ព្រឹក
ស្រឡាញ់អ្នកប្រទេសក្រៅ ដែលទាល់ក្រ
ដោយPatricia Raybon
May 21, 2025
លេវីវិន័យ ១៩:៩-១០,៣៣-៣៤
កុំឲ្យសង្កត់សង្កិនអ្នកប្រទេសក្រៅឡើយ ដ្បិតឯងរាល់គ្នាស្គាល់សណ្ឋានចិត្តរបស់អ្នកប្រទេសក្រៅហើយ។ និក្ខមនំ ២៣:៩
ភរិយារបស់មិត្តភក្តិខ្ញុំម្នាក់ គឺជាជាងកាត់ដេរដ៏ចំណាន។ គាត់បានរៀបផែនការនៃសេចក្តីស្រឡាញ់ មុនពេលគាត់លាចាកលោក ដោយសារជំងឺដែលគាត់មានជាយូរឆ្នាំមកហើយ។ គាត់បានបរិច្ចាគឧបករណ៍កាត់ដេរទាំងអស់របស់គាត់ ដល់អង្គការកាត់ដេរមួយ ក្នុងទីក្រុង ដោយផ្តល់ឲ្យពួកគេនូវម៉ាស៊ីនដេរ តុសម្រាប់កាត់ខោអាវ និងឧបករណ៍ជាច្រើនទៀត សម្រាប់ថ្នាក់រៀន សម្រាប់ជនអន្តោប្រវេសន៍ដែលទើបធ្វើដំណើរមកដល់។ ស្វាមីគាត់បានប្រាប់យើងថា “ខ្ញុំបានរាប់ក្រណាត់ មាន២៨កេស។ មានស្រ្តី៦នាក់ បានមកទទួលសម្ភារៈ និងឧបករណ៍ទាំងអស់នោះ។ សិស្សរបស់ពួកគេគឺជាកម្មករកាត់ដេរ ដែលខិតខំធ្វើការងារ មានចិត្តអន្ទះសាចង់រៀនជំនាញកាត់ដេរ”។
នៅពេលដែលអ្នកផ្សេងពិពណ៌នា អំពីជនអន្តោប្រវេសន៍ដែលទើបមកដល់ថ្មី គេមិនបាននិយាយ ដោយការសរសើរដូចនេះទេ។ ទុក្ខលំបាករបស់អ្នកចំណូលថ្មី បាននាំឲ្យមានការខ្វែងគំនិតគ្នា ក្នុងសង្គម។
ទោះជាយ៉ាងណាក៏ដោយ លោកម៉ូសេបាននាំព្រះបន្ទូលរបស់ព្រះអម្ចាស់ ដែលបានបង្គាប់ពួកអ៊ីស្រាអែលថា “កុំឲ្យសង្កត់សង្កិនអ្នកប្រទេសក្រៅឡើយ ដ្បិតឯងរាល់គ្នាស្គាល់សណ្ឋានចិត្តរបស់អ្នកប្រទេសក្រៅហើយ”(និក្ខមនំ ២៣:៩)។ ជាងនេះទៅទៀត គាត់ក៏បានចែកចាយក្រឹត្យវិន័យរបស់ព្រះអង្គ ទាក់ទងនឹងជនអន្តោប្រវេសន៍ផងដែរ។ គឺដូចដែលព្រះអង្គបានបង្គាប់ពួកគេថា “កាលណាឯងរាល់គ្នាច្រូតចំរូតនៅស្រែ នោះមិនត្រូវច្រូតឲ្យដល់កៀនដីរបស់ឯងទាំងអស់ទេ ក៏មិនត្រូវសន្សំរើសគួរស្រូវដែលបានជ្រុះនោះផង ហើយក៏មិនត្រូវសន្សំបេះផ្លែទំពាំងបាយជូរ ឬរើសផ្លែដែលជ្រុះនៅចំការរបស់ឯងដែរ ត្រូវទុកសំរាប់ឲ្យពួកអ្នកក្រ នឹងពួកអ្នកស្នាក់វិញ អញនេះគឺយេហូវ៉ា ជាព្រះនៃឯងរាល់គ្នា”(លេវីវិន័យ ១៩:៩-១០)។
ព្រះទ្រង់ក៏បានប្រកាសផងដែរថា “បើមានមនុស្សប្រទេសក្រៅណាមកស្នាក់នៅក្នុងស្រុកជាមួយនឹងឯង នោះកុំឲ្យធ្វើបាបគេឡើយ ឯអ្នកប្រទេសក្រៅដែលមកស្នាក់នៅក្នុងពួកឯងរាល់គ្នា នោះត្រូវទុកដូចជាកើតនៅស្រុកឯងវិញ ហើយត្រូវស្រឡាញ់គេដូចជាខ្លួនឯងដែរ ដ្បិតឯងរាល់គ្នាពីដើមក៏ជាអ្នកស្នាក់នៅក្នុងស្រុកអេស៊ីព្ទដែរ អញនេះគឺព្រះយេហូវ៉ា ជាព្រះនៃឯងរាល់គ្នា”(ខ.៣៣-៣៤)។
ព្រះអង្គបានដាក់ខ្នាតគំរូ ឬស្តង់ដា សម្រាប់ឲ្យយើងប្រព្រឹត្តតាមហើយ។ សូមព្រះអង្គប្រទានពរចិត្តយើង ឲ្យបង្ហាញសេចក្តីស្រឡាញ់ ដល់ជនអន្តោប្រវេសន៍ ឬអ្នកចំណូលថ្មី ក្នុងចំណោមយើង។—Patricia Raybon
បើពួកជំនុំរបស់អ្នក ឬតំបន់ដែលអ្នករស់នៅ មានអ្នកខ្លះជាអ្នកមកពីប្រទេសក្រៅ ឬនិយាយភាសាផ្សេង
តើអ្នកអាចជួយយកអសារពួកគេយ៉ាងដូចម្តេចខ្លះ? តើនៅកន្លែងណា អ្នកអាចរកឃើញឱកាសជួយនរណាម្នាក់ ដែលមានវប្បធម៌ខុសពីអ្នក?
ឱព្រះវរបិតា សូមព្រះអង្គប្រទានទូលបង្គំនូវចិត្តដែលស្វាគមន៍ និងយកអសារអ្នកដទៃ។
គម្រោងអានព្រះគម្ពីររយៈពេល១ឆ្នាំ : ១របាក្សត្រ ១៣-១៥ និង យ៉ូហាន ៧:១-២៧
ប្រភេទ
ល្ងាច
ដើម្បីចូលក្នុងនគរព្រះ (សៀវភៅសេចក្ដីពិតសម្រាប់ជីវិត)
ដោយAlistair Begg
May 21, 2025
«ប្រាកដមែន ខ្ញុំប្រាប់អ្នកជាប្រាកដថា បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ» (យ៉ូហាន ៣:៥)។
ពេលណាយើងអានកណ្ឌគម្ពីរដំណឹងល្អ យើងឃើញថា ព្រះរាជកិច្ចរបស់ព្រះយេស៊ូវ មួយផ្នែកធំ ក៏បានរាប់បញ្ចូលការផ្សាយដំណឹងល្អអំពីនគរព្រះផងដែរ។ ព្រះអង្គបានយាងកាត់តាមទីក្រុង និងភូមិទាំងឡាយ ដោយប្រកាសប្រាប់គេក្នុងន័យថា មាននគរមួយ ហើយព្រះអង្គជាក្សត្រ។ ពួកគេមិនទាន់បានចូលនគរនោះទេ តែបើគេដើរតាមព្រះអង្គ ពួកគេនឹងបានធ្វើជារាស្ត្រព្រះអង្គ ជាពលរដ្ឋរបស់នគរនោះ។
ពេលណាយើងអធិស្ឋានថា សូមរាជ្យព្រះអង្គបានមកដល់ (លូកា ១១:២) បំណងចិត្តរបស់យើងក៏គួរតែចង់ឲ្យគេនាំបុរសស្ត្រីទាំងឡាយ ចូលនគរព្រះគ្រីស្ទ ដោយមានកំណើតថ្មី និងចង់ឲ្យពួកគេក្លាយជាអ្នកដើរតាមព្រះយេស៊ូវ ដែលមានការប្ដេជ្ញាចិត្ត។ យើងអធិស្ឋានឲ្យអ្នកដែលកំពុងរស់នៅដោយបះបោរទាស់នឹងព្រះអង្គ សូមឲ្យព្រះអង្គរំដោះពួកគេ ចេញពីការគ្រប់គ្រងនៃភាពងងឹត ហើយចូលទៅក្នុងនគររបស់ព្រះរាជបុត្រាស្ងួនភ្ងារបស់ព្រះអង្គ (កូឡូស ១:១៣)។ ព្រះយេស៊ូវបានបញ្ជាក់ច្បាស់ថា វិធីតែមួយដើម្បីឲ្យយើងចូលក្នុងនគរព្រះអង្គបាន គឺត្រូវកើតជាថ្មី។
ព្រះយេស៊ូវបានបង្ហាញសេចក្តីពិតនេះ កាលព្រះអង្គជួបជាមួយលោក នីកូដេម។ លោក នីកូដេម គឺជាអ្នកកាន់សាសនា ជាអ្នកមានអំណាច និងឥទ្ធិពល ប៉ុន្តែគាត់នៅតែគ្មានសន្តិភាពនៅក្នុងចិត្ត នៅតែស្វែងរកសេចក្តីពិត។ នៅពេលគាត់បានជជែកជាមួយព្រះយេស៊ូវ ព្រះអង្គក៏បានចង្អុលបង្ហាញ អំពីលក្ខខណ្ឌដើម្បីឲ្យបានឃើញ និងចូលនគរព្រះ គឺត្រូវកើតជាថ្មី ដោយព្រះវិញ្ញាណ។ ព្រះអង្គមានបន្ទូលថា ការកើតជាថ្មីនេះ មិនមែនកើតខាងសាច់ឈាមទេ តែកើតដោយសារព្រះវិញ្ញាណបរិសុទ្ធធ្វើការអស្ចារ្យនៅក្នុងចិត្តមនុស្ស។ គ្មាននរណាម្នាក់អាចចូលនគរព្រះ ដោយគ្មានព្រះអង្គធ្វើការក្នុងពួកគេនោះទេ ហើយក៏គ្មាននរណានៅឆ្ងាយពីនគរព្រះអង្គពេក បានជាព្រះអង្គមិនអាចធ្វើការក្នុងពួកគេនោះឡើយ។
ពេលណាយើងអធិស្ឋានសូមរាជ្យព្រះអង្គមកដល់ គឺយើងកំពុងសូមព្រះអង្គបើកភ្នែក និងត្រចៀករបស់មនុស្សឲ្យឃើញ និងឮព្រះបន្ទូលព្រះអង្គ ដើម្បីឲ្យពួកគេអាចកើតជាថ្មី។ ព្រះមហាក្សត្រនឹងយាងមក ដើម្បីប្រទាននគរដ៏អស់កល្បរបស់ព្រះអង្គ ហើយទ្រង់កំពុងធ្វើការក្នុងពេលបច្ចុប្បន្ន ដោយព្រះវិញ្ញាណព្រះអង្គ ដើម្បីនាំមនុស្សប្រុសស្រីចូលនគរនោះ។ ទំរាំដល់ថ្ងៃដែលព្រះអង្គយាងមកវិញ សូមឲ្យការយល់ដឹងរបស់យើង អំពីរបៀបចូលនគរព្រះគ្រីស្ទបណ្ដាលចិត្តយើងឲ្យស្ញប់ស្ញែងកាន់តែខ្លាំង ចំពោះការផ្លាស់ប្រែក្នុងជីវិតយើង និងមានចិត្តឆេះឆួលក្នុងការអធិស្ឋានសូមព្រះវិញ្ញាណធ្វើការក្នុងចិត្តមនុស្សបាត់បង់ ដែលមានតែព្រះអង្គទេ អាចធ្វើបាន។
ព្រះគម្ពីរសញ្ជឹងគិត៖ យ៉ូហាន ៣:១-១៥
គម្រោងអានព្រះគម្ពីររយៈពេល១ឆ្នាំ៖ ១ពង្សាវតាក្សត្រ ២១-២២ និងម៉ាថាយ ១១