ព្រឹក
ធ្វើការរួមគ្នាក្នុងព្រះគ្រីស្ទ
ដោយKatara Patton
November 7, 2025
ជនគណនា ២៧:១-៧
រួចព្រះយេហូវ៉ាទ្រង់មានបន្ទូលនឹងម៉ូសេថា “ពួកកូនស្រីស្លូផិហាតបាននិយាយត្រូវ ដូច្នេះត្រូវចែកឲ្យគេមានកេរ្តិ៍អាករនៅជាមួយនឹងពួកបងប្អូនរបស់ឪពុកគេផង”។ ជនគណនា ២៧:៦-៧
ស្ត្រីវ័យក្មេងម្នាក់បាននិយាយ ក្នុងការសម្ភាសក្នុងកម្មវិធីទូរទស្សន៍ថា “ទោះអ្នកនៅទីណា ហើយកំពុងឆ្លងកាត់បញ្ហាអ្វីក៏ដោយ ចូរប្រើអ្វីដែលអ្នកមាន ឲ្យបានល្អបំផុត”។ ពាក្យសម្តីរបស់គាត់បានជំរុញចិត្តខ្ញុំឲ្យចង់ស្តាប់រឿងទាំងមូល ដោយការប្រុងប្រយ័ត្ន។ ខ្ញុំក៏បានដឹងថា គាត់ស្ថិតក្នុងចំណោមបងប្អូនស្រីៗ៦នាក់ ដែលកំពុងរៀនសូត្រឲ្យបានសញ្ញាប័ត្រគិលានុបដ្ឋាយិកា។ កាលពីមុន ពួកគេគឺជាជនអនាថា ដែលកំពុងរស់នៅយ៉ាងលំបាកលំបិន តែពួកគេបានជួយគ្នាទៅវិញទៅមក ដើម្បីសម្រេចគោលដៅរួម។ នៅពេលដែលគេចាក់ផ្សាយអំពីរឿងនេះ ក្នុងកម្មវិធីទូរទស្សន៍ បងប្អូនស្រីទាំង៦នាក់ កំពុងបញ្ចប់ការសិក្សាជំនាញគិលានុបដ្ឋាយិកា នៅសកលវិទ្យាល័យមួយក្នុងតំបន់។
កណ្ឌគម្ពីរជនគណនា ជំពូក២៧ បានចែងអំពីរឿងរបស់បងប្អូនស្រីមួយក្រុមទៀត ដែលរួបរួមគ្នា និងជួយយកអសារគ្នាទៅវិញទៅមក។ កូនស្រីទាំង៥នាក់របស់លោកស្លូផិហាត បានសុំឲ្យលោកម៉ូសេជួយដោះស្រាយបញ្ហាកេរមរតករបស់ពួកគេ។ ពួកគេបានជួបជុំគ្នា នៅចំពោះមុខលោកម៉ូសេ ដោយជម្រាបគាត់ថា “ឪពុកយើងខ្ញុំបានស្លាប់ទៅ ... ដោយព្រោះតែបាបរបស់ខ្លួនវិញ ហើយគាត់គ្មានកូនប្រុសសោះ ... ហេតុនេះសូមឲ្យយើងខ្ញុំបានកេរ្តិ៍អាករ នៅជាមួយនឹងបងប្អូនរបស់ឪពុកយើងខ្ញុំផង”(ខ.៣-៤)។ ព្រះទ្រង់ឆ្លើយតប ដោយបន្ទូលដែលប្រាសចាកវប្បធម៌នៅសម័យនោះថា “ពួកកូនស្រីស្លូផិហាតបាននិយាយត្រូវ ដូច្នេះត្រូវចែកឲ្យគេមានកេរ្តិ៍អាករនៅជាមួយនឹងពួកបងប្អូនរបស់ឪពុកគេផង”(ខ.៧)។
បងប្អូនស្រីទាំង៥នាក់នោះបានរួបរួមគ្នា ស្វែងរកសេចក្តីមេត្តារបស់ព្រះ ខណៈពេលដែលពួកគេឈរនៅចំពោះលោកម៉ូសេ ហើយព្រះទ្រង់ក៏បានប្រទានអ្វីដែលពួកគេត្រូវការ ខណៈពេលដែលពួកគេរួបរួមគ្នា នៅចំពោះព្រះអង្គ។
ការធ្វើការជាមួយគ្នា មិនតែងតែមានភាពងាយស្រួល ក្នុងនាមយើងជាអ្នកជឿព្រះយេស៊ូវ។ ប៉ុន្តែ ពេលណាយើងស្វែងរកប្រាជ្ញា និងទិសដៅពីព្រះអង្គ ដោយការបន្ទាបខ្លួន យើងនឹងបានដឹងថា ព្រះអង្គអាចជួយយើងបម្រើព្រះអង្គជាមួយគ្នាបានកាន់តែប្រសើរឡើង។—Katara Patton
តើធ្វើដូចម្តេចឲ្យយើងអាចធ្វើការជាមួយអ្នកជឿព្រះគ្រីស្ទដទៃទៀត
ឲ្យកាន់តែប្រសើរឡើង? តើការនេះបានលើកទឹកចិត្តអ្នកឲ្យបម្រើអ្នកដទៃ ដូចម្តេចខ្លះ?
ឱព្រះអម្ចាស់ សូមព្រះអង្គបង្ហាញទូលបង្គំ អំពីរបៀបធ្វើការជាមួយអ្នកជឿដទៃទៀត
ដើម្បីសម្រេចគោលដៅដែលថ្វាយព្រះកិត្តិនាមដល់ព្រះអង្គ។
គម្រោងអានព្រះគម្ពីររយៈពេល១ឆ្នាំ : យេរេមា ៤០-៤២ និង ហេព្រើរ ៤
ល្ងាច
ទីក្រុងបរិសុទ្ធ (សៀវភៅសេចក្ដីពិតសម្រាប់ជីវិត)
ដោយAlistair Begg
November 7, 2025
«យ៉ូហានខ្ញុំ ក៏ឃើញទីក្រុងដ៏បរិសុទ្ធ គឺជាក្រុងយេរូសាឡឹមថ្មី ចុះពីស្ថានសួគ៌មកអំពីព្រះ តាក់តែងដូចជាប្រពន្ធថ្មោងថ្មីតែងខ្លួនទទួលប្ដី» (វិវរណៈ ២១:២)។
តាមរយៈព្រះយេស៊ូវ ព្រះទ្រង់បានឈោងមករកយើងពីស្ថានសួគ៌មក ហើយនៅគ្រាចុងក្រោយ ទីក្រុងបរិសុទ្ធ ជាទីក្រុងយេរូសាឡឹមថ្មីនឹងចុះពីស្ថានសួគ៌មកពីព្រះអង្គផងដែរ។ ព្រះទ្រង់កំពុងបង្កើតទីក្រុងយេរូសាឡឹមថ្មី ដែលមានអ្នកជឿគ្រប់វ័យ និងមកពីគ្រប់ទិសទី គឺមនុស្សដូចអ្នក និងខ្ញុំ។ យើងបានក្លាយជាអ្នករស់នៅក្នុងទីក្រុង ជាមួយគ្នា ដោយភាពសុខដុមដ៏ឥតខ្ចោះ ដោយព្រះភក្ត្ររបស់ព្រះអង្គ នៅចំពោះមុខយើង ហើយព្រះអង្គនឹងគូសសំគាល់ថា យើងជាកម្មសិទ្ធិរបស់ព្រះអង្គ (វិវរណៈ ២២:៤)។ នៅទីនោះនឹងមានមនុស្សមួយហ្វូងធំ គឺធំក្រៃលែង ដែលគ្មាននរណាអាចរាប់បាន ដែលមានពលរដ្ឋមកពីគ្រប់ជាតិសាសន៍ ពូជអំបូ ក្រុមមនុស្ស និងភាសា (៧:៩)។
ព្រះគម្ពីរបានពណ៌នា អំពីមនុស្សច្រើនសន្ធឹកដូចនេះ ដើម្បីធ្វើជាប្រភពនៃក្តីសង្ឃឹម និងការលើកទឹកចិត្តសម្រាប់ពួកជំនុំក្នុងសម័យរបស់សាវ័ក យ៉ូហាន ក៏ដូចជាសម្រាប់សម័យយើងផងដែរ។ ពួកជំនុំដំបូង មានសមាជិកតិច គឺតូចតាមស្តង់ដាររបស់មនុស្ស គឺមិនខុសពីសម័យផ្សេងទៀតក្នុងប្រវត្តិសាស្ត្រទាំងមូល។ ប៉ុន្តែ សាវ័ក យ៉ូហាន បានប្រាប់យើងថា ពួកជំនុំមានចំនួនមនុស្សច្រើនជាងឆ្ងាយណាស់ និងសំខាន់ជាង ហួសក្តីស្រមៃ ព្រោះសមាជិករបស់ពួកជំនុំគឺជាពលរដ្ឋនៃទីក្រុងយេរូសាឡឹមថ្មីដែលធ្វើដំណើរទៅមុខ ទាល់តែពួកគេបានឈរផ្តុំគ្នានៅតាមផ្លូវនៃទីក្រុងនោះ។
ថ្ងៃមួយ ក្នុងទីក្រុងនោះ អ្នកជឿមានចំនួនរាប់មិនអស់ នឹងថ្វាយបង្គំព្រះជាមួយគ្នា ហើយយើងនឹងបានឃើញព្រះទ្រង់សម្រេចព្រះបន្ទូលសន្យាដែលទ្រង់បានប្រទានលោក អ័ប្រាហាំ ដោយបន្ទូលថា «ចូរមើលទៅលើមេឃឥឡូវ ហើយរាប់ផ្កាយចុះ បើឯងអាចនឹងរាប់ទាំងអស់បាន រួចទ្រង់មានបន្ទូលប្រាប់ថា ពូជឯងនឹងបានដូច្នោះដែរ» (លោកុប្បត្ដិ ១៥:៥)។
សព្វថ្ងៃនេះ ស្នាព្រះហស្តរបស់ព្រះអង្គមានការបែកបាក់ និងមិនចុះសម្រុងគ្នា។ យើងបានញែកចេញពីគ្នា ដោយភាសា សញ្ជាតិ វប្បធម៌ ដោយជម្លោះពីបុរាណ និងការសង្ស័យ ក្នុងពេលបច្ចុប្បន្ន។ ថ្ងៃមួយ បញ្ហាទាំងអស់នេះនឹងបញ្ច្រាសមកវិញ។ ព្រះទ្រង់កំពុងបង្កើតសហគមន៍ថ្មីមួយ ជាទីក្រុងមានមនុស្សគ្រប់ជាតិសាសន៍ មកពីគ្រប់វប្បធម៌ នៅក្រោមការគ្រប់គ្រង និងដឹកនាំរបស់ព្រះអង្គ។ នៅពេលដែលព្រះអង្គប្រមូលផ្តុំយើង នៅគ្រាចុងក្រោយ ខណៈពេលដែលស្ថានសួគ៌ចុះមកផែនដី ហើយរាស្ត្ររបស់ព្រះគ្រីស្ទនឹងបានរស់ឡើងវិញ ដើម្បីរស់នៅក្នុងទីក្រុងនោះ យើងនឹងបានរួបរួមគ្នា ដោយដំណឹងល្អរបស់ព្រះអម្ចាស់យេស៊ូវគ្រីស្ទ ព្រោះដំណឹងល្អគឺសម្រាប់មនុស្សគ្រប់ជាតិសាសន៍។
តើអ្នកអាចស្រមៃអំពីថ្ងៃនោះទេ? ទេ! យើងមិនអាចស្រមៃឲ្យបានពេញលេញទេ តែការគិតអំពីថ្ងៃនោះ នឹងជំរុញអ្នកទៅមុខ ឆ្លងកាត់ទុក្ខលំបាក និងសំពាធក្នុងជីវិតនេះ ហើយបណ្ដាលចិត្តអ្នកឲ្យទម្លាក់ចុះបន្ទុកអ្វី ដែលកំពុងរារាំងអ្នកមិនឲ្យទៅមុខ (ហេព្រើរ ១២:១-២)។ លោកីយ៍នេះ មិនមែនជាផ្ទះរបស់អ្នកទេ តែថ្ងៃមួយ ទីក្រុងនៅស្ថានសួគ៌នឹងចុះមកផែនដី។ ថ្ងៃមួយ អ្នកនឹងបានឃើញដោយផ្ទាល់ភ្នែក នូវអ្វីដែលលោក យ៉ូហាន បានឃើញក្នុងការបើកសម្ដែង ហើយអ្នកនឹងបានទៅនៅផ្ទះរបស់អ្នកនៅស្ថានសួគ៌។
ខគម្ពីរសញ្ជឹងគិត៖ វិវរណៈ ២២
គម្រោងអានព្រះគម្ពីររយៈពេល១ឆ្នាំ៖ អែសរ៉ា ១-២ និង២ធីម៉ូថេ ១