ព្រឹក
មើលព្រះអង្គមិនស្គាល់
ដោយSheridan Voysey
September 22, 2025
យ៉ូហាន ១៤:៨-១៤
ភីលីពអើយ ខ្ញុំបាននៅជាមួយនឹងអ្នករាល់គ្នាជាយូរដល់ម្ល៉េះ ហើយអ្នកមិនទាន់ស្គាល់ខ្ញុំឬ? យ៉ូហាន ១៤:៩
លោករីឆាត គ្រីហ្វហ្វ៊ីន(RICHARD GRIFFIN) គឺជាមន្ត្រីប៉ូលិសផ្ទាល់ខ្លួន របស់ក្សត្រីអេលីហ្សាប៊ែតទី២ អស់រយៈពេល១៤ឆ្នាំ។ ថ្ងៃមួយ ក្នុងការរួមដំណើរព្រះនាង ទៅកម្សាន្តនៅលើតំបន់កូនភ្នំ នៅក្បែរប្រាសាទបាលម៉ូរ៉ល ពួកគេក៏បានជួបទេសចរណ៍អាមេរិក២នាក់។ ពួកគេក៏បានសួរទេសចរណ៍ទាំងនោះថា “តើអ្នកទាំងពីរធ្លាប់ជួបក្សត្រីអេលីហ្សាប៊ែតទី២ទេ?” ពេលនោះពួកគេមើលមិនស្គាល់ក្សត្រីអេលីហ្សាប៊ែត ដែលមានសំលៀកបំពាក់ជារាស្រ្តសាមញ្ញនោះទេ។ ពួកគេក៏បានឆ្លើយថា “ខ្ញុំមិនដែលបានជួបទេ” ព្រះនាងក៏បានប្រាប់ពួកគេថា “ប៉ុន្តែ លោករីឆាត បានជួបព្រះនាងជាទៀងទាត់!” ពួកគេមានអារម្មណ៍រំភើបពេលដែលបានដឹងថា លោករីឆាតមានទំនាក់ទំនងជិតស្និទ្ធជាមួយក្សត្រីអេលីហ្សាប៊ែត ដូចនេះ ពួកគេក៏បានហុចកាំមីរ៉ាឲ្យទៅព្រះនាង ដើម្បីសូមឲ្យព្រះនាងថតរូបពួកគេជាមួយលោករីឆាត ដោយមិនបានថតរូបជាមួយព្រះនាងទេ។
នេះមិនមែនជាលើកដំបូង ដែលមនុស្សម្នាក់មើលមិនស្គាល់បុគ្គលដ៏ល្បីល្បាញម្នាក់ នៅពេលដែលបានជួបមុខផ្ទាល់។ កាលលោកយ៉ាកុបបានជួបព្រះអម្ចាស់ ក្នុងសុបិន្ដ នៅក្រុងបេតអ៊ែល គាត់ក៏បាននិយាយថា “ពិតប្រាកដជាព្រះយេហូវ៉ាទ្រង់គង់នៅទីនេះហើយ តែអញមិនបានដឹងទេ”(លោកុប្បត្តិ ២៨:១៦)។ ហើយនៅពេលដែលសាវ័កភីលីពបានទូលសូមព្រះយេស៊ូវ ឲ្យបង្ហាញព្រះវរបិតាឲ្យគាត់បានឃើញ ព្រះយេស៊ូវក៏បានឆ្លើយថា “ភីលីពអើយ ខ្ញុំបាននៅជាមួយនឹងអ្នករាល់គ្នាជាយូរដល់ម្ល៉េះ ហើយអ្នកមិនទាន់ស្គាល់ខ្ញុំឬ អ្នកណាដែលឃើញខ្ញុំ នោះក៏បានឃើញព្រះវរបិតាដែរ ចុះធ្វើដូចម្ដេចបានជាអ្នកថា សូមបង្ហាញឲ្យឃើញព្រះវរបិតាផងដូច្នេះ”(យ៉ូហាន ១៤:៩)។ នៅថ្ងៃនោះ ពួកសាវ័កចង់ឃើញព្រះវរបិតា តែមិនបានដឹងទេថា ព្រះយេស៊ូវនិងព្រះវរបិតា គឺតែមួយទេ(១០-១១)។។
គេមិនតែងតែស្គាល់ព្រះយេស៊ូវជានរណាពិតប្រាកដនោះទេ គឺមិនខុសពីក្សត្រីអេលីហ្សាប៊ែតនៅថ្ងៃនោះឡើយ។ ព្រះអង្គលើសពី “គ្រូដែលមានប្រាជ្ញាលើសគេ” ឬ “អ្នកដឹកនាំក្រមសីលធម៌ដ៏អស្ចារ្យ” និយាយរួម ព្រះអង្គគឺជាព្រះដែលបានចាប់កំណើតជាមនុស្ស និងជាស្តេចនៃលោកិយ(១:១៤ ១៨:៣៦)។ បើសិនយើងជាពួកគេវិញ យើងក៏មានការភ្ញាក់ផ្អើលដែរ នៅពេលដែលបានជួបបុគ្គលដ៏ល្បីល្បាញហើយ តែមើលមិនស្គាល់។—SHERIDAN VOYSEY
បើអ្នកដើរកម្សាន្តបានជួបព្រះយេស៊ូវដោយផ្ទាល់ តែអ្នកនឹងនិយាយអ្វីទៅកាន់ព្រះអង្គ?
តើអ្នកយល់ឃើញថា ព្រះអង្គជានរណា?
ឱព្រះយេស៊ូវ ទូលបង្គំសូមសរសើរដំកើងព្រះអង្គ ដែលបានធ្វើជាស្តេចលើអស់ទាំងស្តេច
ព្រះអម្ចាស់លើអស់ទាំងព្រះអម្ចាស់ និងលើសពីការយល់ដឹងរបស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : សាស្តា ១០-១២ និង កាឡាទី ១
ល្ងាច
ច្បាប់នៃសេចក្តីស្រឡាញ់ (សៀវភៅសេចក្ដីពិតសម្រាប់ជីវិត)
ដោយAlistair Begg
September 22, 2025
«ខ្ញុំប្រាប់អ្នករាល់គ្នា ដែលកំពុងស្តាប់ថា ចូរអ្នករាល់គ្នាស្រឡាញ់ពួកខ្មាំងសត្រូវ ហើយប្រព្រឹត្តល្អនឹងពួកអ្នក ដែលស្អប់អ្នករាល់គ្នាវិញ» (លូកា ៦:២៧)។
ពេលអ្នកអានព្រះគម្ពីរ ដែលឃើញការពិពណ៌នាអំពីជំនឿរបស់គ្រីស្ទបរិស័ទ ហើយអ្នកមើលមកខ្លួនឯង តើអ្នកធ្លាប់ឆ្ងល់ទេថា អ្នកជាគ្រីស្ទបរិស័ទពិតប្រាកដឬមិនមែន? ខ្ញុំក៏ធ្លាប់ឆ្ងល់ដូចនេះដែរ។
ការធានាថា យើងជាគ្រីស្ទបរិស័ទ ឬព្រះស្រឡាញ់យើង មិនផ្តេកផ្តួលទៅលើសមត្ថភាពរបស់យើង ក្នុងការរស់នៅតាមគោលការណ៍ណាមួយរបស់គ្រីស្ទបរិស័ទនោះទេ ផ្ទុយទៅវិញ ការធានាទាំងពីរនេះពឹងផ្អែកទៅលើការអ្វីដែលព្រះគ្រីស្ទបានធ្វើសម្រេចដើម្បីយើង នៅលើឈើឆ្កាង។ ទោះយ៉ាងនេះក៏ដោយ ក៏ព្រះគម្ពីរបានបង្រៀនយើងឲ្យរកមើលភស្តុតាងនៃសេចក្តីសង្គ្រោះរបស់យើងក្នុងពេលបច្ចុប្បន្នផងដែរ។ បើយើងជាកូនរបស់ព្រះវរបិតាមែន យើងមានកាតព្វកិច្ចបង្ហាញសេចក្តីស្រឡាញ់ដល់អ្នកដទៃ តាមគំរូសេចក្តីស្រឡាញ់ដែលព្រះយេស៊ូវមានចំពោះយើង។
ព្រះយេស៊ូវបានត្រាស់ហៅយើងឲ្យស្រឡាញ់អ្នកដទៃ ដោយមិនផ្អែកទៅលើភាពទាក់ទាញ គុណសម្បត្តិ ឬភាពគួរឲ្យស្រឡាញ់របស់ពួកគេនោះទេ។ យើងដឹងថា ព្រះអង្គបានស្រឡាញ់យើង មិនមែនដោយសារយើងបានកែប្រែការប្រព្រឹត្តរបស់យើង ឬយើងសមនឹងឲ្យព្រះអង្គចាប់អារម្មណ៍ ឬក៏យើងបានបើកចំហចិត្ត ឬមួយមានប្រយោជន៍ចំពោះព្រះអង្គនោះទេ។ កត្តាទាំងអស់នេះសុទ្ធតែមិនបានបណ្តាលឲ្យព្រះអង្គស្រឡាញ់យើងទេ។ ព្រោះ «តែឯព្រះទ្រង់សំដែងសេចក្តីស្រឡាញ់របស់ទ្រង់ ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង» (រ៉ូម ៥:៨)។
សេចក្តីស្រឡាញ់គឺជាខ្នាតរង្វាស់ល្អបំផុតសម្រាប់ជំនឿរបស់យើង គឺបានឆ្លុះបញ្ចាំងអំពីសេចក្តីស្រឡាញ់ដែលយើងបានទទួលជាបរិបូរពីព្រះអង្គ។ យើងត្រូវមានសេចក្តីស្រឡាញ់ អាហ្កាពេ ជាសេចក្តីស្រឡាញ់គ្មានលក្ខខណ្ឌ និងមានការលះបង់ ព្រោះបានបង្ហាញចារិកលក្ខណៈរបស់ព្រះ និងអ្វីគ្រប់យ៉ាងដែលព្រះអង្គបានធ្វើសម្រាប់យើង។ យើងត្រូវមានសេចក្តីស្រឡាញ់ដូចនេះ ចំពោះខ្មាំងសត្រូវរបស់យើង មិនមែនដោយសារយើងមិនស្គាល់គេច្បាស់ តែដោយសារយើងមើលទៅសេចក្តីស្រឡាញ់របស់ព្រះអង្គ។ ព្រះយេស៊ូវមានបន្ទូលថា ពេលណាយើងស្គាល់ធាតុពិតរបស់អ្នកដទៃ គឺមើលឃើញចំណុចអាក្រក់ និងកាចសាហាវ បណ្តាសា សេចក្តីសម្អប់របស់ពួកគេ ព្រមទាំងឃើញបំណុលដែលពួកគេមិនព្រមសងយើង យើងត្រូវទទួលស្គាល់ការពិតនោះ រួចហើយស្រឡាញ់ពួកគេ។ ព្រះយេស៊ូវមានបន្ទូលថា ព្រះអង្គសព្វព្រះទ័យឲ្យយើងស្រឡាញ់សត្រូវរបស់យើង ទោះយើងបានឃើញចំណុចអាក្រក់ទាំងនេះហើយក៏ដោយ។ តាមលក្ខណៈធម្មជាតិរបស់យើង យើងមិនអាចបង្ហាញសេចក្តីស្រឡាញ់យ៉ាងដូចនេះបានទេ។ ប៉ុន្តែ ចូរពិចារណាអំពីការផ្លាស់ប្តូរដែលយើងអាចផ្តល់ឲ្យវប្បធម៌យើង បើសិនជាយើងបានត្រៀមខ្លួន ដើម្បីបង្ហាញសេចក្តីស្រឡាញ់តាមគំរូព្រះគ្រីស្ទក្នុងការរស់នៅជារៀងរាល់ថ្ងៃ និងតាមរបៀបខុសពីធម្មតា គឺសេចក្តីស្រឡាញ់ដែលព្យាយាមធ្វើអ្វីដែលល្អបំផុត សម្រាប់អ្នកដែលទាស់ប្រឆាំងនឹងយើង។ ការនេះនឹងនាំមកនូវការផ្លាស់ប្តូរយ៉ាងពិតប្រាកដ។
ខគម្ពីរសញ្ជឹងគិត៖ កិច្ចការ ៩:១០-២៨
គម្រោងអានព្រះគម្ពីររយៈពេល១ឆ្នាំ៖ អេសេគាល ៥-៧ និងយ៉ូហាន ៩:២៤-៤១