ព្រឹក
ជឿលើសពីការមើលឃើញ
ដោយWinn Collier
December 4, 2025
ហេព្រើរ ១១:១-៤
រីឯសេចក្ដីជំនឿ នោះគឺជាចិត្តដែលដឹងជាក់ថានឹងបានដូចសង្ឃឹម ជាសំគាល់ពីការដែលមើលមិនឃើញ។ ហេព្រើរ ១១:១១
កាលពីចុងសតវត្សរ៍ទី១៩ មានមនុស្សតិចណាស់ ដែលអាចចូលទៅដល់ព្រៃដែលមានដើមឈើយក្ស ក្នុងសហរដ្ឋអាមេរិក ហើយមនុស្សជាច្រើនមិនជឿព័ត៌មាន ដែលបានផ្សព្វផ្សាយថា មានដើមឈើធំៗសម្បើម ដែលបានដុះនៅទីនោះទេ។ ទោះជាយ៉ាងណាក៏ដោយ នៅឆ្នាំ១៨៩២ មានអ្នកកាប់ឈើបួននាក់បានធ្វើដំណើរ ចូលទៅក្នុងព្រៃនោះ ក្នុងរដ្ឋកាលីហ្វូញ៉ា ហើយបានកាប់ដើមឈើយក្សមួយដើម ដោយចំណាយពេល១៣ថ្ងៃ។ គេបានដាក់ឈ្មោះឲ្យដើមឈើមួយដើមនោះថា ម៉ាក ថ្វេន(Mark Twain)។ វាមានអាយុ១៣៤១ឆ្នាំ មានកម្ពស់៩០ម៉ែត្រ និងវង់ជុំវិញប្រវែង១៥ម៉ែត្រ។ អ្នកសង្កេតម្នាក់បានពិពណ៌នាថា ដើមឈើមួយដើមនោះ មានទំហំធំសម្បើម ស្ថិតក្នុងចំណោមដើមឈើល្អជាងគេ ក្នុងព្រៃនោះ។ គេក៏បានកាត់យកកំណាត់ឈើ ដែលមានសម្រស់គួរឲ្យកត់សំគាល់នោះ ទៅដាក់បង្ហាញក្នុងសារៈមន្ទីរប្រវត្តិសាស្រ្តធម្មជាតិអាមេរិក ដើម្បីឲ្យសាធារណៈជនបានស្គាល់ដើមឈើដ៏ធំសម្បើម។
ទោះជាយ៉ាងណាក៏ដោយ តាមពិត យើងមិនអាចដឹងអំពីសេចក្តីពិត តាមរយៈភ្នែករបស់យើងតែម្យ៉ាងនោះឡើយ។ អ្នកនិពន្ធកណ្ឌគម្ពីរហេព្រើរ បានពិពណ៌នាថា “រីឯសេចក្ដីជំនឿ នោះគឺជាចិត្តដែលដឹងជាក់ថានឹងបានដូចសង្ឃឹម ជាសំគាល់ពីការដែលមើលមិនឃើញ”(ហេព្រើរ ១១:១)។ ជំនឿមិនមែនគ្មានហេតុផល ឬជាការស្រមើស្រមៃនោះឡើយ ព្រោះរឿងទាំងមូលមានមូលដ្ឋាន នៅក្នុងអង្គបុគ្គលម្នាក់គឺ ព្រះយេស៊ូវ ដែលទ្រង់បានយាងចូលក្នុងប្រវត្តិសាស្រ្តមនុស្សជាតិ។ ជំនឿរាប់បញ្ចូលញាណទាំង៥ និងហេតុផលរបស់មនុស្ស ប៉ុន្តែ មិនមែនមានតែប៉ុណ្ណេះទេ។ ជំនឿមានការតម្រូវលើសពីនេះទៀត។ កណ្ឌគម្ពីរហេព្រើរបានចែងថា “យើងរាល់គ្នាក៏យល់ដោយសារសេចក្ដីជំនឿនោះថា លោកីយបានកើតមក ដោយសារព្រះបន្ទូលនៃព្រះ បានជារបស់ដែលមើលឃើញទាំងប៉ុន្មាន នោះមិនមែនកើតអំពីរបស់ដែលមើលឃើញទេ”(ខ.៣)។
ជាញឹកញាប់ យើងច្រើនតែពិបាកជឿលើអ្វីដែលយើងមិនអាចប៉ះ ឬមើលមិនឃើញ ឬក៏មិនអាចយល់បាន។ ប៉ុន្តែ ជំនឿដែលយើងមានចំពោះព្រះគ្រីស្ទ អាចកើតមានបាន ដោយសារព្រះវិញ្ញាណបរិសុទ្ធ ហើយជួយយើងឲ្យជឿ លើសពីការមើលឃើញ។—Winn Collier
តើអ្នកមានការពិបាកក្នុងការជឿ ត្រង់ចំណុចណា? តើធ្វើដូចម្តេច ឲ្យអ្នកអាចកាន់តែមានជំនឿលើព្រះអង្គ?
ឱព្រះអម្ចាស់ សូមព្រះអង្គជួយទូលបង្គំឲ្យជឿ និងទុកចិត្តព្រះអង្គ។
គម្រោងអានព្រះគម្ពីររយៈពេល១ឆ្នាំ : អេសេគាល ៤៧-៤៨ និង ១យ៉ូហាន ៣
ល្ងាច
ក្លាយជាកូនរបស់ព្រះ (សៀវភៅសេចក្ដីពិតសម្រាប់ជីវិត)
ដោយAlistair Begg
December 4, 2025
«ប៉ុន្តែអស់អ្នកណាដែលទទួលទ្រង់ គឺអស់អ្នកដែលជឿដល់ព្រះនាមទ្រង់ នោះទ្រង់បានប្រទានអំណាច ឲ្យបានត្រឡប់ជាកូនព្រះ។ គឺជាកូនដែលមិនមែនកើតមកពីឈាម ឬតាមប្រាថ្នាខាងរូបសាច់ ឬតាមចំណង់នៃមនុស្សឡើយ គឺកើតមកអំពីព្រះវិញ» (យ៉ូហាន ១:១២-១៣)។
ក្នុងពួកជំនុំខ្លះ គេមានទម្លាប់និយាយអំពីភាពជាឪពុកជាសកលដែលព្រះទ្រង់មាន និងបានបណ្ដាលឲ្យយើងមានទំនាក់ទំនងជាបងប្អូនក្នុងជំនឿរបស់យើង។ ប៉ុន្តែ យើងគួរតែដឹងអំពីដែនកំណត់នៃការអះអាងដូចនេះ។ ជាការពិតណាស់ យើងរាល់គ្នាសុទ្ធតែជាកូនរបស់ព្រះ ដោយសារព្រះអង្គបង្កើតយើងមកដោយគុណធម៌ ប៉ុន្តែព្រះគម្ពីរសញ្ញាថ្មីបានក្រើនរំឭកយើងថា យើងក៏ជា «កូននៃសេចក្តីក្រោធ» ដែលបានវង្វេង និងត្រូវការព្រះអង្គទទួលចិញ្ចឹមយើងក្នុងគ្រួសាររបស់ព្រះអង្គ (អេភេសូរ ២:៣)។
យើងមិនបានក្លាយជាកូនព្រះ ដោយសារដំណើរការណាមួយនៃធម្មជាតិនោះឡើយ។ វាមិនមែនជាលទ្ធផលនៃហ្សែនក្នុងការបង្កកំណើតរបស់មនុស្ស ឬការប្រឹងប្រែងរបស់មនុស្សឡើយ។ គ្មាននរណាម្នាក់ចូលទៅក្នុងនគរព្រះពីកំណើតមកនោះឡើយ ហេតុនេះហើយ នៅពេលដែលព្រះយេស៊ូវឆ្លើយសំណួររបស់លោក នីកូដេម ជាអ្នកកាន់សាសនា ដែលមានខ្សែស្រឡាយជនជាតិយូដា ព្រះអង្គបានប្រាប់គាត់ថា គាត់ត្រូវតែកើតជាថ្មី (យ៉ូហាន ៣:៣)។ ការក្លាយជាកូនព្រះ គឺជាដំណើរការខាងវិញ្ញាណ ជាអ្វីដែលព្រះទ្រង់ធ្វើសម្រាប់យើង ដោយសេចក្តីមេត្តា និងព្រះគុណរបស់ព្រះអង្គ។
ចូរគិតអំពីកំណើតខាងសាច់ឈាមរបស់អ្នកចុះ។ អ្នកមិនអាចគ្រប់គ្រងវាបានទេ។ វាមិនមែនជាអ្វីដែលអ្នកសម្រេចបាន។ ការកើតជាថ្មីក្នុងព្រះគ្រីស្ទក៏មានលក្ខណៈដូចនេះផងដែរ។ នៅពេលណាព្រះទ្រង់បណ្ដាលឲ្យនរណាម្នាក់កើតជាថ្មី ពួកគេអាចមានជីវិតថ្មីបាន ដោយសារអំណាចរបស់ព្រះអង្គតែប៉ុណ្ណោះ។ មានតែព្រះអង្គទេ ដែលអាចប្រទានយើងនូវអំណាចធ្វើជាកូនរបស់ព្រះអង្គ។
មានរឿងដំណាលមកថា មានពេលមួយ អធិរាជ ណាប៉ូឡេអុង (Napoleon) ស្ទើរតែធ្លាក់ពីលើកែបសេះ នៅពេលដែលទ្រង់ទម្លាក់បង្ហៀរសេះ ដើម្បីអានក្រដាសដែលទ្រង់យកតាមខ្លួន។ នៅពេលដែលសត្វសេះកញ្ជ្រោលឡើង នាយទាហានឋានៈនាយទោម្នាក់ក៏បានប្រញាប់ចូលមកចាប់បង្ហៀរសេះនោះភ្លាមៗ។ ស្ដេច ណាប៉ូឡេអុង ក៏បានបែរមកគាត់ ហើយនិយាយថា «អរគុណ អនុសេនីយ៍ឯក»។ ទាហាននោះក៏បានសួរទ្រង់ថា «អនុសេនីយ៍ឯកក្នុងកងអនុសេនាធំមួយណា?» ទ្រង់ក៏បានឆ្លើយថា «ក្នុងកងការពាររបស់ខ្ញុំ»។131
ក្នុងពេលដ៏ខ្លី បុរសម្នាក់នោះក៏បានឡើងសក្តិភ្លាមៗ ទទួលបានសិទ្ធិចេញចូលទីបញ្ជាការរបស់មេទ័ព ហើយអង្គុយក្នុងចំណោមនាយទាហានរបស់មេបញ្ជាការ។ នៅពេលដែលអ្នកដទៃសួរគាត់ថា គាត់មកកន្លែងនោះមានការអ្វី គាត់អាចឆ្លើយថា គាត់គឺជាអនុសេនីយ៍ឯកនៃកងការពារ ដោយអំណាចនៃអធិរាជដោយផ្ទាល់។
បើអ្នកបានទទួលព្រះយេស៊ូវជាព្រះអម្ចាស់ និងព្រះសង្គ្រោះ អ្នកបានក្លាយជាកូនរបស់ព្រះហើយ។ ព្រះទ្រង់បានបោះត្រាចំណាំពីលើជីវិតអ្នកដោយអត្តសញ្ញាណថ្មីមួយ ហើយគ្មាននរណាម្នាក់អាចតវ៉ាបានទេ។ អ្នកអាចរស់នៅ ដោយការធានាដ៏អស្ចារ្យថា ព្រះយេស៊ូវជាក្សត្រលើអស់ទាំងស្ដេច និងជាម្ចាស់នៃសេចក្តីសង្គ្រោះរបស់អ្នក បានបើកផ្លូវឲ្យអ្នកអាចរាប់បញ្ចូលក្នុងចំណោមកូនរបស់ព្រះ។ ការពិតដ៏អស្ចារ្យនោះគឺជាចំណុចស្នូលនៃអត្តសញ្ញាណរបស់អ្នក ក្នុងពេលសព្វថ្ងៃ ទោះអ្នកជានរណា និងមានអ្វីកើតឡើងក្នុងជីវិតអ្នកក៏ដោយ។ ការពិតដ៏អស្ចារ្យនេះក៏បានជួយឲ្យអ្នកអាចរស់នៅជារៀងរាល់ថ្ងៃ ដោយចិត្តក្លាហាន និងទុកចិត្តថា ទោះមានរឿងអ្វីកើតឡើងក៏ដោយ អ្នកនៅតែជាកូនរបស់ព្រះអង្គ។
ព្រះគម្ពីរសញ្ជឹងគិត៖ ១យ៉ូហាន ២:២៨-៣:៣
គម្រោងអានព្រះគម្ពីររយៈពេល១ឆ្នាំ៖ ២របាក្សត្រ ៣២-៣៣ និងលូកា ១១:១-២៨