អេសាយ ៤៣:១-៧
ឯងមានដំឡៃវិសេសនៅភ្នែកអញ។ អេសាយ ៤៣:៤
គេបានព្យួរផ្ទាំងគំនូរមួយផ្ទាំង នៅលើជញ្ជាំងផ្ទះមួយខ្នង អស់ជាច្រើនឆ្នាំ ដោយគ្មាននរណាកត់សំគាល់ ហើយគេក៏មិនបាននឹកនា រហូតដល់ថ្ងៃដែលវាធ្លាក់មកលើកម្រាលឥដ្ឋ។ នៅពេលដែលគេយកវាទៅជួសជុលឲ្យស្អាតឡើងវិញ ម្ចាស់ផ្ទះក៏បានដឹងថា តាមពិតវាជាផ្ទាំងគំនូររបស់លោករេមប្រិន(Rembrandt) ដែលបានបាត់តាំងពីយូរមកហើយ មានចំណងជើងថា ការថ្វាយបង្គំរបស់ពួកហោរ។ គេបានគិតថា មានតែផ្ទាំងគំនូរចម្លងប៉ុណ្ណោះដែលនៅសល់ ប៉ុន្តែ គំនូរមួយផ្ទាំងនេះ គឺជារូបគំនូរដើម មិនមែនគំនូរចម្លងទេ។ ភ្លាមៗនោះ តម្លៃរបស់ផ្ទាំងគំនូរនោះបានឡើងថ្លៃ រហូតដល់រាប់រយលានដុល្លា។ 
ព្រះគម្ពីរប៊ីបបានចែងអំពីក្រុមមនុស្សដែលបានបាត់បង់តម្លៃ និងត្រូវគេលែងនឹកនាផងដែរ។ ហោរាអេសាយ បានទទួលការបណ្តាលចិត្តពីព្រះវិញ្ញាណបរិសុទ្ធ ឲ្យប្រាប់រាស្រ្តរបស់ព្រះថា ទោះគេបានចាប់ពួកគេធ្វើជាឈ្លើយសឹក ដឹកទៅប្រទេសដទៃ ដែលនៅទីនោះពួកគេនឹងរងទុក្ខវេទនា និងត្រូវគេបន្ទាបបន្ថោកក៏ដោយ ក៏ព្រះអង្គនៅតែគង់នៅជាមួយពួកគេ។ គឺដូចដែលព្រះអង្គបានធានាពួកគេថា “កុំឲ្យខ្លាចឡើយ ដ្បិតអញបានលោះឯងហើយ អញបានហៅចំឈ្មោះឯង ឯងជារបស់ផងអញ”(អេសាយ ៤៣:១)។ ទោះពួកគេត្រូវ “ដើរកាត់ទឹកធំ” ហើយ “លុយកាត់ភ្លើង” (ខ.២) ក៏ដោយ ក៏សេចក្តីស្មោះត្រង់ ដែលព្រះអង្គមានចំពោះពួកគេ មិនដែលប្រែប្រួលឡើយ។ ដោយព្រះបន្ទូលដែលចង្អុលបង្ហាញទៅរកការយាងមកនៃនគរព្រះក្នុងព្រះគ្រីស្ទ ព្រះអង្គក៏បានសន្យាថា ព្រះអង្គនឹងស្អាងឡើងវិញ ចំពោះអស់អ្នកដែលអំពាវនាវរកព្រះនាមព្រះអង្គ(ខ.៧) ហើយនាំពួកគេត្រឡប់មករកព្រះអង្គវិញ។
ថ្ងៃមួយ ព្រះទ្រង់នឹងប្រមូលមនុស្សដែលជាកម្មសិទ្ធិរបស់ទ្រង់ ព្រោះពួកគេ “មានដំឡៃវិសេសនៅ” ព្រះនេត្រទ្រង់(ខ.៤) និងជាស្នាព្រះហស្តដ៏ល្អវិសេសរបស់ព្រះអង្គ។ ព្រះអាទិករនៃយើងឲ្យតម្លៃយើង ដោយសារសេចក្តីសប្បុរស និងសេចក្តីមេត្តាដែលគ្មានព្រំដែនរបស់ព្រះអង្គ។ លោកិយអាចមើលរំលងយើង តែព្រះអង្គមិនដែលមើលរំលងយើងឡើយ។—James Banks

តើសេចក្តីសប្បុរសរបស់ព្រះ ក្នុងព្រះគ្រីស្ទ បានបង្ហាញថា អ្នកមានតម្លៃចំពោះព្រះអង្គយ៉ាងណាខ្លះ? 
តើព្រះអង្គមានតម្លៃប៉ុណ្ណា ចំពោះអ្នក? 
ឱព្រះអង្គសង្គ្រោះ ព្រះអង្គមានសេចក្តីស្រឡាញ់ដ៏ឥតខ្ចោះ និងអស្ចារ្យ បានជាព្រះអង្គលះបង់ព្រះជន្មដើម្បីទូលបង្គំ!
Learn more here: odbm.org/personal-relationship-with-god.
គម្រោងអានព្រះគម្ពីររយៈពេល១ឆ្នាំ : អេម៉ុស ៧-៩ និង វិវរណៈ៨