្នាជាក្រុមយុវជនដែលអស្ចារ្យបំផុត ដែលសហគមន៍នេះធ្លាប់បានឃើញ។ អនាគតស្ថិតក្នុងដៃរបស់អ្នកហើយ។ អ្នកអាចហោះឡើង នៅពេលណាក៏បាន!» ប៉ុន្តែ ស្រដៀងគ្នានេះដែរ ពាក្យសម្ដីរាក់កំផែលដូចនេះក៏ត្រូវគេយកមកនិយាយ ក្នុងពួកជំនុំជាច្រើនពេកហើយ ដោយការបង្រៀនប្លែកៗ ហើយចែកចាយសេចក្តីពិតតែពាក់កណ្ដាលក្នុងន័យបន្លំ ពោលគឺនិយាយការពិតពាក់កណ្ដាល និងកុហកពាក់កណ្ដាល។
យើងត្រូវការសម្លេងរបស់អ្នកនាំព្រះរាជសារពិតប្រាកក្នុងសម័យបច្ចុប្បន្ន ដូចសម័យហោរាយេរេមាផងដែរ។ ពួកជំនុំប្រជាជន និងពិភពលោករបស់យើងត្រូវការមនុស្សដែលមានចិត្តក្លាហាន ហ៊ាននិយាយការពិត ទោះគេសើចចំអក ហើយបដិសេធន៍យ៉ាងណាក៏ដោយ គឺនិយាយអំពីអំពើបាប និយាយអំពីខ្នាតគំរូនៃក្រមសីលធម៌របស់ព្រះ ព្រមានអំពីការជំនុំជម្រះ ប្រកាសអំពីការយាងមកវិញរបស់ព្រះយេស៊ូវ និងចង្អុលបង្ហាញឲ្យងាកទៅរកព្រះដែលអាចជួយសង្គ្រោះ។
ចូរយើងទូលសូមព្រះអង្គចាត់មនុស្សដែលបានត្រៀមខ្លួនជាស្រេច ដើម្បីជំរុញរាស្ត្ររបស់ព្រះអង្គឲ្យធ្វើតាមព្រះបន្ទូលព្រះអង្គ ហើយចុះចូលនឹងព្រះវិញ្ញាណព្រះអង្គ។ ចូរអធិស្ឋានថា ពេលណាអ្នកបានឮព្រះបន្ទូលព្រះ ដែលពិតជាបានចែកចាយ តាមរយៈអ្នកបម្រើដ៏ស្មោះត្រង់របស់ព្រះអង្គ អ្នកនឹងការពារខ្លួនអ្នកឲ្យរួចផុតពីអំនួតនៃភាពចម្រុងចម្រើន ហើយស្ម័គ្រចិត្តស្តាប់ព្រះបន្ទូល ហើយត្រៀមខ្លួនជ្រកកោនក្នុងព្រះអង្គ ដែលជាក្តីសង្ឃឹមតែមួយរបស់អ្នក។ ហើយអធិស្ឋានសូមឲ្យអ្នកអាចនាំព្រះបន្ទូលយ៉ាងដូចនោះ ក្នុងតំបន់ដែលអ្នករស់នៅ និងកន្លែងធ្វើការរបស់អ្នក។
ព្រះគម្ពីរសញ្ជឹងគិត៖ ១ថែស្សាឡូនិច ៥:១-១១
គម្រោងអានព្រះគម្ពីររយៈពេល១ឆ្នាំ៖ យ៉ូប ៣៦-៣៧ និង១កូរិនថូស ១២