ព្រឹក
ជួយមនុស្សដែលគេសង្កត់សង្កិន
ដោយAmy Boucher Pye
August 8, 2025
យេរេមា ២២:១-៥
ហើយដោះអ្នកដែលត្រូវគេប្លន់ ឲ្យបានរួចពីកណ្ដាប់ដៃនៃពួកអ្នកដែលសង្កត់សង្កិននោះ។ យេរេមា ២២:៣
អ្នកស្រី យ៉ូសែហ្វ៊ីន បាត់ល័រ(Josephine Butler) ជាភរិយារបស់គ្រូគង្វាលដ៏ល្បីល្បាញ បានធ្វើយុទ្ធនាការ ទាមទារសិទ្ធិឲ្យស្ត្រី ដែលគេបានចោទប្រកាន់ថាជា “ស្ត្រីរកស៊ីផ្លូវភេទ” (ភាគច្រើនដោយអយុត្តិធម៌) គឺអ្នកដែលគេឲ្យតម្លៃទាបថោកបំផុតក្នុងសង្គម។ ដោយការជំរុញចិត្តពីសេចក្តីជំនឿដ៏រឹងមាំលើព្រះ គាត់បានប្រយុទ្ធប្រឆាំងនឹងច្បាប់ការពារជំងឺឆ្លងរបស់ប្រទេសអង់គ្លេស អស់រយៈពេលជាច្រើនឆ្នាំ ក្នុងទសវត្សរ៍ឆ្នាំ១៨៦០ ដែលបានតម្រូវឲ្យស្ត្រីទៅពិនិត្យសុខភាព តាមរបៀបដ៏សាហាវ និងធ្វើឲ្យបាត់បង់ភាពថ្លៃថ្នូរ។
នៅឆ្នាំ១៨៨៣ ក្នុងអំឡុងពេលការជជែកវែកញែក ក្នុងរដ្ឋសភា អំពីការលុបច្បាប់នេះចោល គាត់បានចូលរួមអធិស្ឋានជាមួយស្ត្រី ក្នុងព្រះវិហារវេសមីនស្ទ័រ។ គាត់មានការប៉ះពាល់ចិត្តយ៉ាងខ្លាំង នៅពេលដែលបានឃើញ “ស្ត្រីវេទនាមានសំលៀកបំពាក់កណ្តាច មកពីតំបន់អនាធិបតេយ្យ” បានចូលរួមជាមួយ “ស្ត្រីអភិជន” កំពុងអធិស្ឋាន ដោយខ្សឹកខ្សួល ទូលសូមព្រះអម្ចាស់ការពារមនុស្សដែលងាយរងគ្រោះ។ ពួកគេមានអំណរយ៉ាងខ្លាំង នៅពេលដែលគេសម្រេចលុបច្បាប់នោះចោល។
ការអំពាវនាវរបស់អ្នកស្រីយូសេហ្វ៊ីន ឲ្យប្រព្រឹត្តដោយយុត្តិធម៌ បានធ្វើឲ្យខ្ញុំនឹកចាំ អំពីពាក្យពេចន៍របស់ហោរាយេរេមា ដែលបាននាំព្រះរាជសាររបស់ព្រះ ទូលថ្វាយពួកស្តេចអាក្រក់។ ហោរាយេរេមាមានប្រសាសន៍ថា “ព្រះយេហូវ៉ាទ្រង់មានបន្ទូលដូច្នេះថា ចូរសំរេចសេចក្ដីយុត្តិធម៌ នឹងសេចក្ដីសុចរិត ហើយដោះអ្នកដែលត្រូវគេប្លន់ ឲ្យបានរួចពីកណ្ដាប់ដៃនៃពួកអ្នកដែលសង្កត់សង្កិននោះ កុំឲ្យរឹបជាន់ ឬគំហកកំហែងដល់អ្នកដទៃ ដែលមកស្នាក់នៅ ឬដល់ពួកកំព្រានឹងស្រីមេម៉ាយឡើយ”(យេរេមា ២២:៣)។ ព្រះទ្រង់សព្វព្រះទ័យនឹងការពារមនុស្ស ដែលមិនអាចការពារខ្លួនឯងទាស់ប្រឆាំងនឹងមនុស្សមានអំណាចបាន។
ព្រះអម្ចាស់ក៏អាចជំរុញចិត្តយើងឲ្យជួយអ្នកទន់ខ្សោយផងដែរ ដោយជួយយើងឲ្យមើលឃើញភាពមិនស្មើគ្នា ហើយតស៊ូមតិ និងចាត់វិធានការទាស់ប្រឆាំងអំពើអយុត្តិធម៌។ ព្រះដែលស្អប់ការគាបសង្កត់ ទ្រង់ចម្រើនកម្លាំងយើង ឲ្យស្វែងរកយុត្តិធម៌ និងការពារជនទន់ខ្សោយ។—Amy Boucher Pye
តើការដើរតាមព្រះ មានផលប៉ះពាល់យ៉ាងណា មកលើរបៀបដែលអ្នកប្រព្រឹត្តចំពោះជនទន់ខ្សោយ
និងងាយរងគ្រោះ? តើព្រះទ្រង់អាចប្រើអ្នក ឲ្យការពារអ្នកដែលគេសង្កត់សង្កិនដូចម្តេចខ្លះ?
ឱព្រះប្រកបដោយព្រះគុណ ព្រះអង្គស្រឡាញ់ និងយកព្រះទ័យទុកដាក់ ចំពោះមនុស្សទន់ខ្សោយ ក៏ដូចជាមនុស្សមានអំណាច។
សូមព្រះអង្គជួយទូលបង្គំ ឲ្យចែកចាយអំពីសេចក្តីស្រឡាញ់ និងព្រះគុណរបស់ព្រះអង្គដល់ពួកគេ។
For further study, read Walk with Me: Traveling with Jesus and Others on Life’s Road at DiscoverODB.org.
គម្រោងអានព្រះគម្ពីររយៈពេល១ឆ្នាំ : ទំនុកដំកើង ៧៤-៧៦ និង រ៉ូម ៩:១៦-៣៣
ប្រភេទ
ល្ងាច
នឹកចាំអំពីសេចក្តីមេត្តារបស់ព្រះ (សៀវភៅសេចក្ដីពិតសម្រាប់ជីវិត)
ដោយAlistair Begg
August 8, 2025
«រីឯព្រះបន្ទូលនៃព្រះយេហូវ៉ាបានមកដល់យ៉ូណាសជាកូនអ័មីថាយថា ចូរក្រោកឡើងទៅឯនីនីវេ ជាទីក្រុងធំ ហើយស្រែកប្រកាសទាស់នឹងក្រុងនោះ ពីព្រោះអំពើអាក្រក់របស់គេបានសាយឡើងនៅចំពោះមុខអញហើយ ប៉ុន្តែយ៉ូណាស លោកក្រោកឡើង រត់ទៅឯក្រុងតើស៊ីសវិញ ដើម្បីឲ្យរួចពីព្រះភក្ត្រនៃព្រះយេហូវ៉ា»(យ៉ូណាស ១:១-៣)។
ព្រះអម្ចាស់សប្បាយព្រះទ័យក្នុងការសង្គ្រោះរាស្ត្រព្រះអង្គ។
កាលព្រះអង្គបង្គាប់លោក យ៉ូណាស ជាអ្នកបម្រើឲ្យទៅទីក្រុងនីនីវេ ហើយប្រកាសព្រះបន្ទូលឲ្យទីក្រុងនេះប្រែចិត្តចេញពីការអាក្រក់ ហោរាដែលកំពុងមានចិត្តស្ទាក់ស្ទើរនេះបានទទួលស្គាល់ថា ប្រជាជននៅទីនោះអាចប្រែចិត្តចេញពីការអាក្រក់ ហើយព្រះអម្ចាស់នឹងឆ្លើយតប ដោយសេចក្តីមេត្តា (យ៉ូណាស ៤:២)។ គាត់ដឹងថា ព្រះអម្ចាស់ជា «យេហូវ៉ា គឺយេហូវ៉ាដ៏ជាព្រះទ្រង់មានព្រះហឫទ័យមេត្តាករុណា ហើយទន់សន្តោស ទ្រង់យឺតនឹងខ្ញាល់ ហើយមានសេចក្តីសប្បុរស និងសេចក្តីទៀងត្រង់ជាបរិបូរ ទ្រង់មានសេចក្តីមេត្តាករុណាដល់មនុស្សទាំងពាន់ ក៏អត់ទោសចំពោះសេចក្តីទុច្ចរិត សេចក្តីរំលង និងអំពើបាប ប៉ុន្តែទ្រង់មិនរាប់មនុស្សមានទោសទុកជាឥតទោសឡើយ»(និក្ខមនំ ៣៤:៦-៧)។ គាត់បានដឹងសេចក្តីពិតដែលថា ថ្ងៃមួយព្រះទ្រង់នឹងមានបន្ទូលតាមហោរាយេរេមាថា «នៅវេលាណាដែលអញនិយាយពីដំណើរសាសន៍ណា ឬនគរណាថា នឹងដករំលើងគេ ព្រមទាំងរំលំ ហើយបំផ្លាញផង។ បើសិនជានគរដែលអញបាននិយាយនោះ នឹងបែរចេញពីអំពើអាក្រក់របស់ខ្លួន នោះអញនឹងប្រែគំនិតចេញពីការអាក្រក់ ដែលអញបានគិតធ្វើដល់គេក្នុងវេលានោះឯង»(យេរេមា ១៨:៧-៨)។
ហោរា យ៉ូណាស ដឹងថា ព្រះអម្ចាស់មានព្រះទ័យមេត្តា តែគាត់បានបដិសេធន៍មិនព្រមស្តាប់បង្គាប់តាមព្រះរាជបញ្ជារបស់ព្រះអង្គ។ តើហេតុអ្វី? គាត់ប្រហែលជាគ្រាន់តែមិនចូលចិត្តប្រជាជននៅទីក្រុងនីនីវេ ហើយនៅសម័យនោះ គេឮល្បីថា ប្រជាជននៅទីក្រុងនីនីវេ ជាមនុស្សថ្វាយបង្គំព្រះដទៃ ពួកគេកាចសាហាវ និងមានហិង្សា ហើយជាខ្មាំងសត្រូវដ៏គួរឲ្យភ័យខ្លាចរបស់ប្រជាជនអ៊ីស្រាអែល។ ហោរា យ៉ូណាស មិនចង់ឲ្យព្រះអម្ចាស់ទុកជីវិតឲ្យពួកគេទេ។ ហេតុនេះហើយ ក្រោយមកនៅពេលដែលប្រជាជននៅទីក្រុងនីនីវេបានងាកបែរចេញពីការអាក្រក់ «ការនោះជាទីទំនាស់ចិត្តដល់យ៉ូណាសយ៉ាងក្រៃលែង ហើយលោកក៏ខឹង»(យ៉ូណាស ៤:១)។ ហោរា យ៉ូណាស យល់ឃើញថា ពួកគេសមនឹងទទួលការជំនុំជម្រះពីព្រះ។ គាត់គិតត្រូវ! ប៉ុន្តែ អរព្រះគុណព្រះអង្គ ដែលបានប្រព្រឹត្តចំពោះប្រជាជាតិ ទីក្រុង និងបុគ្គលម្នាក់ៗតាមផ្លូវរបស់ព្រះអង្គ តែមិនតាមផ្លូវយើង។ ព្រះអង្គមានសព្វព្រះទ័យនឹងបង្ហាញសេចក្តីមេត្តា គឺមិនចង់ឲ្យពួកគេវិនាសឡើយ។
សេចក្តីអាណិតដែលព្រះអង្គមានចំពោះប្រជាជននៅទីក្រុងនីនីវេ គឺបានរំឭកយើងថា ព្រះអង្គមិនសព្វព្រះទ័យឲ្យនរណាម្នាក់វិនាសទេ ហើយព្រះអង្គសព្វព្រះទ័យនឹងជួយសង្គ្រោះមនុស្ស ជាពិសេសអ្នកដែលហាក់ដូចជាសមនឹងវិនាសបំផុត (២ពេត្រុស ៣:៩)។ លោក យ៉ូណាស ចង់ប្រកាសព្រះបន្ទូល តែនៅកន្លែងណាដែលគាត់ចង់ប្រកាស និងទៅកាន់មនុស្សណាដែលគាត់ចង់ប្រកាសប្រាប់ប៉ុណ្ណោះ។ ប៉ុន្តែ ដំណឹងល្អគឺសម្រាប់មនុស្សគ្រប់ៗគ្នា គ្រប់ទីកន្លែង។ សព្វថ្ងៃនេះ ដំណឹងល្អរបស់ព្រះយេស៊ូវមិនមែនសម្រាប់តែមនុស្ស «មានអាកប្បកិរិយាល្អ» ប៉ុណ្ណោះទេ តែក៏សម្រាប់មនុស្សមានរូបសម្បត្តិ ការប្រព្រឹត្ត និងការគិតដូចយើងផងដែរ។ ជាការពិតណាស់ ព្រះយេស៊ូវបានបង្គាប់អ្នកដើរតាមព្រះអង្គថា «ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍»(ម៉ាថាយ ២៨:១៩)។
ព្រះអង្គមានសេចក្តីមេត្តាលើសលប់! ព្រះអង្គមានព្រះទ័យអាណិតនៅក្នុងការតាមជួយសង្គ្រោះមនុស្សដែលមានអំនួត រឹងទទឹង និងល្មើសក្រឹត្យវិន័យរបស់ព្រះអង្គ គឺមនុស្សដូចអ្នក និងខ្ញុំ។ ព្រះអង្គត្រាស់ហៅយើង ឲ្យមានចិត្តឧស្សាហ៍នៅក្នុងការនាំសេចក្តីសង្គ្រោះទៅដល់មនុស្សដែលកំពុងវិនាស និងមើលថែមនុស្សដែលកំពុងស្លាប់ ហើយប្រាប់ពួកគេអំពីព្រះយេស៊ូវ ជាព្រះមានចេស្ដា ដែលអាចជួយសង្គ្រោះ។1 ព្រះត្រៃឯកសព្វព្រះទ័យនឹងជួយសង្គ្រោះមនុស្សមានបាប គឺសព្វព្រះទ័យខ្លាំងល្មមនឹងយាងចុះមក ហើយសុគតជំនួសពួកគេ។ តើអ្នកមានចិត្តដូចព្រះអង្គទេ? បើអ្នកមានមែន នោះអ្នកក៏នឹងមានចិត្តចង់ឲ្យមនុស្សនៅជុំវិញអ្នកបានសង្គ្រោះផងដែរ។ ទោះពួកគេជានរណា ហើយបានធ្វើអ្វីក៏ដោយ គឺល្មមនឹងចេញទៅ ហើយចែកចាយអំពីព្រះគ្រីស្ទដល់ពួកគេ។
ព្រះគម្ពីរសញ្ជឹងគិត៖ ១កូរិនថូស ៩:១៩-២៣
គម្រោងអានព្រះគម្ពីររយៈពេល១ឆ្នាំ៖ ទំនុកតម្កើង ៧៤-៧៦ និងកិច្ចការ ២៧:១-២៦