គ្រប់គ្នានៅក្នុងគ្រួសារតែមួយ
ដោយAlistair Begg
August 10, 2026
«នោះមានស្ត្រីម្នាក់ជាអ្នកជំនួញល័ខពណ៌ស្វាយ ឈ្មោះលីឌា ពីក្រុងធាទេរ៉ា ជាអ្នកដែលថ្វាយបង្គំព្រះ នាងប្រុងស្ដាប់ ហើយព្រះអម្ចាស់ទ្រង់បើកចិត្តនាង ឲ្យយកចិត្តទុកដាក់តាមសេចក្ដី ដែលប៉ុលអធិប្បាយ កាលនាងបានទទួលបុណ្យជ្រមុជទឹកព្រមទាំងពួកគ្រួនាងរួចហើយ នោះក៏អញ្ជើញយើងថា បើអស់លោកយល់ឃើញថា ខ្ញុំស្មោះត្រង់ចំពោះព្រះអម្ចាស់ពិត នោះសូមលោកអញ្ជើញទៅនៅឯផ្ទះខ្ញុំកុំខាន នាងក៏បង្ខំដល់យើង» ។ កិច្ចការ ១៦:១៤-១៥
ពេលណាព្រះទ្រង់ប្រោសលោះមនុស្សម្នាក់ ព្រះអង្គនាំគាត់ ចូលទៅក្នុងទំនាក់ទំនង មិនគ្រាន់តែជាមួយអង្គទ្រង់ តែក៏ជាមួយអ្នកដទៃទៀត ដែលបានហៅព្រះអង្គថា ព្រះអម្ចាស់ ។ តើព្រះអង្គនាំគាត់ចូលក្នុងទំនាក់ទំនងនោះ ដោយរបៀបណា? សូមយើងមើលគំរូរបស់អ្នកស្រីលីឌា ក្នុងបទគម្ពីរកិច្ចការ ជំពូក១៦ ។
អ្នកស្រីលីឌា មានលក្ខណៈជាស្ត្រីឆ្នើមម្នាក់ ។ ក្នុងនាមគាត់ជា «អ្នកថ្វាយបង្គំព្រះ» គាត់មានចំណាប់អារម្មណ៍ផ្នែកជំនឿសាសនា ហើយក្នុងនាមគាត់ជាអ្នកលក់ក្រណាត់ពណ៌ស្វាយ គាត់គឺជាអ្នកជំនួញឈានមុនផងដែរ ។ ជីវិតរបស់គាត់ ទំនងជាសុខសប្បាយជាធម្មតា ។ ប៉ុន្តែ នៅពេលដែលគាត់បានឮដំណឹងល្អ គាត់បានផ្លាស់ប្តូរ ពីការមានចំណាប់អារម្មណ៍ខាងសាសនា ទៅជាការមានទំនាក់ទំនងពិតប្រាកដជាមួយព្រះយេស៊ូវគ្រីស្ទ ដែលបណ្តាលចិត្តគាត់ឲ្យប្រើធនធានគាត់ ដោយក្តីស្រឡាញ់ ជាប្រយោជន៍ដល់គ្រួសារខាងវិញ្ញាណថ្មីរបស់គាត់ ។
ជីវិតរបស់គាត់បានដល់ចំណុចផ្លាស់ប្រែ នៅពេលដែល «ព្រះអម្ចាស់ទ្រង់បើកចិត្តគាត់ ឲ្យយកចិត្តទុកដាក់តាមសេចក្ដី ដែលប៉ុលអធិប្បាយ» ។ ត្រង់ចំណុចនេះ ព្រះអម្ចាស់បើកចំហចិត្តគាត់ឲ្យជឿ ហើយគាត់ក៏បានជឿ ។ នៅពេលនោះ អ្នកស្រីលីឌាក៏បានចូលទៅក្នុងគ្រួសាររបស់ព្រះ ។ ហើយជាងនេះទៅទៀត ភ្លាមៗនោះ គាត់ក៏បានចាប់ផ្តើមបម្រើបងប្អូនប្រុសស្រីរបស់គាត់ ក្នុងព្រះគ្រីស្ទ ដោយបើកចំហទ្វារផ្ទះស្វាគមន៍ពួកគេ ។
រឿងរបស់អ្នកស្រីលីឌាបានក្រើនរំឭកយើងថា ការចាប់ផ្តើម ដោយការត្រាស់ហៅឲ្យទទួលជឿព្រះ គួរតែបន្តមួយដំណាក់កាលទៀត ចូលទៅក្នុងការចូលរួមក្នុងគ្រួសាររបស់ព្រះ ។ បទគម្ពីររ៉ូម ៨:១៥-១៦ បានចង្អុលបង្ហាញថា ព្រះទ្រង់បានទទួលចិញ្ចឹមយើង ពេលដែលយើងទទួលជឿព្រះអង្គ តែក៏បានកត់សំគាល់ផងដែរថា យើងរាល់គ្នា «យើងជាកូនរបស់ព្រះ» ។ ទំនាក់ទំនងដែលយើងមានជាមួយគ្នា បានកើតចេញពីការពិតដែលថា យើងមានទំនាក់ទំនងជាមួយព្រះយេស៊ូវ ហើយទំនាក់ទំនងជាមួយព្រះយេស៊ូវ ក៏បាននាំឲ្យយើងមានទំនាក់ទំនងជាមួយគ្នាផងដែរ ។
យើងមិនអាចជ្រើសរើសឲ្យនរណាធ្វើជាបងប្អូនបង្កើត ក្នុងគ្រួសារខាងសាច់ឈាមរបស់យើង ។ ហេតុនេះហើយ យើងក៏មិនអាចជ្រើសរើសឲ្យនរណាម្នាក់ធ្វើជាបងប្អូនខាងវិញ្ញាណរបស់យើងដែរ ។ (បើយើងនិយាយដោយស្មោះត្រង់ យើងប្រហែលជាចង់ដកនរណាម្នាក់ចេញ ហើយជ្រើសរើសអ្នកផ្សេងវិញ ហើយពួកគេក៏ប្រហែលជាគិតចង់ធ្វើចំពោះយើងដូចនេះដែរ) ។ សមាជិកពួកជំនុំរបស់អ្នក គឺជាអ្នកដែលព្រះទ្រង់បានជ្រើសរើសឲ្យធ្វើជាបងប្អូនរួមជំនឿរបស់អ្នក ។ យើងងាយនឹងផ្ដោតទៅលើភាពខុសគ្នាដែលមនុស្សម្នាក់ៗមាន ប៉ុន្តែ ផ្នែកសំខាន់បំផុតរបស់គ្រួសាររបស់ព្រះ មិនមែនជាអ្វីដែលធ្វើឲ្យយើងខុសពីគ្នានោះទេ តែជាអ្វីដែលយើងមានជារួម ត្រង់ចំណុចដែលថា ព្រះទ្រង់បើកចិត្តយើង ឲ្យទទួលដំណឹងល្អ ហើយឥឡូវនេះ បានត្រាស់ហៅយើងឲ្យទទួលដំណឹងល្អ ថ្វាយបង្គំ និងដើរតាមព្រះអង្គជាមួយគ្នា ។
បើព្រះអម្ចាស់បើកចំហចិត្តអ្នក នោះអ្នកជាកម្មសិទ្ធិរបស់គ្រួសារថ្មីរបស់អ្នកហើយ ។ គ្រួសារនោះមិនទាន់ល្អឥតខ្ចោះទេ នៅតែមានជម្លោះ និងបញ្ហាកើតឡើង ។ ប៉ុន្តែ ព្រះយេស៊ូវនៅតែត្រាស់ហៅអ្នក ឲ្យស្រឡាញ់បងប្អូនប្រុសស្រីរបស់អ្នក ទោះអ្នកមានភាពខុសប្លែកគ្នាយ៉ាងណាឡើយ ។ និយាយរួម ព្រះអង្គស្រឡាញ់ពួកគេយ៉ាងខ្លាំង បានជាព្រះអង្គសុគតដើម្បីពួកគេ ។ ហើយព្រះអង្គក៏ត្រាស់ហៅអ្នក ឲ្យដាក់អ្វីដែលអ្នកមាន និងអត្តសញ្ញាណរបស់អ្នក នៅក្នុងការបម្រើគ្រួសារនេះ ។ តើអ្នកនឹងប្រើពេលវេលា ផ្ទះ និងធនធានរបស់អ្នកដូចម្តេចខ្លះ ដើម្បីធ្វើឲ្យក្តីស្រឡាញ់ចំពោះគ្នាទៅវិញទៅមក ប្រែក្លាយជាចារិកលក្ខណៈគ្រួសារ នៃពួកជំនុំរបស់អ្នក?
ខគម្ពីរជញ្ជឹងគិត ៖ ១យ៉ូហាន ៣:១១-១៨
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៧៩-៨០ និង កិច្ចការ ២៨