មានចិត្តក្លាហាន ដើម្បីព្រះយេស៊ូវ
ដោយArthur Jackson
June 4, 2023
អ្នកណាដែលមិនយកឈើឆ្កាងខ្លួន មកតាមខ្ញុំ អ្នកនោះមិនគួរនឹងខ្ញុំឡើយ។ ម៉ាថាយ ១០:៣៨ កាលឆ្នាំ១៥៥ នៃគ្រីស្ទសករាជ លោកគ្រូប៉ូលីខាប(Polycarp) ជាអ្នកបង្កើតពួកជំនុំសម័យដើម បានទទួលរងការគម្រាមដុតសម្លាប់ទាំងរស់ ដោយសារគាត់ជឿព្រះគ្រីស្ទ។ គាត់បានឆ្លើយតបទៅគេវិញថា “អស់រយៈពេល៨៦ឆ្នាំហើយ ដែលខ្ញុំបានធ្វើការបម្រើព្រះ ហើយព្រះអង្គមិនដែលធ្វើខុសមកលើខ្ញុំសោះ។ តើធ្វើដូចម្តេចឲ្យខ្ញុំអាចពោលពាក្យប្រមាថព្រះដ៏ជាមហាក្សត្ររបស់ខ្ញុំ ដែលបានសង្រ្គោះខ្ញុំឲ្យរួចពីបាប?” ការឆ្លើយតបរបស់លោកគ្រូប៉ូលីខាប អាចធ្វើជាគំរូដែលលើកទឹកចិត្តយើង ពេលណាយើងប្រឈមមុខដាក់ការល្បងលដ៏ធ្ងន់ធ្ងរ ដោយសារយើងមានជំនឿលើព្រះយេស៊ូវ ដែលជាក្សត្ររបស់យើង។ មុនពេលព្រះយេស៊ូវសុគត សាវ័កពេត្រុសបានប្រកាសក្ដែងៗចំពោះព្រះគ្រីស្ទថា “ទូលបង្គំស៊ូតែប្តូរជីវិតជំនួសទ្រង់”(យ៉ូហាន ១៣:៣៧)។ ព្រះយេស៊ូវបានស្គាល់លោកពេត្រុស ច្បាស់ជាងលោកពេត្រុសស្គាល់ខ្លួនឯង។ ព្រះអង្គក៏បានមានបន្ទូលតបទៅគាត់ថា “តើអ្នកនឹងប្តូរជីវិតជំនួសខ្ញុំឬ ប្រាកដមែន ខ្ញុំប្រាប់អ្នកជាប្រាកដថា មាន់មិនរងាវទៀត ទាល់តែអ្នកបានប្រកែក៣ដង ថាមិនស្គាល់ខ្ញុំ”(ខ.៣៨)។ ទោះជាយ៉ាងណាក៏ដោយ បន្ទាប់ពីព្រះយេស៊ូវមានព្រះជន្មរស់ឡើងវិញ សាវ័កពេត្រុសក៏បានចាប់ផ្តើមបម្រើព្រះអង្គ ដោយចិត្តក្លាហាន ហើយទីបំផុតក៏បានថ្វាយសិរីល្អដល់ព្រះអង្គ តាមរយៈការស្លាប់របស់គាត់(ខ.២១:១៦-១៩)។ តើអ្នកជាលោកគ្រូប៉ូលីកាប ឬសាវ័កពេត្រុស? បើនិយាយឲ្យស្មោះត្រង់ទៅ មនុស្សភាគច្រើន គឺមានលក្ខណៈដូចលោកពេត្រុស ដែល “ខ្វះសេចក្តីក្លាហាន” មិនអាចនិយាយ ឬប្រព្រឹត្តិឲ្យសក្តិសមជាអ្នកជឿព្រះយេស៊ូវ ទោះនៅក្នុងថ្នាក់រៀន បន្ទាប់ធ្វើការ ឬកន្លែងញាំអាហារក្តី។ ចូរយើងកុំឲ្យចំណុចខ្វះខាតដូចនេះ ក្លាយជាលក្ខណៈសម្បត្តិរបស់យើងឡើយ។ ពេលណាកំហុសទាំងនោះកើតមាន យើងត្រូវងាកទៅរកព្រះយេស៊ូវ ដោយអធិស្ឋានលន់តួបាប ហើយនឹកចាំថា ព្រះអង្គបានសុគត និងមានព្រះជន្មរស់ ដើម្បីយើងរាល់គ្នា។ ព្រះអង្គនឹងជួយយើងឲ្យមានចិត្តស្មោះត្រង់ ចំពោះព្រះអង្គ ហើយរស់នៅដោយចិត្តក្លាហាន ថ្វាយព្រះអង្គជារៀងរាល់ថ្ងៃ នៅកន្លែងដែលពិបាក។ —ARTHUR JACKSON
តើអ្នកត្រូវការសេចក្តីក្លាហានជាបន្ថែម ដើម្បីធ្វើបន្ទាល់ពីព្រះយេស៊ូវ នៅពេលណា? តើមានអ្វីខ្លះមានប្រយោជន៍ដល់អ្នក ក្នុងការធ្វើបន្ទាល់ថ្វាយព្រះអង្គ?
ឱព្រះវរបិតាដែលគង់នៅស្ថានសួគ៌ សូមព្រះអង្គអត់ទោសឲ្យទូលបង្គំ ពេលណាទូលបង្គំរាថយ ដោយការភ័យខ្លាច ហើយបានធ្វើខុសនឹងព្រះអង្គ ដោយពាក្យសម្តី ឬសកម្មភាព។ ទូលបង្គំត្រូវការកម្លាំងពីព្រះអង្គ ដើម្បីរស់នៅ ដោយចិត្តក្លាហាន ក្នុងនាមជាអ្នកជឿព្រះយេស៊ូវ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ២១-២២ និង យ៉ូហាន ១៤