ព្រឹក
ស្នាព្រះហស្តដ៏អស្ចារ្យរបស់ព្រះអង្គ
ដោយadamholz
September 18, 2025
យ៉ូប ៤១:១-៥,១០-១៤
តើអ្នកណាដែលឲ្យអ្វីមកអញជាមុន បានជាអញត្រូវសងគេវិញ សារពើទាំងប៉ុន្មានដែលនៅក្រោមមេឃជារបស់ផងអញទេតើ ។ យ៉ូប ៤១:១១
កាលប៉ុន្មានឆ្នាំមុន ខ្ញុំបានទទួលសំបុត្រដែលមានរូបរាងប៉ោងៗ ក្នុងប្រអប់សំបុត្រមុខផ្ទះខ្ញុំ។ ខ្ញុំក៏បានកត់សំគាល់ឃើញថា មិត្តភក្តិជិតស្និទ្ធរបស់ខ្ញុំម្នាក់ បានដាក់អាស័យដ្ឋានរបស់គាត់នៅលើប្រអប់សំបុត្រនោះ ហើយខ្ញុំក៏បានញញឹម។ ជូនកាល ចូ (JOE) ផ្ញើវត្ថុដែលខ្ញុំមិននឹកស្មានដល់។ ក្នុងសំបុត្រនោះខ្ញុំក៏បានឃើញធ្មេញរបស់ត្រីឆ្លាម មានពណ៌ត្នោតក្រមៅ ប្រវែង១២សង់ទីម៉ែត្រ។
ក្នុងសំបុត្រនោះ ចូ បានពន្យល់ថា វាគឺជាផូស៊ីលធ្មេញរបស់សត្វត្រីឆ្លាម ពីសម័យបុរេប្រវត្តិ គឺជាត្រីឆ្លាមយក្ស។ បើគេប្រៀបធៀបទំហំវានឹងត្រីឆ្លាមពណ៌សធំ នោះវាមានមាឌធំជាងជាច្រើនដង។ ខ្ញុំក៏បានព្យាយាមស្រមៃថា ថ្គាមរបស់ត្រីឆ្លាមនោះមានទំហំធំប៉ុណ្ណា បើធ្មេញរបស់វាមានប្រវែងវែងយ៉ាងនេះ។ អ្នកវិទ្យាសាស្ត្រក៏បានធ្វើការប៉ាន់ស្មានថា ថ្គាមរបស់វា ប្រហែលជាមានទំហំ ២ម៉ែត្រ គុណនឹង៣ម៉ែត្រ។ សត្វត្រីឆ្លាមនោះ ប្រាកដជាមានទំហំខ្លួនធំខ្លាំងណាស់។
ព្រះគម្ពីរប៊ីបមិនបានចែងអំពីត្រីឆ្លាមយក្សនោះទេ តែក្នុងកណ្ឌគម្ពីរយ៉ូប ព្រះទ្រង់បានពិពណ៌នា អំពីសត្វចម្លែកម្យ៉ាង។ បទគម្ពីរយ៉ូប ជំពូក៤១ បានពិពណ៌នាជាលម្អិត អំពីរូបរាង្គរបស់វា។ គឺដូចដែលព្រះទ្រង់បានប្រាប់លោកយ៉ូបថា “អញមិនទាន់ឈប់និយាយពីជើង នឹងកំឡាំងវា ឬពីរាងដ៏សមសួនរបស់វានៅឡើយ”(ខ.១២)។ “តើអ្នកណាអាចនឹងបើកមាត់វាបាន ធ្មេញវានៅព័ទ្ធជុំវិញគួរស្ញែងខ្លាច?”(ខ.១៤)។
មានតែព្រះដែលបានបង្កើតវាមកទេ ទើបអាចឆ្លើយសំណួរនេះបាន។ ត្រង់ចំណុចនេះ ព្រះទ្រង់បានរំឭកលោកយ៉ូបថា ទោះសត្វចម្លែកនោះមានមាឌធំយ៉ាងណាក៏ដោយ វាមិនអាចប្រៀបផ្ទឹមនឹងព្រះអាទិករបានទេ។ គឺដូចដែលព្រះអង្គបានមានបន្ទូលថា “សារពើទាំងប៉ុន្មានដែលនៅក្រោមមេឃជារបស់ផងអញទេតើ ”(ខ.១១)។
ខ្ញុំបានដាក់តាំងផូស៊ីលធ្មេញរបស់ត្រីឆ្លាមយក្សនោះនៅលើតុរបស់ខ្ញុំ ធ្វើជាការរំឭកអំពីព្រះចេស្តា និងភាពប៉ិនប្រសប់របស់ព្រះក្នុងការបង្កើតពួកវាមក។ ខ្ញុំមិនបាននឹកស្មានថា ខ្ញុំអាចនឹកចាំអំពីការបង្កើតរបស់ព្រះអង្គ តាមរយៈផូស៊ីលនោះឡើយ តែវាបានធ្វើឲ្យខ្ញុំគិតដល់ចារិតលក្ខណៈរបស់ព្រះ ដែលបានកម្សាន្តចិត្តខ្ញុំ នៅពេលដែលពិភពលោកហាក់ដូចជាមានរឿងជាច្រើនមិនចេះចប់មិនចេះហើយ ស្ទើរតែមិនអាចឲ្យខ្ញុំរស់នៅបាន។—ADAM R. HOLZ
តើមានស្នាព្រះហស្តណាខ្លះ ដែលបានរំឭកអ្នក អំពីលក្ខណៈដែលមានអំណាច
និងភាពប៉ិនប្រសប់របស់ព្រះអង្គ? តើការយល់ដឹងអំពីរបៀបដែលព្រះអង្គ
បង្កើតរបស់សព្វសារពើមក បានលើកទឹកចិត្តអ្នកដូចម្តេចខ្លះ?
ឱព្រះវរបិតា ស្នាព្រះហស្តរបស់ព្រះអង្គបានថ្លែងអំពីភាពអស្ចារ្យ និងព្រះចេស្តារបស់ព្រះអង្គ។
សូមព្រះអង្គជួយទូលបង្គំឲ្យទុកចិត្តព្រះអង្គ ពេលណាជីវិតហាក់ដូចជាមានការពិបាកពេក។
គម្រោងអានព្រះគម្ពីររយៈពេល១ឆ្នាំ : សុភាសិត ៣០-៣១ និង ២កូរិនថូស ១១:១-១៥
ល្ងាច
សុខុមាលភាពរបស់លោកីយ៍ (សៀវភៅសេចក្ដីពិតសម្រាប់ជីវិត)
ដោយAlistair Begg
September 18, 2025
«រួចខ្ញុំឃើញផ្ទៃមេឃថ្មី និងផែនដីថ្មី ដ្បិតផ្ទៃមេឃមុន និងផែនដីមុនបានកន្លងបាត់ទៅហើយ ក៏គ្មានសមុទ្រទៀតឡើយ» (វិវរណៈ ២១:១)។
តើយើងបានដឹងអ្វីខ្លះអំពីការយាងមកវិញរបស់ព្រះយេស៊ូវគ្រីស្ទ? ព្រះគម្ពីរបានប្រាប់ការពិតដ៏ជាក់លាក់ដោយត្រង់ៗឲ្យយើងបានដឹង។ យើងដឹងថា ព្រះយេស៊ូវនឹងយាងមកវិញដោយផ្ទាល់ ដោយមានព្រះកាយ ដែលយើងអាចមើលឃើញក្នុងសិរីល្អរបស់ព្រះអង្គ។ យើងក៏ដឹងផងដែរថា កាលបរិច្ឆេទនៃការយាងមកវិញរបស់ព្រះអង្គស្ថិតក្នុងភាពអាថ៌កំបាំងដោយព្រះអង្គនឹងយាងមកភ្លាមៗ ហើយនឹងញែកមនុស្សដែលរង់ចាំព្រះអង្គ ចេញពីមនុស្សដែលបដិសេធព្រះអង្គ។
ជាងនេះទៅទៀត សេចក្តីអ្វីដែលបានប្រកាសទៅដល់ពួកបរិសុទ្ធដែលកំពុងរងទុក្ខនៅសតវត្សរ៍ទី១ ក្នុងកណ្ឌគម្ពីរវិវរណៈក៏នៅតែជាការប្រកាសដល់យើងថា យើងមិនគួរមានការភ្ញាក់ផ្អើលចំពោះភាពវឹកវរក្នុងលោកីយ៍ឡើយ ព្រះយេស៊ូវកំពុងគ្រប់គ្រងស្ថានការណ៍ទាំងស្រុង។ អំណាចរបស់ព្រះគ្រីស្ទ ក្នុងការសោយរាជ្យ នឹងបានបង្ហាញចេញមកយ៉ាងពេញលេញ នៅពេលដែលនគររបស់ព្រះអង្គបានតាំងឡើងទាំងស្រុងជារៀងរហូត ហើយការយាងមកវិញរបស់ព្រះអង្គនឹងនាំមកនូវផ្ទៃមេឃ និងផែនដីថ្មី។
ព្រះគម្ពីរបានពិពណ៌នាថា ស្ថានសួគ៌អាចចុះមកដល់ផែនដី ក្នុងន័យថា ថ្ងៃមួយ «ទីក្រុងយេរូសាឡឹមថ្មី» និង «ចុះពីស្ថានសួគ៌មកអំពីព្រះ» (វិវរណៈ ២១:២)។ មនុស្សក្នុងសម័យទំនើប ជាពិសេសក្នុងសង្គមលោកខាងលិច មានទស្សនៈច្រើនណាស់ ដែលចម្លងតាមការពិពណ៌នានេះមិនបានគ្រប់ជ្រុងជ្រោយ។ វប្បធម៌របស់យើងមានទំនុកចិត្តពីធម្មជាតិមក បានជាគេព្យាយាមស្ដារសង្គមឡើងវិញ ដោយបន្ថែមការអប់រំ និងកម្មវិធីសង្គមច្រើនជាងមុនបន្តិច និងគិតអំពីមនុស្សម្នាក់ៗច្រើនជាមុនបន្តិច។ តែទោះជាយ៉ាងណាក៏ដោយ គ្មានកម្មវិធីរបស់មនុស្សណាដែលពិតជាអាចសម្រេចនូវការស្អាងឡើងវិញ ដែលពិភពលោករបស់យើងត្រូវការឡើយ។ ការប្រឹងប្រែងរបស់មនុស្សអាចធ្វើឲ្យអ្វីៗល្អប្រសើរ តែមិនអាចធ្វើឲ្យល្អឥតខ្ចោះបានទេ។ ស្ថានសួគ៌នឹងមិនចុះមកផែនដីឡើយ ទាល់តែព្រះយេស៊ូវបានយាងមកវិញជាមុនសិន។ ជីវិតទាំងអស់កំពុងជាប់នៅក្នុងចំណងរបស់បាប ក្នុងពេលសព្វថ្ងៃ ហើយមានតែព្រះទេ ដែលអាចរំដោះជីវិតទាំងអស់នោះបាន ខណៈពេលដែលរាស្ត្ររបស់ព្រះអង្គក្រាបនៅពីមុខកូនចៀម ហើយសរសើរតម្កើងព្រះអង្គ។
ក្នុងពេលបច្ចុប្បន្ន យើងកំពុងរស់នៅជាជននិរទេសក្នុងទឹកដីបរទេស។ យើងកំពុងរស់នៅក្នុងលោកីយ៍ ដែលទាស់ប្រឆាំងនឹងព្រះគ្រីស្ទ ព្រះបន្ទូលរបស់ព្រះអង្គ និងជីវិតដែលស្តាប់បង្គាប់ព្រះអង្គ។ ក្នុងនាមយើងជាអ្នកជឿ យើងជួបការល្បួងឲ្យរត់គេច ហើយលាក់ខ្លួន ហើយជួបជុំគ្នាជាក្រុមតូចជាមួយអ្នកជឿដទៃទៀត ហើយមិនចង់ខ្វល់អំពីលោកីយ៍ទេ។ ប៉ុន្តែ ដូចដែលហោរា យេរេមា បានប្រាប់ពួកឈ្លើយសឹកនៅចក្រភពបាប៊ីឡូនឲ្យស្វែងរកសុខុមាលភាព សម្រាប់ទីក្រុងដែលពួកគេកំពុងរស់នៅជាយ៉ាងណា (យេរេមា ២៩:៧) នោះយើងក៏ត្រូវស្វែងរកសុខុមាលភាពសម្រាប់ពិភពលោកដែលយើងកំពុងរស់នៅផងដែរ។ ទោះមិនមែនជាកម្មសិទ្ធិរបស់វាក៏ដោយ ការនេះតម្រូវឲ្យយើងរស់នៅក្នុងលោកីយ៍នេះដោយនាំគេឲ្យស្គាល់នគរព្រះ។
យើងអាចមានទំនុកចិត្ត នៅក្នុងការងាកចេញពីលោកីយ៍នេះបាន ទាល់តែយើងអរសប្បាយចំពោះរឿងនៃជ័យជម្នះរបស់ព្រះគ្រីស្ទ ដែលបានជាប់ឆ្កាង មានព្រះជន្មរស់ឡើងវិញ កំពុងគ្រងរាជ្យ ហើយថ្ងៃមួយ នឹងវិលត្រឡប់មកវិញ។ ការសង្ឃឹមថា ព្រះអង្គនឹងយាងមកវិញ ហើយយើងនឹងមានជីវិតអស់កល្បក្នុងព្រះវត្តមានព្រះអង្គ គឺជាការបណ្តាលចិត្តដ៏ឥតខ្ចោះ ឲ្យរស់នៅក្នុងជីវិតដែលមានសេចក្តីបរិសុទ្ធជាប្រចាំ និងផ្សាយដំណឹងល្អដោយចិត្តឧស្សាហ៍ដោយនូវព្រះនាមព្រះអង្គ។ ចូរយើងមើលទៅមុខដោយភ្នែកនៃជំនឿទៅរកការយាងមកវិញរបស់ព្រះអង្គ ហើយចេញទៅរស់នៅ ដើម្បីសុខុមាលភាពរបស់មនុស្សនៅជុំវិញអ្នក នៅថ្ងៃនេះ។
ខគម្ពីរសញ្ជឹងគិត៖ ១កូរិនថូស ១៥:៥០-៥៨
គម្រោងអានព្រះគម្ពីររយៈពេល១ឆ្នាំ៖ អេម៉ុស ៤-៦ និងយ៉ូហាន ៧:២៨-៥៣