សូមអាន : យ៉ាកុប ៣:១៣-១៨
ក្នុងពួកអ្នករាល់គ្នា បើមានអ្នកណាមានប្រាជ្ញា និងយោបល់ ត្រូវឲ្យអ្នកនោះសំដែងចេញជាកិរិយាល្អ ដោយសារការដែលខ្លួនប្រព្រឹត្ត ដោយសេចក្តីសុភាពនៃប្រាជ្ញាចុះ។ យ៉ាកុប ៣:១៣
មុនពេលបុណ្យព្រះយេស៊ូវមានព្រះជន្មរស់ឡើងវិញ នៅឆ្នាំ២០១៨ ភេរវករម្នាក់បានចូលទៅក្នុងផ្សា សម្លាប់មនុស្សពីរនាក់ ហើយក៏បានចាប់ស្រ្តីម្នាក់ធ្វើជាចំណាត់ខ្មាំង។ ការប្រឹងប្រែងរំដោះស្រ្តីនោះបានទទួលបរាជ័យ តែប៉ូលិសម្នាក់ក៏បានធ្វើការដោះដូរជាមួយភេរវករនោះ ដោយឲ្យរំដោះស្រ្តីនោះ ហើយយកគាត់ធ្វើជាចំណាប់ខ្មាំងវិញ។
ការដោះដូរនោះបានធ្វើឲ្យគេគ្រប់គ្នាភ្ញាក់ផ្អើល ព្រោះជាទង្វើដែលផ្ទុយនឹងផ្នត់គំនិតដ៏ពេញនិយម ដែលលោកិយចាត់ទុកជាប្រាជ្ញា។ យើងតែងតែអាចដឹងថា “ប្រាជ្ញា”របស់វប្បធម៌ណាមួយមានលក្ខណៈដូចម្តេច ដោយគ្រាន់តែមើលពាក្យសម្តី ដែលវប្បធម៌នោះអបអរ ដូចជាសម្រង់ពាក្យរបស់ជនល្បីឈ្មោះ ដែលគេបង្ហោះតាមបណ្តាញសង្គមជាដើម។ ឧទាហរណ៍មានសម្រង់សម្តីដ៏ពេញនិយមមួយចំនួនពោលថា “ការផ្សងព្រេងធំបំផុត ដែលអ្នកអាចមាន គឺត្រូវរស់នៅក្នុងជីវិត ដែលអ្នកស្រមៃចង់បាន”។ “ចូរស្រឡាញ់ខ្លួនឯងជាមុនសិន នោះបញ្ហាអ្វីផ្សេងទៀតនឹងមានដំណោះស្រាយ”។ “ចូរធ្វើអ្វីដែលអ្នកត្រូវធ្វើសម្រាប់ខ្លួនឯង”។ បើសិនជាមន្ត្រីប៉ូលិសរូបនោះស្តាប់តាមយោបល់ទាំងអស់នេះ គាត់មុខជាមិនអាចលះបង់ជីវិតដើម្បីរំដោះស្រ្តីនោះបានឡើយ។
សាវ័កយ៉ាកុបបានមានប្រសាសន៍ថា មានប្រាជ្ញាពីរប្រភេទ ក្នុងលោកិយនេះ គឺប្រាជ្ញា “របស់លោកិយ” និងប្រាជ្ញា “មកពីស្ថានសួគ៌”។ ប្រភេទប្រាជ្ញាទី១ គឺមានលក្ខណៈអាត្មានិយម និងគ្មានសណ្តាប់ធ្នាប់(យ៉ាកុប ៣:១៤-១៦) ប្រភេទប្រាជ្ញាទី២ មានលក្ខណៈបន្ទាបខ្លួន ការចុះចូលនឹងព្រះ ហើយបង្កើតឲ្យមានសន្តិភាព(ខ.១៣,១៧-១៨)។ ប្រាជ្ញារបស់លោកិយយកអាត្មាខ្លួនឯងជាទី១។ ប្រាជ្ញាមកពីស្ថានសួគ៌ចាត់ទុកប្រយោជន៍របស់អ្នកដទៃជាសំខាន់ជាង ដោយនាំទៅរកជីវិតដែលមានការបន្ទាបខ្លួន(ខ.១៣)។
ភេរវករនោះបានទទួលយកការដោះដូររបស់ប៉ូលិសរូបនោះ។ ចំណាត់ខ្មាំងក៏ត្រូវបានដោះលែង តែមន្រ្តីប៉ូលិសត្រូវភេរវករនោះបាញ់សម្លាប់ ហើយនៅថ្ងៃបុណ្យព្រះយេស៊ូវមានព្រះជន្មរស់ឡើងវិញ ពិភពលោកក៏បានឃើញមនុស្សស្លូតត្រង់ម្នាក់ស្លាប់ ដើម្បីមនុស្សម្នាក់ទៀត។
ប្រាជ្ញាដែលមកពីស្ថានសួគ៌បាននាំទៅរកការប្រព្រឹត្តដ៏ត្រឹមត្រូវ ព្រោះប្រាជ្ញានោះចាត់ទុកព្រះជាធំជាងខ្លួនឯង(សុភាសិត ៩:១០)។ តើអ្នកកំពុងតែដើរតាមប្រាជ្ញាមួយណា ក្នុងពេលសព្វថ្ងៃនេះ?—Sheridan Voysey
តើលោកិយបានផ្តល់ឲ្យ “ប្រាជ្ញា”អ្វីខ្លះ? តើធ្វើដូចម្តេចឲ្យអ្នកអាចដឹងថា ប្រាជ្ញាដែលអ្នកទទួលមកពីស្ថានសួគ៌ ឬជារបស់លោកិយ?
ឱព្រះមានគ្រប់ប្រាជ្ញា សូមព្រះអង្គប្រទានទូលបង្គំនូវប្រាជ្ញា ដែលនាំទៅរកការប្រព្រឹត្តដ៏ត្រឹមត្រូវ ដោយសេចក្តីស្រឡាញ់។
គម្រោងអានរយៈពេល១ឆ្នាំ : សុភាសិត ១០-១២ និង ២កូរិនថូស ៤
