ព្រឹក
ផ្សាយដំណឹងល្អតាមគំរូសាវ័កប៉ុល
March 24, 2025
ម៉ាថាយ ២៨:១៦-២០
ខាងឯសេចក្តីឧស្សាហ៍ នោះកុំឲ្យខ្ជិលឡើយ ខាងឯវិញ្ញាណ នោះក៏ចូរព្យាយាមចុះ ដោយខំប្រឹងបំរើព្រះអម្ចាស់។ រ៉ូម ១២:១១
ជីវិតរបស់លោកចច វើវើ(George Verwer) មានការផ្លាស់ប្រែ ដែលគួរឲ្យកត់សំគាល់ នៅពេលដែលគាត់ទទួលជឿព្រះយេស៊ូវ ក្នុងអំឡុងពេលដែលលោកគ្រូ ប៊ីលី ក្រាហាំ(Billy Graham) ធ្វើកម្មវិធីផ្សាយដំណឹងល្អទ្រង់ទ្រាយធំ ក្នុងឆ្នាំ១៩៥៧។ បន្ទាប់ពីគាត់ទើបតែបានទទួលជឿព្រះ គាត់ក៏បានចាប់ផ្តើមបេសកកម្មចេញផ្សាយដំណឹងល្អ ហៅកាត់ថាអូអិម(OM) ហើយនៅឆ្នាំ១៩៦៣ អង្គការបេសកកម្មនេះបានបញ្ជូនបេសកជន២០ពាន់នាក់ ទៅទ្វីបអឺរ៉ុប។ អង្គការOM ស្ថិតក្នុងចំណោមអង្គការបេសកកម្មធំបំផុត នៅសតវត្សរ៍ទី២០ ដោយបានបញ្ជូនបេសកជនរាប់ពាន់អ្នក ចេញទៅផ្សាយដំណឹងល្អ ជារៀងរាល់ឆ្នាំ។ នៅពេលដែលលោកចច បានទទួលមរណៈភាពក្នុងឆ្នាំ២០២៣ អង្គការនេះមានបុគ្គលិកជាង៣ពាន់នាក់ មកពី១៣៤ប្រទេស កំពុងធ្វើការបម្រើព្រះក្នុង១៤៧ប្រទេស ហើយមានអង្គការបេសកម្មជិត៣០០ បានចាប់កំណើតឡើង តាមរយៈការសហករណ៍ជាមួយអង្គការOM។
លោកចច មានចិត្តឆេះឆួល ក្នុងការនាំគេឲ្យទទួលជឿព្រះគ្រីស្ទ ដើម្បីឲ្យបានសេចក្តីសង្គ្រោះរួចពីបាប មិនខុសពីសាវ័កប៉ុលទេ។ បន្ទាប់ពីសាវ័កប៉ុលប្រែចិត្តជឿព្រះ នៅតាមផ្លូវទៅទីក្រុងដាម៉ាស គាត់ក៏បានក្លាយជាបេសកជនដែលមានការប្តូរផ្តាច់ក្នុងការបម្រើព្រះ ដោយធ្វើតាមព្រះរាជបញ្ជារបស់ព្រះយេស៊ូវ ឲ្យចេញទៅបង្កើតសិស្ស នៅគ្រប់ទាំងសាសន៍(ម៉ាថាយ ២៨:១៩)។ ក្នុងដំណើរបេសកកម្មរបស់គាត់ គាត់ក៏បានបង្រៀនលោកធីម៉ូថេ និងមនុស្សជាច្រើនទៀត ឲ្យចេញទៅបង្កើតសិស្សផងដែរ។
ដោយសារសំបុត្រដែលសាវ័កប៉ុលបានសរសេរ ដោយការបណ្តាលចិត្តពីព្រះវិញ្ញាណបរិសុទ្ធ មនុស្សជាច្រើនបានបន្តផ្សាយដំណឹងល្អ ដោយចិត្តក្លាហាន អស់ជាច្រើនសតវត្សរ៍មកហើយ។ គាត់បានយល់អំពីសារៈសំខាន់នៃមហាបេសកកម្មរបស់ព្រះយេស៊ូវ(ខ.១៩-២០)។ ហេតុនេះហើយ ក្នុងបទគម្ពីររ៉ូមជំពូក១២ គាត់បានរំឭកយើងថា “ខាងឯសេចក្តីឧស្សាហ៍ នោះកុំឲ្យខ្ជិលឡើយ ខាងឯវិញ្ញាណ នោះក៏ចូរព្យាយាមចុះ ដោយខំប្រឹងបំរើព្រះអម្ចាស់”(ខ.១១)។ ពេលណាយើងមានព្រះវិញ្ញាណបរិសុទ្ធគង់សណ្ឋិតយើង ព្រះអង្គនឹងជួយយើងឲ្យមានចិត្តឧស្សាហ៍ នៅក្នុងការប្រាប់អ្នកដទៃអំពីព្រះគ្រីស្ទ។—Alyson Kieda
តើមាននរណាខ្លះបានបណ្តាលចិត្តអ្នក ក្នុងការធ្វើដំណើរខាងវិញ្ញាណរបស់អ្នក? តើអ្នកអាចប្រាប់នរណាខ្លះ អំពីព្រះយេស៊ូវ?
ឱព្រះអម្ចាស់ សូមព្រះអង្គជួយទូលបង្គំ ឲ្យមានចិត្តក្លាហាន ក្នុងការធ្វើបន្ទាល់ថ្វាយព្រះអង្គ។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១៦-១៨ និង លូកា ២:១-២៤
ល្ងាច
ភាពល្ងង់ខ្លៅនៃការស្រឡាញ់ដោយលម្អៀង (សៀវភៅសេចក្ដីពិតសម្រាប់ជីវិត)
ដោយAlistair Begg
March 24, 2025
«ឯអ៊ីស្រាអែល គាត់ស្រឡាញ់ យ៉ូសែប លើសជាងកូនទាំងអស់ ពីព្រោះជាកូនដែលកើតមកក្នុងកាលដែលគាត់ចាស់ហើយ គាត់ធ្វើអាវ១ដ៏មានពណ៌ច្រើនឲ្យពាក់ បងទាំងប៉ុន្មានក៏ឃើញថា ឪពុកស្រឡាញ់ យ៉ូសែប លើសជាងកូនទាំងអស់បានជាគេព្រួតគ្នាស្អប់ដល់គាត់ ហើយនិយាយអ្វីនឹងគាត់ដោយស្រួលពុំបានទេ» (លោកុប្បត្ដិ ៣៧:៣-៤)។
ភាពលម្អៀងក្នុងទំនាក់ទំនង គឺជាភាពល្ងង់ខ្លៅ។ យើងសង្កេតឃើញបញ្ហានេះកើតឡើងក្នុងរឿងរ៉ាវនៃរាស្ត្ររបស់ព្រះ ក្នុងគ្រាសញ្ញាចាស់ ប៉ុន្តែវាប្រហែលជានាំឲ្យមានបញ្ហាធំជាងគេ នៅក្នុងជីវិតរបស់លោក យ៉ូសែប ដោយសារគាត់ជាកូនសំណព្វរបស់ឪពុកគាត់។ លោក យ៉ូសែប ជាកូនរបស់លោក យ៉ាកុប ដែលបានកើតក្នុងកាលដែលគាត់មានវ័យចាស់ហើយ ហើយជាកូនរបស់នាង រ៉ាជែល ជាគូស្នេហ៍ប្រចាំជីវិតលោក យ៉ាកុប។ ហេតុនេះហើយ លោក យ៉ាកុប ដែលព្រះទ្រង់បានប្ដូរឈ្មោះទៅជាអ៊ីស្រាអែល ស្រឡាញ់កូនប្រុសម្នាក់នេះលើសកូនដទៃទៀត។ គ្រាប់ពូជនៃភាពលម្អៀងនេះ បានចាក់ឫសចូលជ្រៅក្នុងគ្រួសារនេះ ហើយបង្កើតផលផ្លែអាក្រក់ជាច្រើន។
លោក យ៉ាកុប បានបង្ហាញភាពលម្អៀងរបស់គាត់តាមរយៈការឲ្យ «អាវវែងមានពណ៌ច្រើន» ដល់លោក យ៉ូសែប ជាកូនដែលគាត់បានដេរផ្ទាល់ដៃ។ នេះជាអំណោយដែលបានឲ្យដោយភាពលម្អៀង ដែលលោក យ៉ូសែប ចូលចិត្តពាក់។ អាវវែងនេះនាំឲ្យមានរឿងវិវាទ និងទំនាស់ជាមួយពួកបងៗរបស់លោក យ៉ូសែប។ ទំនាស់របស់ពួកគេក៏បានបណ្ដាលឲ្យមានការឈ្នានីសដល់ថ្នាក់ពួកគេចង់សម្លាប់គាត់។ ទីបំផុត ពួកគេក៏បានលក់ប្អូនប្រុសខ្លួនឯងធ្វើជាទាសករ និងកុហកឪពុករបស់ពួកគេថា យ៉ូសែប បានស្លាប់ហើយ។
បើការឲ្យអាវវែងនោះអាចបណ្ដាលឲ្យមានប្រតិកម្មឆ្លើយតបយ៉ាងដូចនេះហើយ នោះមានរឿងធំជាងបញ្ហាអាវវែងនោះទៀតកំពុងកើតឡើង។ រឿងនេះប្រាកដជាបានកើតឡើង ដោយសារបាបដែលបានចាក់ឫសយ៉ាងជ្រៅ។ នោះជាអ្វីដែលកំពុងកើតឡើងចំពោះពួកបងៗរបស់លោក យ៉ូសែប។ បញ្ហាមិនស្ថិតនៅត្រង់ថា អាវវែងនោះមានតម្លៃថ្លៃខ្លាំងនោះទេ តែដោយសារវាលើកតម្កើងលោក យ៉ូសែប ឲ្យមានឋានៈខ្ពស់ជាងពួកគេបានជាពួកគេមិនសុខចិត្ត។ ការស្រឡាញ់កូនសំណព្វតែងតែបណ្ដាលឲ្យកូនផ្សេងទៀតគិតថា ឪពុកខ្លួនមិនស្រឡាញ់ពួកគេ ហើយបណ្ដាលឲ្យកូនសំណព្វមានភាពក្រអឺតក្រទម និងអំនួត ហើយនាំឲ្យកូនដែលមិនសំណព្វ មានចិត្តស្អប់ និងជូរល្វីង។ អ្នកប្រហែលបានឃើញផលវិបាកនៃបញ្ហានេះ ក្នុងជីវិតមនុស្សនៅក្បែរអ្នក ឬក្នុងជីវិតអ្នកផ្ទាល់ដែលនាំឲ្យមានការស៊ីបំផ្លាញទំនាក់ទំនង។
លោក យ៉ាកុប ខ្លួនឯងក៏គួរតែដឹងអំពីបញ្ហានៃការស្រឡាញ់កូនមិនស្មើគ្នា ដោយម្តាយគាត់បានស្រឡាញ់គាត់ខ្លាំងជាងលោក អេសាវ ជាបងប្រុសគាត់បានបណ្ដាលឲ្យមានភាពវឹកវរ។ ទំនាក់ទំនងរបស់គាត់ជាមួយលោក អេសាវ ក៏ដូចជាទំនាក់ទំនងរវាងលោក យ៉ូសែប និងបងប្អូនគាត់ បានបែកបាក់អស់ជាច្រើនឆ្នាំ។
ចូរយើងកុំប្រញាប់គិតថា ផ្នត់គំនិត និងទង្វើរបស់លោក យ៉ាកុប និងកូនៗរបស់គាត់ មិនអាចកើតមានចំពោះយើង ធ្វើមើលតែយើងមិនអាចមានកំហុសដូចពួកគេនោះឡើយ។ យើងរាល់គ្នាត្រូវតែមានការប្រុងប្រយ័ត្នចំពោះភាពលំអៀងក្នុងទំនាក់ទំនង និងកំហឹងដែលច្រើនតែកើតឡើងដោយសារវា។ វាជាកំហុសដែលកើតមានជាធម្មតា ហើយយើងអាចយល់បាន តែវាមានស្រមោលស៊ីជម្រៅ ខ្មៅងងឹត និងនាំមកនូវភាពហិនហោច។
ចូរយើងរៀនសូត្រអំពីបញ្ហានេះ ជាជាងគ្រាន់តែគ្រវីក្បាល នៅចំពោះភាពល្ងង់ខ្មៅរបស់លោក យ៉ាកុប។ ទំនាក់ទំនងនីមួយៗ ជាអំណោយពិសេសមកពីព្រះ។ ភាពស្រឡាញ់ដោយលំអៀង ចំពោះមនុស្សនៅក្បែរយើង ទោះដោយមូលហេតុអ្វីក៏ដោយសុទ្ធតែនាំមកនូវភាពប្រេះឆា និងការបែកបាក់ក្នុងទំនាក់ទំនងយ៉ាងពិតប្រាកដ។ ទោះជាយ៉ាងណាក៏ដោយ បើយើងស្រឡាញ់ពិតប្រាកដ ចំពោះមិត្តភក្តិ សមាជិកគ្រួសារ និងអ្នកជិតខាង គឺមានន័យថា យើងថ្វាយព្រះកិត្តិនាមដល់ព្រះ ហើយលើកទឹកចិត្តដល់មនុស្សដែលព្រះអង្គបានដាក់នៅក្បែរយើង។
ព្រះគម្ពីរសញ្ជឹងគិត៖ លោកុប្បត្ដិ ៣៧
គម្រោងអានព្រះគម្ពីររយៈពេល១ឆ្នាំ៖ សុភាសិត ៦-៧ និង១កូរិនថូស ១៥:២៩-៥៨