ព្រឹក
ព្រះចេស្តានៃការមានព្រះជន្មរស់ឡើងវិញ
ដោយNancy Gavilanes
September 29, 2025
យ៉ូហាន ១១:៣៨-៤៤
កាលទ្រង់មានបន្ទូលដូច្នេះហើយ ក៏បន្លឺវាចាថា ឡាសារអើយ ចូរចេញមក នោះអ្នកដែលបានស្លាប់ ក៏ចេញមក។ យ៉ូហាន ១១:៤៣-៤៤
អ្នកទស្សនាការប្រកួតបាល់ទាត់មានការភ្ញាក់ផ្អើល នៅពេលដែលលោកដាម៉ា ហាមលីន(DAMAR HAMLIN) ជាកីឡាករក្នុងក្រុមបាហ្វូឡូ ប៊ីលស៍ បានដួលនៅក្នុងទីលានប្រកួត ក្នុងការផ្សាយផ្ទាល់របស់ទូរទស្សន៍ បន្ទាប់ពីគាត់បានបំពេញតួនាទីជាខ្សែការពារជាធម្មតា ក្នុងខែមករា ឆ្នាំ២០២៣។ កីឡាករអាយុ២៤ឆ្នាំរូបនោះ ស្រាប់តែគាំងបេះដូងភ្លាមៗ។ បេះដូងគាត់បានឈប់លោត តែក្រុមគ្រូពេទ្យបានជួយឲ្យវាមានដំណើរការឡើងវិញ កាលគាត់កំពុងដេកដួលនៅទីលានប្រកួតនៅឡើយ។ អ្វីដែលគួរឲ្យភ្ញាក់ផ្អើលនោះ បន្ទាប់ពីលោកហាមលីន បានគាំងបេះដូង ហើយត្រូវបានគេជួយឲ្យដឹងខ្លួនវិញ បីខែក្រោយមក គ្រូពេទ្យក៏បានបញ្ជាក់ច្បាស់ថា គាត់អាចចូលរួមប្រកួតកីឡាបាល់ទាត់ជាធម្មតាឡើងវិញ។
លោកហាមលីនបានលើកឡើងថា គាត់មានការដឹងគុណព្រះ និងក្រុមគ្រួពេទ្យ ដែលបានសង្គ្រោះជីវិតគាត់។ គាត់មានគម្រោងបន្តលើកទឹកចិត្តអ្នកដទៃ។ ក្នុងបទគម្ពីរយ៉ូហាន ជំពូក១១ លោកឡាសា បានភ្ញាក់ដឹងខ្លួនឡើងវិញ តាមរបៀបដែលគួរឲ្យកត់សំគាល់ជាងនេះទៀត។
នៅពេលដែលព្រះយេស៊ូវមកដល់ភូមិបេថានី លោកឡាសាបានស្លាប់រយៈពេល៤ថ្ងៃហើយ។ បងស្រីរបស់គាត់ គឺនាងម៉ារា និងនាងម៉ាថា ដែលកំពុងសោកសង្រេង ក៏បានឃើញព្រះយេស៊ូវបង្ហាញព្រះចេស្តាមកលើសេចក្តីស្លាប់ ហើយក៏បានដឹងថា ព្រះអង្គគឺជា “សេចក្តីរស់ឡើងវិញ និងជាជីវិត”(យ៉ូហាន ១១:២៥)។ ព្រះអង្គមានបន្ទូលហៅគាត់ថា “ឡាសារអើយ ចូរចេញមក”។ នោះអ្នកដែលបានស្លាប់ ក៏ចេញមក មានទាំងសំពត់ស្នបរុំជាប់នៅជើងដៃផង ហើយមានកន្សែងគ្របមុខដែរ(ខ.៤៣-៤៤)។
យើងក៏ជាស្មរបន្ទាល់រស់នៃព្រះចេស្តានៃការមានព្រះជន្មរស់ឡើងវិញរបស់ព្រះគ្រីស្ទផងដែរ។ កាលពីមុន យើងក៏ស្លាប់ក្នុងបាប តែយើងបានរស់ក្នុងព្រះគ្រីស្ទ(រ៉ូម ៦:១-១១)។ ក្នុងនាមយើងជាអ្នកជឿ ព្រះវិញ្ញាណដែលបានប្រោសព្រះយេស៊ូវឲ្យមានព្រះជន្មរស់ឡើងវិញ ទ្រង់ក៏គង់នៅក្នុងយើងផងដែរ(៨:១០-១១)។ ចូរយើងទទួលការលើកទឹកចិត្តពីសេចក្តីពិតនេះ។ យើងនឹងស្លាប់ខាងសាច់ឈាម នៅថ្ងៃណាមួយ តែមិនស្លាប់ជារៀងរហូតទេ។ ព្រះអង្គបានសន្យាថា នឹងប្រទានជីវិតអស់កល្ប សម្រាប់រស់នៅជាមួយព្រះយេស៊ូវជារៀងរហូត។—NANCY GAVILANES
តើអំណោយនៃជីវិតអស់កល្បបានផ្តល់ឲ្យអ្នកនូវក្តីសង្ឃឹមយ៉ាងណាខ្លះ?
តើព្រះចេស្តានៃការមានព្រះជន្មរស់ឡើងវិញរបស់ព្រះយេស៊ូវ បានលើកទឹកចិត្តអ្នកដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ព្រះចេស្តានៃការមានព្រះជន្មរស់ឡើងវិញរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : អេសាយ ៧-៨ និង អេភេសូរ ២
ល្ងាច
អ្នកគង្វាលដែលមានសេចក្តីអាណិត (សៀវភៅសេចក្ដីពិតសម្រាប់ជីវិត)
ដោយAlistair Begg
September 29, 2025
«កាលព្រះអម្ចាស់បានឃើញ នោះទ្រង់មានព្រះហឫទ័យក្ដួលអាណិតអាសូរដល់គាត់ណាស់ ក៏មានព្រះបន្ទូលថា កុំយំអី រួចទ្រង់យាងចូលទៅពាល់ក្តារមឈូស ឯពួកអ្នកសែងក៏ឈប់ ហើយទ្រង់មានព្រះបន្ទូលថា អ្នកកំឡោះអើយ ខ្ញុំបង្គាប់អ្នកថា ចូរក្រោកឡើង» (លូកា ៧:១៣-១៤)។
ការប្រកាសអំពីការមកដល់នៃនគរព្រះ មិនបានផ្ដោតទៅលើជ័យជម្នះគួរឲ្យស្ញប់ស្ញែងមកលើអំណាច និងការគ្រប់គ្រងរបស់លោកីយ៍នោះទេ តែបានផ្ដោតជាចម្បងទៅលើការផ្លាស់ប្តូរលើសនេះទៀត ដែលកើតឡើងពីព្រះទ័យក្ដួលអាណិតរបស់ព្រះដែលជាមហាក្សត្រ។ ក្នុងការពិពណ៌នាអំពីព្រះយេស៊ូវក្នុងកណ្ឌគម្ពីរដំណឹងល្អ អ្នកនិពន្ធបាននិយាយអំពីជំនួបជាច្រើន ដែលក្នុងនោះព្រះយេស៊ូវបានបង្ហាញសេចក្តីអាណិតដល់មនុស្សដែលព្រះអង្គជួប គ្មានអ្វីអាចប្រៀបផ្ទឹមបានទេ។ នៅជំនួបទាំងនោះ ព្រះអង្គបានបង្ហាញព្រះចេស្ដា ជាមួយនឹងក្តីអាណិត។ ឧទាហរណ៍៖ ក្នុងជំពូក៧ នៃដំណឹងល្អលូកា ព្រះយេស៊ូវបានបង្ហាញព្រះទ័យអាណិតដល់ស្ត្រីមេម៉ាយដែលកំពុងសោកសង្រេងជាការឆ្លើយតប ដែលបង្ហាញភាពធំឧត្តមរបស់ព្រះអង្គយ៉ាងច្បាស់។ ស្ត្រីនោះកំពុងមានភាពទីទាល់តែយ៉ាងខ្លាំង ដោយស្វាមីគាត់បានស្លាប់ ហើយកូនប្រុសរបស់គាត់ក៏ទើបតែបាត់បង់ជីវិតទៀត។ ក្នុងសង្គមរបស់តំបន់មជ្ឈិមបូព៌ា បញ្ហានេះបានបង្ហាញថា គាត់កំពុងខ្វះទីពឹងដែលផ្តល់ឲ្យនូវការការពារ និងការផ្គត់ផ្គង់។ ជីវិតគាត់មានការសោកសៅ ឯកោ និងបាត់បង់ម្ចាស់ការ ហើយមិនមានអ្នកតវង្សត្រកូលទៀតទេ។
ប៉ុន្តែ កាលព្រះយេស៊ូវជួបគាត់ ក្នុងពេលដែលជីវិតគាត់ឈានដល់ចំណុចដែលពិបាកជាពន់ពេក «ទ្រង់មានព្រះហឫទ័យក្ដួលអាណិតអាសូរដល់គាត់ណាស់ ក៏មានព្រះបន្ទូលថា កុំយំអី» ។
ព្រះនៃយើងជាអ្នកគង្វាលដ៏សុភាព មានព្រះទ័យក្ដួលអាណិត ដោយសារព្រះអង្គទតឃើញគាត់សោកសង្រេង។ តាមន័យត្រង់ ក្នុងព្រះគម្ពីរភាសាក្រិក ពាក្យ «ក្ដួលអាណិត» គឺមានន័យថា «ក្ដុកក្ដួលក្នុងឱរា»។ កាលព្រះយេស៊ូវបានទតឃើញការសោកសង្រេងក្នុងលោកីយ៍ដែលប្រេះបែក ព្រះអង្គមានអារម្មណ៍ក្តុកក្តួលក្នុងឱរា។ ព្រះអង្គជាក្សត្រដែលយកព្រះទ័យទុកដាក់យ៉ាងជ្រាលជ្រៅ។
ជាងនេះទៅទៀត ព្រះយេស៊ូវមានព្រះចេស្ដា ដែលអាចបំពេញតម្រូវការរបស់ស្ត្រីមេម៉ាយនោះ ហើយព្រះអង្គបានសម្រេចព្រះទ័យធ្វើអ្វី ដែលមានតែព្រះអង្គអាចធ្វើបាន គឺប្រោសមនុស្សស្លាប់ឲ្យរស់ឡើងវិញ។ ព្រះអង្គមិនគ្រាន់តែប្រោសជីវិតរបស់កូនប្រុសរបស់ស្ត្រីមេម៉ាយដែលកំពុងសោកសង្រេង ហើយបំពេញតម្រូវការ និងដកការសោកសង្រេងរបស់គាត់ចេញប៉ុណ្ណោះទេ។ ដែលសំខាងជាងនេះទៀតនោះ គឺព្រះអង្គបានបង្ហាញអង្គទ្រង់ដល់ហ្វូងមនុស្ស (និងយើងផងដែរ!) ដោយព្រះចេស្ដា សេចក្តីសប្បុរស និងអំណាចរបស់ព្រះអង្គ គឺរាប់បញ្ចូលទាំងអំណាចលើសេចក្តីស្លាប់ផងដែរ។
ទិដ្ឋភាពដូចនេះ បានបង្ហាញយើងថា ព្រះយេស៊ូវមិនគ្រាន់តែមានបន្ទូលអំពីជំងឺ និងសេចក្តីស្លាប់ ជាខ្មាំងសត្រូវធំបំផុតនៃមនុស្សជាតិ ហើយព្រះអង្គបានឬព្រះកន្សែងប៉ុណ្ណោះទេ។ តែព្រះអង្គបានឈ្នះពួកវាផងដែរ។ ព្រះអង្គបានឮសម្លេងយំនៃការសោកសង្រេង ហើយបានកម្សាន្តចិត្តពួកគេ ដែលមិនគ្រាន់តែមានន័យ នៅលើផែនដី ជាបណ្ដោះអាសន្ន តែក៏មានន័យដល់គ្រាចុងក្រោយ យ៉ាងឥតខ្ចោះ និងអស់កល្បជានិច្ច ដោយលះបង់ព្រះជន្មទ្រង់ ដើម្បីសង្គ្រោះមនុស្សទាំងអស់ដែលជឿ។
ក្សត្ររបស់អ្នកមិនគ្រាន់តែមានព្រះចេស្ដាគ្មានដែនកំណត់ប៉ុណ្ណោះទេ តែក៏មានព្រះទ័យអាណិតគ្មានដែនកំណត់។ ហើយលក្ខណសម្បត្តិទាំងពីរនេះរួមផ្សំគ្នា ល្មមនឹងនាំអ្នកឆ្លងកាត់ទុកព្រួយ និងការសោកសង្រេងនីមួយៗក្នុងលោកីយ៍នេះ ទាល់តែអ្នកបានឈរនៅក្នុងព្រះវត្តមានរបស់ព្រះអង្គ ហើយព្រះអង្គជូតទឹកភ្នែកទាំងអស់ចេញពីភ្នែកអ្នក។
ខគម្ពីរសញ្ជឹងគិត៖ លូកា ៧:១-១៧
គម្រោងអានព្រះគម្ពីររយៈពេល១ឆ្នាំ៖ អេសេគាល ២២-២៣ និងយ៉ូហាន ១៣:១-២០