ព្រឹក
ប្រកាន់ខ្ជាប់តាមព្រះបន្ទូលសន្យា
ដោយLeslie Koh
June 17, 2025
អេសាយ ៥៥:១-៣,៨-១៣
ដ្បិតដែលផ្ទៃមេឃខ្ពស់ជាងផែនដីយ៉ាងណា នោះអស់ទាំងផ្លូវរបស់អញ ខ្ពស់ជាងផ្លូវរបស់ឯង ហើយគំនិតរបស់អញ ក៏ខ្ពស់ជាងគំនិតរបស់ឯងរាល់គ្នាយ៉ាងនោះដែរ។ អេសាយ ៥៥:៩
ថ្ងៃមួយអ្នកស្រីវែនឌី(Wendy) មានអារម្មណ៍ថា គេមើលរំលងគាត់។ ក្នុងអំឡុងម៉ោងសម្រាកញាំអាហារថ្ងៃត្រង់ ចៅហ្វាយរបស់គាត់បានដាក់ស្ករសូកូឡា នៅលើតុរបស់បុគ្គលិកម្នាក់ៗ លើកលែងតែតុគាត់ប៉ុណ្ណោះ។ គាត់មិនយល់ថា មានរឿងអ្វីកំពុងកើតឡើងទេ ដូចនេះ គាត់ក៏បានបង្ហាញការអាក់អន់ចិត្ត ឲ្យមិត្តភក្តិគាត់បានដឹង ដោយចោទជាសំណួរថា “ហេតុអ្វីគាត់មើលរំលងខ្ញុំ?”
នៅពេលដែលគេសួរចៅហ្វាយរបស់គាត់ ចៅហ្វាយរបស់គាត់ក៏បានពន្យល់ថា “ស្ករសូកូឡាទាំងនោះនៅល្អទេ ប៉ុន្តែ ខ្ញុំបានទុកពួកវាយូរដែរហើយ។ វេនឌី មានផ្ទៃពោះ អញ្ចឹងហើយ ខ្ញុំគ្រាន់តែមិនចង់ឲ្យស្ករសូកូឡានោះធ្វើឲ្យប៉ះពាល់ខុសភាពគាត់”។ បន្ទាប់មក គាត់ក៏និយាយទាំងអស់សំណើចថា “ចំណែកអ្នកផ្សេងវិញ បើស្ករសូកូឡានោះធ្វើឲ្យប៉ះពាល់សុខភាពបន្តិចបន្តួច ដូចជាមិនអីទេ”។
រឿងតូចមួយនេះក៏បានក្លាយជារឿងកំប្លែង ដែលគេបន្តលើកមកនិយាយ នៅកន្លែងធ្វើការ ប៉ុន្តែ វាបានធ្វើឲ្យខ្ញុំគិតឃើញថា នៅពេលខ្លះ យើងមានការយល់ច្រឡំ ចំពោះព្រះហឫទ័យរបស់ព្រះ ដោយសារការយល់ដឹងរបស់យើង មានដែនកំណត់។ ហើយប្រហែលជាថែមទាំងជឿថា ខ្លួនយើងគឺជាជនរងគ្រោះនៃរឿងដ៏អយុត្តិធម៌ណាមួយ ដោយយើងភ្លេចថា ព្រះទ្រង់តែងតែជ្រាបថា មានរបស់អ្វីខ្លះដែលល្អបំផុតសម្រាប់យើង។
បទគម្ពីរអេសាយ ៥៥:៨-៩ បានក្រើនរំឭកយើងថា យើងមិនតែងយល់អំពីគំនិត និងផ្លូវរបស់ព្រះទេ ប៉ុន្តែ យើងអាចដឹងច្បាស់ថា គំនិត និងផ្លូវរបស់ព្រះអង្គ តែងតែខ្ពស់ជាងគំនិត និងផ្លូវរបស់យើង(ខ.៩)។ គំនិត និងផ្លូវរបស់យើងច្រើនតែទទួលឥទ្ធិពលពីភាពអាត្មានិយមរបស់យើង តែព្រះអង្គល្អឥតខ្ចោះ មានព្រះទ័យអាណិត និងសុចរិត។ ហេតុនេះហើយ នៅពេលដែលអ្វីៗហាក់ដូចជាមិនមានដំណើរការល្អ យើងអាចទុកចិត្តថា ព្រះទ្រង់នឹងប្រទានអ្វីដែលយើងពិតជាត្រូវការ(ខ.១-២) ដ្បិតព្រះអង្គតែងតែមានក្តីស្រឡាញ់ និងស្មោះត្រង់ ចំពោះព្រះបន្ទូលសន្យាដ៏ស្ថិតស្ថេររបស់ព្រះអង្គ(ខ.៣)។ ចូរយើង “អំពាវនាវដល់ទ្រង់ ក្នុងកាលដែលទ្រង់គង់នៅជិតចុះ”(ខ.៦) ដោយដឹងថា ព្រះអង្គនឹងមិនចាកចោលយើងឡើយ។—Leslie Koh
តើព្រះទ្រង់មានព្រះបន្ទូលសន្យាអ្វីខ្លះ ដែលអ្នកអាចប្រកាន់ខ្ជាប់តាម នៅពេលដែលជីវិតហាក់ដូចជាអយុត្តិធម៌?
តើព្រះអង្គមានចារិតលក្ខណៈអ្វីខ្លះ ដែលផ្តល់ឲ្យអ្នកនូវការកម្សាន្តចិត្ត និងការធានា?
ឱព្រះដ៏ស្មោះត្រង់ ព្រះអង្គជ្រាបថា ជួនកាល ទូលបង្គំមានអារម្មណ៍ថា ព្រះអង្គបានភ្លេចទូលបង្គំ
ហើយមានការសង្ស័យចំពោះសេចក្តីស្រឡាញ់ ដែលព្រះអង្គមានចំពោះទូលបង្គំ។
សូមព្រះអង្គជួយទូលបង្គំឲ្យទុកចិត្តព្រះអង្គ ហើយប្រកាន់ខ្ជាប់តាមព្រះបន្ទូលសន្យាដ៏អស់កល្បរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : នេហេមា ៧-៩ និង កិច្ចការ ៣
ប្រភេទ
ល្ងាច
គំនិតបានកែថ្មីឡើង (សៀវភៅសេចក្ដីពិតសម្រាប់ជីវិត)
ដោយAlistair Begg
June 17, 2025
«កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង ដើម្បីនឹងអាចលមើលឲ្យបានស្គាល់បំណងព្រះហឫទ័យនៃព្រះ ដែលល្អ ស្រួលទទួល ហើយគ្រប់លក្ខណ៍ផង» (រ៉ូម ១២:២)។
ប៉មគ្រប់គ្រងការហោះហើរនៅអាកាសយានដ្ឋាន ជាទីកន្លែងដែលគួរឲ្យចាប់អារម្មណ៍។ ប៉មនោះមានបន្ទប់តូចមួយដែលមានសមត្ថភាព និងអំណាចជាច្រើនលើសលប់មកលើការហោះហើររបស់យន្តហោះនីមួយៗ។ ការណែនាំដែលប៉មនោះបានផ្តល់ឲ្យបានការពារ និងធានានូវសុវត្ថិភាព។ បើក្រុមការងារក្នុងប៉មនោះមានកំហុសបច្ចេកទេសណាមួយ ផលប៉ះពាលកើតមាននៅក្រៅប៉មនោះ ហើយច្រើនតែនាំឲ្យមកនូវគ្រោះមហន្តរាយធ្ងន់ធ្ងរ។
ស្រដៀងគ្នានេះដែរ យើងអាចនិយាយថា គំនិតរបស់យើង គឺប៉មគ្រប់គ្រងនៃរូបកាយយើង។ ការអ្វីដែលរូបកាយយើងធ្វើ មានការជាប់ទាក់ទងដោយផ្ទាល់មកលើការអ្វីដែលកំពុងកើតឡើងក្នុងគំនិតយើង។ ក្នុងគំនិតយើង យើងមានសមត្ថភាពអាចពិចារណា សម្រេចចិត្ត វិនិច្ឆ័យអារម្មណ៍របស់យើង ហើយធ្វើឲ្យក្តីស្រឡាញ់របស់យើងចេញជារូបរាង្គឡើង។ ហេតុនេះហើយ សាវ័ក ប៉ុល បានប្រាប់យើងឲ្យថ្វាយរូបកាយយើងជាយញ្ញបូជារស់ ជាការឆ្លើយតបចំពោះសេចក្តីមេត្តារបស់ព្រះ ចំពោះយើងក្នុងព្រះគ្រីស្ទ (រ៉ូម ១២:១) ហេតុនេះហើយ ការគិតរបស់យើងពិតជាសំខាន់ណាស់។
ការរស់នៅជាគ្រីស្ទបរិស័ទរាប់បញ្ចូលការកែប្រែផ្នត់គំនិតស៊ីជម្រៅ ដែលនាំឲ្យមានគំនិត និងអាកប្បកិរិយាកាន់តែបរិសុទ្ធ ដែលយើងមិនឃើញមាននៅក្នុងជីវិតដែលគ្មានព្រះគ្រីស្ទឡើយ។ គឺដូចដែលសាវ័ក ប៉ុល បានបង្រៀនក្នុងខគម្ពីរមុនថា «ពីព្រោះអស់អ្នកណាដែលតាមសាច់ឈាម នោះគិតតែខាងសាច់ឈាម តែអស់អ្នកណាដែលគិតតាមព្រះវិញ្ញាណ នោះគិតតែខាងវិញ្ញាណវិញ» (រ៉ូម ៨:៥)។ ការផ្លាស់ប្ដូរផ្នត់គំនិតដូចនេះអាចកើតមានទៅបាន ដោយសារអំណាចនៃព្រះវិញ្ញាណបរិសុទ្ធ ខណៈពេលដែលព្រះអង្គបង្រៀនយើងក្នុងសេចក្តីពិតនៃព្រះបន្ទូលព្រះ។
ការផ្លាស់ប្ដូរនេះគឺជាដំណើរការមួយ។ ជារៀងរាល់ថ្ងៃ យើងត្រូវផ្លាស់ប្រែឲ្យកាន់តែមានលក្ខណៈដូចព្រះយេស៊ូវគ្រីស្ទ។ ជាការពិតណាស់ គំនិតរបស់យើង ជីវិតយើងទាំងមូលកំពុងតែមានការផ្លាស់ប្រែឲ្យថ្មីឡើង។ យើងមិនទាន់បានផ្លាស់ប្រែទាំងស្រុងឲ្យក្លាយជាមនុស្សដែលព្រះអង្គសព្វព្រះទ័យ ប៉ុន្តែយើងមិនដូចពីមុនទេ។ ហើយនៅពេលណាគំនិតយើងស្ថិតនៅក្រោមការគ្រប់គ្រងរបស់ព្រះវិញ្ញាណ និងព្រះបន្ទូលព្រះ អ្វីៗផ្សេងទៀតនឹងមានការផ្លាស់ប្ដូរជាបន្តបន្ទាប់តាមបំណងព្រះទ័យព្រះអង្គ។ យើងនឹងបានដឹងថា ផ្លូវរបស់ព្រះ គឺជាជម្រើសល្អបំផុត ហើយក៏អរសប្បាយក្នុងការដើរតាមផ្លូវរបស់ព្រះអង្គ។ យើងគិតមុនពេលយើងធ្វើអ្វីមួយ។ យើងបដិសេធមិនព្រមឲ្យលោកីយ៍កែប្រែយើង ដោយរៀនមើលស្គាល់ផ្នត់គំនិតរបស់វា ដែលផ្អែកទៅលើការកុហក ជាជាងផ្អែកទៅលើសេចក្តីពិតនៃព្រះបន្ទូលព្រះ។
ដូចនេះ ចូរទុកចិត្តថា អំណាចនៃព្រះបន្ទូលព្រះនឹងកែប្រែចិត្តគំនិតរបស់អ្នក ហើយចូលទូលសូមព្រះវិញ្ញាណជួយឲ្យការនេះអាចកើតឡើង។ ចូរមើលឲ្យស្គាល់ល្បិចដែលលោកីយ៍ប្រើ ដើម្បីទាញនាំអ្នកឲ្យត្រាប់តាមវា ហើយចូរប្រើពេលនោះជាឱកាស ដើម្បីអនុញ្ញាតឲ្យគំនិតអ្នកមានការផ្លាស់ប្រែ ដោយប្រាជ្ញាមកពីព្រះវិញ។ ហើយចូរអនុវត្តដូចនេះ មិនមែនដោយសារអ្នកគួរតែធ្វើ តែដោយសារអ្នកចូលចិត្តធ្វើ ដ្បិតអ្នកដឹងថា «សប្បាយហើយ អស់អ្នកណាដែលរកបានប្រាជ្ញា ហើយអ្នកណាដែលខំប្រឹង ទាល់តែបានយោបល់ ដ្បិតការដែលបាន នោះវិសេសជាងបានប្រាក់ទៅទៀត ហើយកម្រៃអំពីនោះមកក៏ប្រសើរជាងមាសសុទ្ធផង...អស់ទាំងផ្លូវរបស់ប្រាជ្ញាសុទ្ធតែជាផ្លូវសោមនស្ស ហើយអស់ទាំងផ្លូវច្រកនោះក៏ជាសេចក្តីសុខដែរ» (សុភាសិត ៣:១៣-១៤, ១៧)។
ព្រះគម្ពីរសញ្ជឹងគិត៖ សុភាសិត ៣:១-១៨
គម្រោងអានព្រះគម្ពីររយៈពេល១ឆ្នាំ៖ យេរេមា ៣២-៣៣ និងម៉ាថាយ ២៦:២៦-៤៦