ស្គាល់ព្រះគ្រីស្ទពីគ្រប់ជ្រុង
ដោយAlistair Begg
January 30, 2026
«នោះទ្រង់មានបន្ទូលទៅគេថា ឱមនុស្សឥតពិចារណា ហើយក្រនឹងជឿអស់ទាំងសេចក្ដី ដែលពួកហោរាបានទាយទុកមកអើយ តើមិនគួរឲ្យព្រះគ្រីស្ទរងទុក្ខទាំងនោះ ហើយចូលទៅក្នុងសិរីល្អនៃទ្រង់វិញទេឬអី រួចទ្រង់ក៏ស្រាយន័យសេចក្ដី ដែលតំរូវដល់ទ្រង់ ពីក្នុងគម្ពីរទាំងឡាយ ឲ្យគេស្ដាប់ ចាប់តាំងពីគម្ពីរលោក ម៉ូសេ នឹងគម្ពីរពួកហោរារៀងមក»។ លូកា ២៤:២៥-២៧
តើអ្នករំពឹងថា ជីវិតដែលដើរតាមព្រះយេស៊ូវ នឹងមានលក្ខណៈដូចម្តេចខ្លះ?
កណ្ឌគម្ពីរលូកាមិនបានប្រាប់យើងច្រើន អំពីពេលដែលព្រះយេស៊ូវបង្ហាញអង្គទ្រង់ឲ្យគេឃើញ បន្ទាប់ពីព្រះអង្គមានព្រះជន្មរស់ឡើងវិញ។ ផ្ទុយទៅវិញ កណ្ឌគម្ពីរនេះបាននាំយើងផ្ដោតចិត្តទៅលើទំនាក់ទំនងរវាងព្រះគ្រីស្ទ ដែលមានព្រះជន្មរស់ឡើងវិញ និងមនុស្សពីរនាក់ដែលកំពុងដើរទៅភូមិអេម៉ោស គឺបុគ្គលដែលកំពុងរេរា នៅចន្លោះសេចក្តីជំនឿ និងការភ័យខ្លាច ខណៈពេលដែលពួកគេព្យាយាមស្វែងយល់អត្ថន័យនៃការសុគតរបស់ព្រះអង្គនៅលើឈើឆ្កាង។
នៅក្នុងការសុគតរបស់ព្រះយេស៊ូវ អ្នកជឿព្រះអង្គនៅសម័យដើមកំពុងប្រឈមមុខដាក់បញ្ហាមួយ។ ពួកគេសង្ឃឹមថា ព្រះយេស៊ូវគឺជាព្រះមែស៊ី តែក្តីសង្ឃឹមនោះបានស្លាប់ជាមួយព្រះអង្គហើយ។ ជាការពិតណាស់ កណ្ឌគម្ពីរលូកាបានចែងថា ពួកគេ «បានសង្ឃឹមថា គឺលោកនេះហើយ ជាព្រះដែលរៀបនឹងប្រោសលោះសាសន៍អ៊ីស្រាអែលទាំងប៉ុន្មាន»(លូកា ២៤:២១)។ បុគ្គលទាំងនេះបានរំពឹងថា នៅពេលដែលព្រះមែស៊ីយាងមក ព្រះអង្គនឹងនាំមកនូវជ័យជម្នះ សន្តិភាព និងយុត្តិធម៌ ដែលនឹងហូរចុះមក ដូចទន្លេដ៏ធំ(អេម៉ុស ៥:២៤)។ ប៉ុន្តែ ក្តីសង្ឃឹមនេះបានរលាយ នៅពេលដែលព្រះអង្គសុគត ដែលបានបង្ហាញថា អំពើអយុត្តិធម៌ហាក់ដូចជាមានជ័យជម្នះហើយ។
ប៉ុន្តែ មានរឿងល្អជាងនេះទៀតហៀបនឹងកើតឡើង ព្រោះ «កាលគេកំពុងតែនិយាយគ្នា ហើយរិះគិតដូច្នេះ នោះព្រះយេស៊ូវក៏ចូលមក យាងជាមួយនឹងគេដែរ»(លូកា ២៤:១៥)។ ព្រះយេស៊ូវបានជ្រាបអំពីការភាន់ភាំង និងភាពអស់សង្ឃឹមរបស់ពួកគេ បានជាព្រះអង្គ «ក៏ស្រាយន័យសេចក្ដី ដែលតំរូវដល់ទ្រង់ ពីក្នុងគម្ពីរទាំងឡាយ ឲ្យគេស្ដាប់ ចាប់តាំងពីគម្ពីរលោក ម៉ូសេ នឹងគម្ពីរពួកហោរារៀងមក»។
ព្រះអង្គធ្វើដូចនេះ មិនមែនដោយសារពួកគេមិនបានជឿព្រះអង្គ ឬមិនបានដឹងអំពីរឿងជាក់លាក់មួយចំនួន ដែលពួកហោរាបានធ្វើ និងនិយាយនោះទេ។ ប៉ុន្តែ នៅក្នុងការអានព្រះគម្ពីរសញ្ញាចាស់ និងគិតអំពីអត្តសញ្ញាណរបស់ព្រះមែស៊ី ពួកគេមិនបានយល់អំពីរូបភាពដែលធំជាង។ ពួកគេមិនបានចាប់អារម្មណ៍មកលើអ្វីៗគ្រប់យ៉ាងដែលពួកហោរាបានថ្លែងឡើយ។ ពួកគេបានផ្ដោតទៅលើរឿងនោះតែមួយចំហៀងប៉ុណ្ណោះ។ ពួកគេគិតតែរឿងជ័យជម្នះប៉ុណ្ណោះ ប៉ុន្តែ ពួកគេមិនបានដឹងទេថា សិរីល្អ និងជ័យជម្នះកំពុងរង់ចាំ នៅចុងផ្លូវនៃទុក្ខវេទនា ឬថែមទាំងសេចក្តីស្លាប់ទៀតផង។
យើងមិនអាចទទួលស្គាល់ថា ព្រះយេស៊ូវគឺជាព្រះមែស៊ី ដោយកាត់ផ្តាច់ព្រះអង្គចេញពីឈើឆ្កាងនោះឡើយ។ ព្រះយេស៊ូវបានបញ្ជាក់ច្បាស់ថា ជ័យជម្នះពិតជាបានរង់ចាំតែអស់អ្នកដែលបានជឿពាក្យ ដែលព្រះអង្គមានបន្ទូល ក្នុងបទគម្ពីរ លូកា ៩:២៣ ថា «បើអ្នកណាចង់មកតាមខ្ញុំ ត្រូវឲ្យអ្នកនោះលះកាត់ចិត្តខ្លួនឯង ទាំងផ្ទុកឈើឆ្កាងខ្លួនរាល់តែថ្ងៃ ហើយមកតាមខ្ញុំចុះ»។ តើអ្នកស្ម័គ្រចិត្តដើរតាមផ្លូវនៃទុក្ខវេទនា ដើម្បីអរសប្បាយនឹងជីវិតដែលនឹងបានរស់នៅជាមួយព្រះអង្គ ក្នុងសិរីល្អរបស់ទ្រង់ឬទេ? តើអ្នកកំពុងប្រឈមមុខដាក់ការបែរចេញពីព្រះអង្គ ដោយសារព្រះអង្គមិនបានប្រទានជោគជ័យក្នុងជីវិត ដែលព្រះអង្គមិនបានសន្យាថា នឹងប្រទានអ្នកឬ? ចូរប្រាកដថា អ្នកបានយល់សាច់រឿងទាំងមូល ដើម្បីកុំឲ្យភាពអន់ថយ និងទុក្ខលំបាកវាយបំបាក់ជំនឿរបស់អ្នក ឬបំផ្លាញក្តីអំណរ ដែលកើតចេញពីការដឹងថា នៅចុងបញ្ចប់នៃផ្លូវដ៏ពិបាក ក្នុងការដើរតាមក្សត្រដែលមានព្រះជន្មរស់ឡើងវិញ មានជ័យជម្នះដែលកំពុងរង់ចាំ ឲ្យយើងឃើញព្រះភក្ត្រ និងរស់នៅក្នុងនគរដ៏អស់កល្បរបស់ព្រះអង្គ។ ទោះជីវិតនេះមានការពិបាក ឬមានរឿងល្អយ៉ាងណាក៏ដោយ ក៏រឿងដែលល្អជាងតែងតែរង់ចាំនៅចុងផ្លូវខាងមុខជានិច្ច។
ព្រះគម្ពីរសញ្ជឹងគិត៖ ២ធីម៉ូថេ ៤:៦-៨
គម្រោងអានព្រះគម្ពីររយៈពេល១ឆ្នាំ៖ អេសាយ ២៦-២៧ និង ម៉ាកុស ៦:៣០-៥៦