ព្រឹក
រកបានសន្តិភាពនៅក្នុងព្រះគ្រីស្ទ
ដោយKaren Huang
September 21, 2025
រ៉ូម ៥:១-១១
ដូច្នេះ ដែលយើងរាល់គ្នាបានរាប់ជាសុចរិត ដោយការជឿ នោះឈ្មោះថាយើងបានមេត្រីនឹងព្រះ ដោយសារព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាហើយ។ រ៉ូម ៥:១
កាលខ្ញុំរួមដំណើរជាមួយមិត្តភក្តិខ្ញុំម្នាក់ទៅកន្លែងធ្វើសក់ នៅថ្ងៃខួបកំណើតរបស់គាត់ យើងមានចិត្តរីករាយ ចំពោះការស្វាគមន៍ដែលយើងបានទទួល។ នៅទីនោះ មានភ្លេងកំដរអារម្មណ៍ និងការស្វាគមន៍ផ្ទាល់ខ្លួន ចូលកន្លែងធ្វើសក់ដែលមានបរិយាកាសស្ងាត់ល្អ និងមានពន្លឺភ្លឺល្មម។ បទពិសោធន៍ដែលយើងទទួលបាននៅពេលនោះ មានភាពស្ងប់សុខ ស្ងាត់ស្ងៀម និងមានការសម្រាក។ ទោះជាយ៉ាងណាក៏ដោយ ខ្ញុំត្រូវតែទប់សំណើច ចំពោះពាក្យស្លោកដែលគេបានដាក់តាំងនៅលើតុ ដែលប្រកាសថា “សេវាកម្មថែទាំសក់របស់យើងខ្ញុំផ្តល់ជូនលោកអ្នក លើសពីសក់ដែលស្រស់ស្អាត តែក៏បានផ្តល់ឲ្យលោកអ្នកនូវសន្តិភាពក្នុងចិត្តផងដែរ”។
យើងដឹងថា ផលិតផលថែរក្សាសក់ មិនផ្តល់ឲ្យយើងនូវសន្តិភាពក្នុងចិត្តដ៏ស្ថិតស្ថេរនោះទេ តែយើងច្រើនតែស្វែងរកភាពធូរស្រាលជាបណ្ដោះអាសន្ន នៅពេលដែលជីវិតរបស់យើង មានពេញដោយភាពតប់ប្រមល់។ តាមពិត សន្តិភាពពិតប្រាកដមិនកើតចេញពីអ្វីមួយនោះទេ តែចេញពីអង្គបុគ្គលម្នាក់។ កាលសាវ័កប៉ុលកំពុងលើកទឹកចិត្តអ្នកជឿព្រះយេស៊ូវ នៅទីក្រុងរ៉ូម គាត់បានក្រើនរំឭកពួកគេថា “ដូច្នេះ ដែលយើងរាល់គ្នាបានរាប់ជាសុចរិត ដោយការជឿ នោះឈ្មោះថាយើងបានមេត្រីនឹងព្រះ ដោយសារព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាហើយ”(រ៉ូម ៥:១)។ អំពើបាបធ្វើឲ្យយើងដាច់ចេញពីព្រះ តែការលះបង់ព្រះជន្មរបស់ព្រះគ្រីស្ទដើម្បីលោះបាបយើង បានបើកផ្លូវឲ្យយើងមានទំនាក់ទំនងជាមួយព្រះអង្គ(៥:៩-១០)។ ព្រះយេស៊ូវប្រទានសន្តិភាពសម្រាប់ថ្ងៃនេះ និងសន្តិភាពអស់កល្បជានិច្ច ដោយបើកផ្លូវឲ្យយើងចូលទៅក្នុងព្រះគុណរបស់ព្រះអង្គ តាមរយៈសេចក្តីជំនឿ និង “សេចក្ដីសង្ឃឹមដល់សិរីល្អនៃព្រះ”(ខ.២) ហើយមានក្តីសង្ឃឹម ទោះមានទុក្ខលំបាកនៅផែនដីយ៉ាងណាក៏ដោយ(ខ.៣-៤)។ យើងមានសន្តិភាពនៅក្នុងព្រះអង្គ គឺមិនមែនតែក្នុងផ្លូវអារម្មណ៍ប៉ុណ្ណោះទេ តែជាអំណោយដែលយើងទទួលបាន តាមរយៈសេចក្តីជំនឿលើព្រះយេស៊ូវ។ ទោះយើងមានអារម្មណ៍ថា យើងមានភាពជិតស្និទ្ធនឹងព្រះឬអត់ សន្តិភាពរបស់ព្រះអង្គ តែងតែមានសម្រាប់យើងជានិច្ច ទោះនៅកន្លែងអ៊ុតសក់ ឬនៅមន្ទីរពេទ្យក្តី ក្នុងពេលដែលមានភាពស្ងប់ស្ងាត់ ឬពេលវឹកវរក៏ដោយ។—KAREN PIMPO
តើអ្នកចង់ស្វែងរកកន្លែងសុខស្រួលបណ្ដោះអាសន្ន ជាជាងស្វែងរកសន្តិភាព
នៅក្នុងព្រះ នៅពេលណា? តើការនឹកចាំអំពីការលះបង់របស់ព្រះយេស៊ូវ
បានអនុញ្ញាតឲ្យអ្នកសម្រាកក្នុងព្រះអង្គនៅថ្ងៃនេះ ដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការប្រទាន
សន្តិភាពដ៏ស្ថិតស្ថេរ តាមរយៈការលះបង់របស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : សាស្តា ៧-៩ និង ២កូរិនថូស ១៣
ល្ងាច
ព្រះពរនៃការបៀតបៀន (សៀវភៅសេចក្ដីពិតសម្រាប់ជីវិត)
ដោយAlistair Begg
September 21, 2025
«មានពរហើយ កាលណាមនុស្សនឹងស្អប់អ្នករាល់គ្នា ព្រមទាំងកាត់កាល់ ត្មះតិះដៀល ហើយចោលឈ្មោះអ្នករាល់គ្នាចេញ ទុកដូចជាអាក្រក់ ដោយព្រោះកូនមនុស្ស។ ចូរអ្នករាល់គ្នាអរសប្បាយឡើងនៅថ្ងៃនោះ ហើយលោតកញ្ឆេងចុះ ដ្បិតមើល អ្នករាល់គ្នាមានរង្វាន់ជាយ៉ាងធំ នៅឯស្ថានសួគ៌ ឯពួកឰយុកោរបស់គេ ក៏បានប្រព្រឹត្តចំពោះពួកហោរាពីដើមយ៉ាងដូច្នោះដែរ» (លូកា ៦:២២-២៣)។
មនុស្សស្ទើរគ្រប់គ្នាបានយល់ឃើញថា ការដែលអ្នកដទៃចូលចិត្តយើងឬអត់ មានសារៈសំខាន់ចំពោះយើង។ នេះជាការពិតមែន។ ហេតុនេះហើយ គេមានការភ្ញាក់ផ្អើលនៅពេលដែលព្រះយេស៊ូវបានបង្រៀន ដោយការសង្កត់ធ្ងន់អំពីព្រះពរដែលយើងនឹងបានទទួល នៅពេលដែលអ្នកដទៃស្អប់យើង មិនរាប់រកយើង និងជេរប្រទេចយើងដោយសារកូនមនុស្ស។
ការថ្កោលទោសនេះកើតមាន ដោយសារយើងមានទំនាក់ទំនងជាមួយព្រះយេស៊ូវ។ នៅពេលណាយើងឈរជាមួយព្រះគ្រីស្ទ លោកីយ៍នឹងបដិសេធយើង។ ព្រះយេស៊ូវមានបន្ទូលអំពីរឿងពិតនេះ ដែលនឹងកើតឡើងចំពោះអ្នកជឿម្នាក់ៗ។ ព្រះយេស៊ូវក៏បានបកស្រាយអំពីសេចក្តីពិតនេះ ក្នុងបទគម្ពីរផ្សេងទៀតផងដែរ។ ឧទាហរណ៍៖ នៅពេលយប់មុនពេលព្រះអង្គសុគត ព្រះអង្គបានរំឭកអ្នកដើរតាមព្រះអង្គថា លោកីយ៍បានស្អប់ព្រះអង្គមុននឹងស្អប់ពួកគេ ហើយអ្នកបម្រើព្រះអង្គ ត្រូវតែរំពឹងថា ពួកគេនឹងបានជួបការបៀតបៀនដូចព្រះអង្គផងដែរ (យ៉ូហាន ១៥:១៨-២០)។
អ្នកប្រហែលជួបការបៀតបៀនដូចនេះនៅសាលារៀន។ អ្នកប្រហែលជាប្រកាន់គោលជំហរតាមព្រះគម្ពីរ ហើយភ្លាមៗនោះ អ្នកក៏បានដាច់ចេញពីមិត្តភក្តិរបស់អ្នក។ អ្នកប្រហែលជាបានភ្លក់រស់ជាតិការឈឺចាប់ នៅពេលមិត្តភក្តិមិនរាប់រក ឬគេមិនឲ្យតម្លៃនៅកន្លែងធ្វើការ ដោយសារអ្នកបានពន្យល់គេថា ព្រះយេស៊ូវជានរណា ហេតុអ្វីព្រះអង្គសុគត។ អ្នកប្រហែលជាបានជួបការឈឺចាប់ នៅពេលសមាជិកគ្រួសារបដិសេធអ្នក ដោយសារអ្នកជឿព្រះយេស៊ូវ។ បើអ្នកបានប្រកាន់គោលជំហរ ថ្វាយព្រះគ្រីស្ទ នោះគេក៏ចាប់ផ្តើមស្អប់អ្នក ហើយអ្នកស្ទើរតែមិនអាចអត់ទ្រាំការប្រមាថ។ ការប្រមាថ ឬការមើលងាយដែលយើងទទួលរង ដោយសារយើងស្តាប់បង្គាប់ព្រះ នាំឲ្យយើងមានអារម្មណ៍ពិបាក ឬមិនសប្បាយចិត្ត។ ជាការពិតណាស់ ការបដិសេធន៍នាំឲ្យយើងឈឺក្បាលយ៉ាងខ្លាំង។ ដូចនេះ តើយើងអាចស្វែងរកព្រះពរ និងការកម្សាន្តចិត្តក្នុងពេលដ៏ពិបាកដូចនេះដោយរបៀបណា?
យើងត្រូវប្រកាន់ខ្ជាប់តាមសេចក្តីពិត ដូចដែលព្រះយេស៊ូវបានមានបន្ទូលថា ពេលណាលោកីយ៍ស្អប់យើងដោយសារយើងស្មោះត្រង់ចំពោះព្រះរាជបុត្រានៃព្រះ នោះយើងជាមនុស្សមានពរ។ អាចនិយាយម្យ៉ាងទៀតថា ការធ្វើទុក្ខបុកម្នេញប្រភេទនេះ ជាភស្តុតាងបញ្ជាក់ថា យើងមានជំនឿពិតប្រាកដ និងមានទំនាក់ទំនងជាមួយព្រះអម្ចាស់។ ជាងនេះទៅទៀត ព្រះយេស៊ូវបានសន្យាថា បើយើងទទួលស្គាល់ព្រះអង្គនៅមុខមនុស្ស ព្រះអង្គក៏នឹងទទួលស្គាល់យើងនៅចំពោះព្រះវរបិតានៃស្ថានសួគ៌ផងដែរ (ម៉ាថាយ ១០:៣២)។
បុរស ឬស្ត្រីដែលរស់នៅក្នុងជីវិតបរិសុទ្ធដែលត្រៀមខ្លួនជាស្រេច ដើម្បីចែកចាយ និងស្តាប់បង្គាប់តាមព្រះបន្ទូល ដោយចិត្តក្លាហាន និងបដិសេធមិនព្រមចាក់ខ្សែក្នុងការជ្រើសរើសរវាងជីវិតដែលស្តាប់បង្គាប់ និងជីវិតដែលមានគេរាប់អានច្រើន ពួកគេនឹងមានការប៉ះទង្គិចនឹងមនុស្សដែលមិនជឿព្រះ និងការទាស់ប្រឆាំងរបស់លោកីយ៍។ តើព្រះបានត្រាស់ហៅអ្នកឲ្យប្រឈមមុខដាក់ការបដិសេធន៍ ដើម្បីចែកចាយអំពីព្រះគ្រីស្ទ ឬរស់នៅថ្វាយព្រះអង្គទេ? ចូរកុំអស់សង្ឃឹមឡើយ! ផ្ទុយទៅវិញ ចូរយើងឆ្លើយតប ចំពោះការមួលបង្កាច់ ឬសេចក្តីសម្អប់ដែលគេមានចំពោះយើង ដោយសារដំណឹងល្អ ហើយអរសប្បាយ ព្រោះយើងនឹងបានទទួលរង្វាន់ដ៏ធំឧត្តមនៅស្ថានសួគ៌។ អ្វីដែលលោកីយ៍អាចផ្តល់ឲ្យយើងមិនអាចប្រៀបផ្ទឹមនឹងរង្វាន់នេះបានទេ។
ខគម្ពីរសញ្ជឹងគិត៖ ដានីយ៉ែល ៣
គម្រោងអានព្រះគម្ពីររយៈពេល១ឆ្នាំ៖ អេសេគាល ៣-៤ និងយ៉ូហាន ៩:១-២៣