ព្រឹក
កិច្ចការបន្ទាប់ដែលព្រះអង្គនឹងធ្វើ
ដោយAmy Boucher Pye
October 7, 2025
យ៉ូហាន ១៦:៣១-៣៣
នៅលោកីយនេះ នោះអ្នករាល់គ្នាមានសេចក្ដីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយហើយ ។ យ៉ូហាន ១៦:៣៣
ក្នុងអំឡុងសម័យសង្គ្រាមលោកលើកទីពីរ នៅពេលដែលកងទ័ពប្រទេសអាឡឺម៉ង់ទម្លាក់គ្រាប់បែកនៅទីក្រុងឡុងប្រទេសអង់គ្លេស នៅថ្ងៃទី២០ ខែធ្នូ ឆ្នាំ១៩៤០ មានគ្រាប់បែកមួយគ្រាប់បានបំផ្លាញឃ្លាំងផ្ទុកទំនិញមួយខ្នង នៅក្បែរព្រះវិហារសន្តប៉ូលជាព្រះវិហារធំ។ អ្នកស្រីប៊ីឌឌី ឆេមប័រ(Biddy Chambers) ក៏បានទទួលដំណឹងថា សៀវភៅរបស់លោកអូស្វ៊ល ឆេមប័រ(Biddy Chambers) ចំនួន៤ម៉ឺនក្បាល ដែលបានស្តុកទុកក្នុងឃ្លាំងនោះ បានទទួលរងការបំផ្លិចបំផ្លាញទាំងស្រុង។ គាត់បានប្រមូលផ្តុំ និងកែសម្រួលសៀវភៅទាំងនោះ តែគាត់បានស្តុកទុក ដោយមិនមានការធានារាប់រងទេ។ គាត់ក៏បានអង្គុយចុះ កាន់ពែងតែ ហើយក៏បានប្រាប់កូនស្រីគាត់ថា “ព្រះទ្រង់បានប្រើសៀវភៅទាំងនោះ ដើម្បីសិរីល្អរបស់ព្រះអង្គ ប៉ុន្តែ ឥឡូវនេះ យើងបាត់បង់សៀវភៅទាំងអស់នោះហើយ។ យើងនឹងរង់ចាំមើលព្រះអង្គនឹងធ្វើអ្វីជាបន្តទៀត”។
អ្នកស្រីប៊ីឌឌីកំពុងនឹកចាំអំពីសៀវភៅ និងអត្ថបទជាច្រើន ដែលលោកអូស៊្វល ជាស្វាមី បាននិពន្ធ នៅដើមដំបូងនៃសង្គ្រាមលោកលើកទី១ មុនពេលលោកអូស្វ៊លលាចាកលោក។ គាត់បានកត់សំគាល់របៀបដែលព្រះយេស៊ូវបានមានបន្ទូលទៅកាន់ពួកសិស្សរបស់ព្រះអង្គ អំពី “ហានិភ័យដែលមិនអាចជៀសរួច” ដើម្បីកាលណាការអាក្រក់កើតឡើង ពួកគេនឹង “មិនមានការភ័យខ្លាច”ឡើយ ដោយសារព្រះអង្គគង់នៅជាមួយពួកគេ។ ព្រះអង្គបានប្រាប់ពួកសាវ័កដែលជាមិត្តសំឡាញ់ទ្រង់ថា “នៅលោកីយនេះ នោះអ្នករាល់គ្នាមានសេចក្ដីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយហើយ”(យ៉ូហាន ១៦:៣៣)។ ព្រះអង្គសព្វព្រះទ័យឲ្យពួកគេនៅតែមានភាពរឹងមាំ ក្នុងជំនឿលើព្រះវរបិតារបស់ព្រះអង្គ ដើម្បីឲ្យពួកគេអាចអត់ទ្រាំនឹងទុក្ខលំបាក និងបញ្ហាប្រឈម ដែលពួកគេជួបប្រទះ។
ទំនុកចិត្តដែលអ្នកស្រីប៊ីឌឌីមាន ចំពោះព្រះ បានជួយឲ្យគាត់ឆ្លងកាត់ទុក្ខលំបាកនៅពេលនោះ ហើយទីបំផុត សៀវភៅទាំងនោះត្រូវបានគេបោះពុម្ពឡើងវិញ ហើយក្លាយជាសៀវភៅដ៏ពេញនិយមអស់ជាច្រើនជំនាន់។ យើងក៏អាចរកឃើញការលើកទឹកចិត្ត និងក្តីសង្ឃឹម ក្នុងព្រះបន្ទូលសន្យារបស់ព្រះយេស៊ូវ ដែលបានធានាថា ព្រះអង្គបានឈ្នះលោកិយហើយ។ យើងដឹងថា ព្រះអង្គនឹងមិនចាកចេញពីយើងទេ(១៤:១៨) ហើយនឹងប្រទានសន្តិភាពដល់យើង(ខ.២៧) ទោះយើងជួបប្រទះបញ្ហាអ្វីក៏ដោយ។—Amy Boucher Pye
តើអ្នកយល់ឃើញយ៉ាងណា ចំពោះការឆ្លើយតបរបស់អ្នកស្រីប៊ីឌឌី
នៅពេលដែលគាត់បានទទួលដំណឹងថា សៀវភៅរបស់គាត់ត្រូវភ្លើងឆេះអស់?
តើអ្នកអាចយកតម្រាប់តាមគាត់ ក្នុងការទុកចិត្តព្រះដូចម្តេចខ្លះ?
ឱព្រះយេស៊ូវ ជាព្រះនៃក្តីស្រឡាញ់ សូមព្រះអង្គជួយទូលបង្គំឲ្យ “ឈ្នះលោកិយ”
ក្នុងការរស់នៅជារៀងរាល់ថ្ងៃ ខណៈពេលដែលទូលបង្គំចែកចាយអំពីសេចក្តីស្រឡាញ់របស់ព្រះអង្គដល់អ្នកដទៃ។
គម្រោងអានព្រះគម្ពីររយៈពេល១ឆ្នាំ : អេសាយ ២៨-២៩ និង ភីលីព ៣
ប្រភេទ
ល្ងាច
ជីវិតដែលខុសពីលោកីយ៍ (សៀវភៅសេចក្ដីពិតសម្រាប់ជីវិត)
ដោយAlistair Begg
October 7, 2025
«រួចមកដានីយ៉ែលបានត្រឡប់ជាកំពូលលើពួកអធិបតី នឹងពួកចៅហ្វាយទាំងប៉ុន្មាន ដ្បិតលោកមានវិញ្ញាណយ៉ាងស្រួចស្រាល់ ហើយស្ដេចទ្រង់គិតនឹងតាំងលោក ឲ្យត្រួតលើនគរទាំងមូល។ ដូច្នេះ ពួកអធិបតី នឹងពួកចៅហ្វាយក៏ស្វែងរកហេតុពីដំណើររាជការផែនដី ឲ្យទាស់នឹងដានីយ៉ែល តែគេរកឱកាស ឬកំហុសអ្វីមិនបានឡើយ ក៏មិនឃើញមានថ្លោះធ្លោយ ឬទោសទាស់អ្វីដែរ ពីព្រោះលោកជាមនុស្សស្មោះត្រង់» (ដានីយ៉ែល ៦:៣-៤)។
បន្ទាប់ពីលោក ដានីយ៉ែល ត្រូវគេចាប់បញ្ជូនទៅទីក្រុងបាប៊ីឡូន ធ្វើជាចំណាប់ខ្មាំង គាត់ក៏បានក្លាយជាផ្នែកមួយនៃយុវជនអ៊ីស្រាអែលដែលមានភាពលេចធ្លោ ហើយត្រូវស្ដេច នេប៊ូក្នេសា ជ្រើសរើសចូលធ្វើការក្នុងព្រះរាជវាំង។ ទោះគាត់ត្រូវគេនិរទេសពីស្រុកកំណើត និងត្រូវគេដាក់ឈ្មោះថ្មីឲ្យ ហើយរស់នៅឆ្ងាយពីគ្រួសារ និងអ្វីដែលគាត់ធ្លាប់ស្គាល់ ចម្ងាយរាប់រយគីឡូម៉ែត្រក៏ដោយ ក៏គាត់បានតាំងចិត្តថា គាត់នឹងមិនធ្វើឲ្យខ្លួនគាត់ស្មោកគ្រោក ដោយអាហារ និងភេសជ្ជៈរបស់ស្ដេចទេ (ដានីយ៉ែល ១:១២-១៦)។ គាត់មានភាពលេចធ្លោ ក្នុងនាមជាបុរសស្អាតស្អំ ក្នុងសម័យដែលមានភាពពុករលួយខាងសីលធម៌។
លោក ដានីយ៉ែល បានក្លាយជាអ្នកកំពូលលើពួកអធិបតីក្នុងរចនាសម្ព័ន្ធរបស់រាជការដែលគាត់ធ្វើការបម្រើ ដោយសារទីបន្ទាល់នៃការរស់នៅរបស់គាត់។ ជាច្រើនឆ្នាំមកនេះ គាត់បានបង្ហាញភាពស្មោះត្រង់ យ៉ាងច្បាស់។ គាត់ជាមនុស្សដែលប្រកាន់គោលជំហរដោយមិនរេរា គឺដូចដែលគាត់បង្ហាញ នៅពេលដែលចក្រភពបាប៊ីឡូនបានផ្លាស់ប្ដូរអ្នកដឹកនាំថ្មី។ គាត់មានសមត្ថភាពដ៏អស្ចារ្យ ក្នុងការប្រឈមមុខដាក់ និងជម្នះទុក្ខលំបាក ក៏ដូចជាមានប្រាជ្ញាមកពីព្រះ ដែលជួយគាត់ឲ្យអាចផ្តល់ការប្រឹក្សា ដែលនាំមកនូវការផ្លាស់ប្ដូរក្នុងប្រវត្តិសាស្ត្រមនុស្សជាតិ។
មុខតំណែងរាជការដែលលោក ដានីយ៉ែល គ្រប់គ្រងងាយនឹងមានអំពើពុករលួយ ប៉ុន្តែគាត់មានកេរ្តិ៍ឈ្មោះល្អ ដោយគាត់បានបដិសេធភាពមិនស្មោះត្រង់គ្រប់ប្រភេទ។ គាត់មិនបានធ្វេសប្រហែស និងមិនខុសសីលធម៌ ហើយក៏គ្មានចន្លោះប្រហោងរវាងការងារសាធារណៈ និងជីវិតឯកជនរបស់គាត់ឡើយ។ គាត់ល្អរកកន្លែងបន្ទោសមិនបាននៅចំពោះមុខមនុស្ស។ សូម្បីតែអ្នកធ្វើការជាមួយគាត់ដែលច្រណែន និងស្អប់គាត់ ដោយសារគាត់មានភាពលេចធ្លោ ក៏មិនអាចរកឃើញកំហុសគាត់ដែរ។
ដោយការច្រណែនឈ្នានីស ពួកមន្ត្រីទាំងអស់នោះ ក៏បាននាំគ្នារៀបគម្រោងកំចាត់គាត់។ ពួកគេមិនសប្បាយចិត្តឡើយ ពេលដែលគាត់ប្ដេជ្ញាចិត្តចំពោះព្រះរបស់គាត់ដោយមិនងាករេ ឬមានមុខនាទីខ្ពស់ជាងគេ។ ពួកគេមិនអាចអត់ទ្រាំ ចំពោះរបៀបដែលគាត់បង្ហាញចេញជំនឿដ៏រឹងមាំចំពោះអំណាច និងសេចក្តីបរិសុទ្ធរបស់ព្រះតាមរយៈការរស់នៅ។ ការរស់នៅដោយបរិសុទ្ធ ច្រើនតែនាំឲ្យមានការស្អប់ខ្ពើម។ គេក៏បានរៀបគម្រោងធ្វើបាបលោក ដានីយ៉ែល មិនមែនដោយសារគាត់ជាមនុស្សអាក្រក់ ប៉ុន្តែដោយសារគាត់ប្រកាន់ខ្ជាប់តាមសេចក្តីពិត។ គាត់ស្រឡាញ់អ្វីដែលព្រះទ្រង់ស្រឡាញ់ ហើយក៏បង្ហាញចេញសេចក្តីស្រឡាញ់នោះ ក្នុងការរស់នៅ។
តើការរស់នៅរបស់អ្នកមានការប្រកាន់ខ្ជាប់នូវសេចក្តីជំនឿស្រដៀងនេះទេ? តើការប្រព្រឹត្តរបស់អ្នកបានប្រកាសសេចក្តីពិតអំពីព្រះរបស់អ្នកទេ? តើអ្នកបានត្រៀមខ្លួនប្ដេជ្ញាចិត្តរក្សាភាពស្អាតស្អំយ៉ាងឆេះឆួលទេ? តើអ្នកខ្វល់អំពីការស្តាប់បង្គាប់ព្រះ ឬខ្វល់អំពីការគិតដែលអ្នកដទៃមានចំពោះអ្នកទេ? ព្រះយេស៊ូវបានដាស់តឿនអ្នកដើរតាមព្រះអង្គថា ពួកគេនឹងត្រូវគេស្អប់ និងទទួលរងការបៀតបៀន ដោយសារពួកគេជឿព្រះអង្គ (ម៉ាថាយ ៥:១១) សូម្បីនៅពេលដែលពួកគេរស់នៅ តាមរបៀបដែលបើកបង្ហាញ និងសរសើរតម្កើងព្រះវរបិតាក៏ដោយ (ខ.១៤-១៦)។ ចូរយើងរស់នៅដោយចិត្តប្ដូរផ្តាច់ ដូចហោរាដានីយ៉ែលផងដែរ ដោយការប្ដេជ្ញាចិត្តមិនងាករេ ក្នុងការស្រឡាញ់អ្វីដែលព្រះស្រឡាញ់ ហើយបង្ហាញសេចក្តីស្រឡាញ់តាមការរស់នៅ។
ខគម្ពីរសញ្ជឹងគិត៖ ១ពេត្រុស ២:៩-១៧
គម្រោងអានព្រះគម្ពីររយៈពេល១ឆ្នាំ៖ អេសេគាល ៤២-៤៤ និងយ៉ូហាន ១៩:១-២២