មានជំនឿពិតប្រាកដ
ដោយAlistair Begg
June 10, 2026
«អ្នករាល់គ្នាក៏មានសេចក្ដីអំណរជាខ្លាំង ក្នុងសេចក្ដីសង្គ្រោះនោះ ទោះបើសព្វថ្ងៃនេះត្រូវរងទុក្ខព្រួយជាយូរបន្តិច ដោយកើតមានសេចក្ដីល្បួងផ្សេងៗក៏ដោយ ។ ដើម្បីឲ្យការសាកលសេចក្ដីជំនឿនៃអ្នករាល់គ្នា ដ៏វិសេសជាងមាសដែលតែងតែខូច ទោះបើបានសាកនឹងភ្លើងក៏ដោយ នោះបានឃើញសំរាប់ជាសេចក្ដីសរសើរ កេរ្តិ៍ឈ្មោះ នឹងសិរីល្អ ក្នុងកាលដែលព្រះយេស៊ូវគ្រីស្ទទ្រង់លេចមក» ។ ១ពេត្រុស ១:៦-៧
នៅក្នុងរឿងខ្លះ មានតែពេលវេលាទេ ដែលអាចប្រាប់យើងថា ការសម្រេចចិត្តនោះត្រូវឬអត់ ។
បើអ្នកចង់ទិញទូខោអាវ ឬទូដាក់ឥវ៉ាន់មួយ ក្នុងតម្លៃសមរម្យ អ្នកប្រហែលជាឆ្ងល់ថា តើអ្នកគួរតែទិញទូមួយទឹក ដែលមានតម្លៃស្ទើរតែស្មើទូថ្មី ដែលគេលក់បញ្ចុះតម្លៃឬទេ ។ គុណវិបត្តិស្ថិតនៅត្រង់ថា អ្នកនឹងដឹងថា ទូរនោះល្អឬអត់ នៅពេលដែលអ្នកបានប្រើវាមួយរយៈពេល ហើយឃើញថា ថត ឬទ្វាររបស់វាបិទបើកមិនស្រួល ។ មិនយូរប៉ុន្មានគ្រឿងសង្ហារិមមួយនេះប្រែជាមានភាពរញ៉េរញ៉ៃ ។ វាប្រហែលជាល្អតែសម្បកក្រៅ ពេលដែលអ្នកពិនិត្យមើលពីដំបូង ប៉ុន្តែ អ្នកដឹងអំពីបញ្ហាពិតរបស់វា ពេលដែលអ្នកប្រើវាពីមួយថ្ងៃទៅមួយថ្ងៃ ហើយពេលវេលា ក៏បានធ្វើតេស្ដលើវា បង្ហាញឲ្យយើងដឹងការពិតថា យើងមានផលិតផលពិត ឬក្លែងបន្លំ ។
តើធ្វើដូចម្តេចឲ្យយើងអាចដឹងថា យើងមានជំនឿពិតឬអត់? ចម្លើយនោះគឺ យ៉ាងហោចណាស់ យើងអាចដឹងថា ជំនឿយើងពិតឬអត់ នៅក្នុងដំណើរជីវិតប្រចាំថ្ងៃ ដែលក្នុងនោះយើងប្រឈមមុខដាក់បញ្ហាប្រឈម និងទុក្ខលំបាក នៅចំពោះមុខយើង ។
អ្នកខ្លះលើកឡើងថា ជីវិតជាគ្រីស្ទបរិស័ទមានជ័យជម្នះ មិនមានទុក្ខលំបាកក្នុងជីវិតឡើយ បានសេចក្តីថា បើយើងជាបុរស និងស្ត្រីនៃសេចក្តីជំនឿ យើងនឹងមិនជួបទុក្ខលំបាកទេ ។ សាវ័ក ពេត្រុសបាននិយាយផ្ទុយពីនេះថា ទុក្ខលំបាក និងការល្បងលក្នុងជីវិតគ្រីស្ទាន មិនមែនជារឿងចម្លែក ខុសពីធម្មតា ឬមិនមានប្រយោជន៍ ក្នុងជីវិតជាគ្រីស្ទបរិស័ទនោះឡើយ តែវាបានកើតឡើង តាមផែនការព្រះ ។
យើង និងមនុស្សដែលកំពុងមើលយើង នឹងបានដឹងថា ជំនឿរបស់យើងពិតប្រាកដឬអត់ ពេលណាយើងប្រឈមមុខដាក់បញ្ហាប្រឈម ហើយបដិសេធមិនព្រមរត់គេច តែផ្ទុយទៅវិញ យើងបន្តទុកចិត្តលើសេចក្តីល្អរបស់ព្រះគ្រីស្ទ ទោះផ្លូវដែលព្រះអង្គដឹកនាំយើងដើរមានការលំបាកប៉ុណ្ណាក៏ដោយ ។ ពេលណាទុក្ខលំបាកមកដល់ ហើយអ្វីៗមិនមានដំណើរការល្អ យើងដឹងថា យើងមានជំនឿពិតឬអត់ ក្នុងទីបន្ទាល់នៃការរស់នៅ និងការប្រកាសសេចក្តីជំនឿរបស់យើង អំពីព្រះគុណ សន្តិភាព និងការផ្គត់ផ្គង់របស់ព្រះអង្គ ។
លោកគ្រូ ឆាល ស្ព័រជិន (Charles Spurgeon) បានសរសេរក្នុងសៀវភៅដែលគាត់បាននិពន្ធយ៉ាងដូចនេះថា «អ្នកដែលចង់ថ្វាយសិរីល្អដល់ព្រះ ត្រូវតែត្រៀមខ្លួនជាស្រេច ដើម្បីប្រឈមមុខដាក់ទុក្ខលំបាកជាច្រើន ។ គ្មាននរណាអាចមានកិត្តិយសនៅចំពោះព្រះ ដោយមិនបានជួបទុក្ខលំបាកជាច្រើននោះឡើយ ។ ដូចនេះ បើជីវិតអ្នកមានពេញទៅដោយទុក្ខលំបាក និងការល្បងលជាច្រើន ចូរអរសប្បាយឡើង ព្រោះទុក្ខលំបាកទាំងនោះផ្តល់ឱកាសឲ្យអ្នកបង្ហាញថា ព្រះគុណព្រះមានភាពគ្រប់គ្រាន់យ៉ាងពេញលេញយ៉ាងណា ។ ចូរកុំគិតថា ព្រះទ្រង់នឹងធ្វើឲ្យអ្នកខកចិត្ត ចូរកុំគិតដូចនេះឡើយ ។ ព្រះដែលបានជួយអ្នកមកដល់ចំណុចនេះ នឹងបន្តស្មោះត្រង់ចំពោះអ្នករហូតដល់ទីបញ្ចប់» ។48
តើបញ្ហាប្រឈមធំបំផុតនៃជីវិត នឹងបង្ហាញថា អ្នកមានជំនឿពិតប្រាកដឬទេ? ជំនឿយើងអាចពិតប្រាកដបាន ទាល់តែយើងពឹងផ្អែកទៅលើព្រះគុណព្រះ ប៉ុន្តែ ព្រះគុណព្រះក៏ផ្តល់ឲ្យយើងនូវអត្ថប្រយោជន៍ជាច្រើនផងដែរ ពេលដែលអ្នកទុកចិត្តលើព្រះគុណព្រះអង្គ អ្នកនឹងរកឃើញថា អ្នកអាចអរសប្បាយ ព្រោះសុភមង្គលរបស់អ្នកមិនផ្តេកផ្តួលទៅលើកាលៈទេសៈនោះទេ តែអ្នកអាចរកឃើញសុភមង្គល នៅក្នុងការស៊ូទ្រាំ ក្នុងសេចក្តីជំនឿ ដោយស្គាល់ភាពគ្រប់គ្រាន់នៃព្រះគ្រីស្ទ ក្នុងកាលៈទេសៈ ដែលអ្នកមិនចង់ជួប ហើយនៅក្នុងការទន្ទឹងរង់ចាំថ្ងៃដែលព្រះអង្គសង្គ្រោះរបស់អ្នកលេចមក ។
ខគម្ពីរជញ្ជឹងគិត៖ យ៉ាកុប ៥:៧-១១
គម្រោងអានព្រះគម្ពីររយៈពេល១ឆ្នាំ៖ យេរេមា ១៥-១៧ និង ម៉ាថាយ ២៣:១-២២
48 Morning and Evening, revised and updated by Alistair Begg (Crossway, 2003), March 4 morning reading.