ពេលដែលអ្នកនឿយព្រួយខ្លាំង
ដោយKaren Huang
August 29, 2023
សូមអាន ម៉ាថាយ ១១:២៥-៣០ អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក។ ម៉ាថាយ ១១:២៨ នៅពេលល្ងាចថ្ងៃសុក្រ ជាថ្ងៃធ្វើការ ខ្ញុំនៅអង្គុយនៅមុខកុំព្យូទ័រនៅឡើយ។ ខ្ញុំគួរតែមានចិត្តរីករាយ ចំពោះការងារដែលខ្ញុំបានធ្វើចប់ នៅថ្ងៃនោះ តែខ្ញុំមិនសប្បាយចិត្តសោះ។ ស្មារបស់ខ្ញុំបានចុករោយ ដោយសារទម្ងន់ដ៏ធ្ងន់នៃការថប់បារម្ភ ដោយសារបញ្ហានៅកន្លែងធ្វើការ ហើយគំនិតរបស់ខ្ញុំក៏បានហត់នឿយ ដោយសារការគិតអំពីបញ្ហាទំនាក់ទំនង។ ខ្ញុំចង់រត់គេចចេញពីបញ្ហាទាំងអស់នោះ ហើយខ្ញុំក៏បានគិតចង់ទៅមើលទូរទស្សន៍នៅយប់នោះ។ តែខ្ញុំបានបិទភ្នែកអធិស្ឋានខ្សិបៗថា “ព្រះអម្ចាស់អើយ”។ ខ្ញុំអស់កម្លាំងពេក មិនចង់និយាយអ្វីទៀតទេ។ ភាពហត់នឿយបានធ្វើឲ្យខ្ញុំអាចអធិស្ឋានបានតែពាក្យប៉ុន្មានម៉ាត់នេះ។ ហើយភ្លាមៗនោះ ខ្ញុំក៏បានដឹងថា ខ្ញុំត្រូវធ្វើអ្វីបន្ទាប់ទៀត។ ព្រះយេស៊ូវមានបន្ទូលមកកាន់យើងរាល់គ្នា ដែលកំពុងនឿយព្រួយ ហើយផ្ទុកធ្ងន់ថា “ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក”(ម៉ាថាយ ១១:២៨)។ គឺមិនមែនសម្រាក ដោយការគេងលក់ឲ្យបានស្កប់ស្កល់នៅពេលយប់នោះទេ។ ហើយក៏មិនមែនជាការគេចវេសពីបញ្ហា ដោយការមើលទូរទស្សន៍បន្លប់ខ្លួនឯងនោះឡើយ។ ហើយក៏មិនមែនជាការមានអារម្មណ៍ធូរស្បើយ បន្ទាប់ពីបញ្ហាយើងត្រូវបានដោះស្រាយនោះដែរ។ ទោះការសម្រាកទាំងអស់នេះ ជាការសម្រាកដ៏ល្អ តែភាពធូរស្រាលដែលយើងទទួលបានពីការសម្រាកដូចនេះ មានរយៈពេលខ្លី ហើយអាស្រ័យទៅលើកាលៈទេសៈរបស់យើងប៉ុណ្ណោះ។ តែផ្ទុយទៅវិញ ការសម្រាកដែលព្រះយេស៊ូវប្រទាន មានភាពស្ថិតស្ថេរ ហើយមានការធានាថា ព្រះទ័យព្រះអង្គមិនប្រែប្រួលឡើយ។ ព្រះអង្គតែងតែល្អជារៀងរហូត។ ព្រះអង្គប្រទានយើងនូវការសម្រាកដ៏ពិត សម្រាប់វិញ្ញាណយើង ក្នុងពេលមានបញ្ហា ដោយដឹងថា អ្វីៗគ្រប់យ៉ាងស្ថិតនៅក្រោមការគ្រប់គ្រងរបស់ព្រះអង្គ។ យើងអាចទុកចិត្ត និងចុះចូលនឹងព្រះអង្គ ស៊ូទ្រាំ ហើយថែមទាំងចម្រើនឡើង ក្នុងស្ថានភាពដ៏ពិបាក ដោយពឹងអាងកម្លាំង និងការស្អាងឡើងវិញ ហើយមានតែព្រះអង្គទេ ដែលអាចប្រទានឲ្យបាន។ ព្រះយេស៊ូវមានបន្ទូលមកកាន់យើងថា “ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក”។—Karen Huang
ពេលដែលវិញ្ញាណរបស់អ្នកមានការហត់នឿយ តើអ្នកស្វែងរកការសម្រាក ដោយរបៀបណា? តើអ្នកនឹងឆ្លើយតបដូចម្តេចខ្លះ ចំពោះការត្រាស់ហៅរបស់ព្រះយេស៊ូវឲ្យអ្នកចូលមករកព្រះអង្គ?
ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំឲ្យនឹកចាំថា ទូលបង្គំអាចរកបានការសម្រាកពិតប្រាកដ តែនៅក្នុងព្រះអង្គប៉ុណ្ណោះ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១២៦-១២៨ និង ១កូរិនថូស ១០:១៩-៣៣