ការបញ្ចេញមតិក្លែងក្លាយ (សៀវភៅនំម៉ាណាប្រចាំថ្ងៃ)
ដោយMarvin Williams
February 18, 2025
អេភេសូរ ៤:១៧,២២-៣២
ដូច្នេះ ដែលបានដោះសេចក្តីកំភូតចេញហើយ នោះត្រូវឲ្យនិយាយសេចក្តីពិត នឹងអ្នកជិតខាងរៀងខ្លួនវិញ ដ្បិតយើងរាល់គ្នាជាអវយវៈផងគ្នាទៅវិញទៅមក។ អេភេសូរ ៤:២៥
អតិថិជនម្នាក់របស់កម្មវិធីកក់តាក់ស៊ីមួយ ក្នុងទីក្រុង បានចែកចាយថា គាត់មានការពិបាកយ៉ាងខ្លាំង នៅក្នុងការអត់ធ្មត់ចំពោះក្លិនស្អុយ របស់ផ្លែឈើដែលមានក្លិនស្អុយបំផុតនៅលើពិភពលោក ដែលអ្នកបើកបរម្នាក់បានបរិភោគពេលកំពុងបើកបរ ហើយអ្នកបើកបរម្នាក់ទៀតបានឈ្លោះប្រកែកតាមទូរស័ព្ទជាមួយមិត្តស្រីរបស់គាត់។ អ្នកបើកបរម្នាក់ទៀតក៏បានព្យាយាមបញ្ចុះបញ្ចូលគាត់ ឲ្យដាក់លុយវិនិយោគ នៅក្នុងគម្រោងផុនហ្ស៊ីដែលជាគម្រោងបោកប្រាស់។ ក្នុងករណីនីមួយៗ គាត់មិនបានបញ្ចេញមតិមិនល្អនោះទេ តែផ្ទុយទៅវិញ គាត់បានឲ្យពិន្ទុផ្កាយ៥ដល់អ្នកបើកបរនីមួយៗ។ គាត់ពន្យល់ថា “ពួកគេទាំងអស់ហាក់ដូចជាមនុស្សល្អទេ។ ខ្ញុំមិនចង់ឲ្យគេលុបឈ្មោះពួកគេចេញពីកម្មវិធីនេះ ដោយសារការបញ្ចេញយោបល់អាក្រក់របស់ខ្ញុំទេ”។ ដូចនេះ ក្នុងរឿងនេះ គាត់បានបញ្ចេញមតិក្លែងក្លាយ ដោយលាក់បាំងការពិតមិនឲ្យអ្នកបើកបរ និងអ្នកដទៃបានដឹង។
យើងប្រហែលជាលាក់បាំងការពិតពីអ្នកដទៃ ដោយសារមូលហេតុផ្សេងៗ។ ប៉ុន្តែ សាវ័កប៉ុលបានលើកទឹកចិត្តអ្នកជឿព្រះ នៅទីក្រុងអេភេសូរ ឲ្យនិយាយពាក្យពិត ចំពោះគ្នាទៅវិញទៅមក ដោយសេចក្តីស្រឡាញ់ ក្នុងនាមជាមនុស្សដែលបានកើតជាថ្មីក្នុងព្រះគ្រីស្ទ។ ការនេះតម្រូវឲ្យមានទម្លាប់នៃការរស់នៅដែលសុចរិត និងបរិសុទ្ធ(អេភេសូរ ៤:២៤) ជាជីវិតដែលបានញែកចេញថ្វាយព្រះអង្គ និងបង្ហាញឲ្យគេស្គាល់ផ្លូវរបស់ព្រះអង្គ តាមរយៈការប្រព្រឹត្តរបស់ពួកគេ។ ពួកគេត្រូវជំនួសការកុហក ដោយការនិយាយពាក្យពិតដល់គ្នាទៅវិញទៅមក ព្រោះការកុហកធ្វើឲ្យបែកបាក់ និងបង្អាក់ការរួបរួម តែសេចក្តីពិតធ្វើឲ្យយើងរួបរួមគ្នា ក្នុងនាមជាអ្នកជឿ។ គឺដូចដែលគាត់មានប្រសាសន៍ថា “ដូច្នេះ ដែលបានដោះសេចក្តីកំភូតចេញហើយ នោះត្រូវឲ្យនិយាយសេចក្តីពិត នឹងអ្នកជិតខាងរៀងខ្លួនវិញ ដ្បិតយើងរាល់គ្នាជាអវយវៈផងគ្នាទៅវិញទៅមក”(ខ.២៥)។
ព្រះយេស៊ូវជួយយើងឲ្យមានចិត្តក្លាហាន ដើម្បីជៀសវាងការកុហក និង “ការបញ្ចេញមតិក្លែងក្លាយ” ដែលអាចបង្អាក់ការរួបរួមជាមួយអ្នកជឿដទៃទៀត។ ការរស់នៅដោយសេចក្តីស្រឡាញ់ តាមការដឹកនាំរបស់ព្រះអង្គ នឹងជួយឲ្យយើងនិយាយការពិត ដោយចិត្តសប្បុរស និងសេចក្តីស្រឡាញ់(ខ.៣២)។—Marvin Williams
តើអ្នកបានជួបការល្បួងឲ្យលាក់បាំងការពិតពីរអ្នកជឿដទៃទៀត នៅពេលណា? ហេតុអ្វីអ្នកចាំបាច់ត្រូវនិយាយពាក្យពិត ដោយចិត្តស្មោះត្រង់?
ឱព្រះអម្ចាស់ សូមព្រះអង្គជួយទូលបង្គំ ឲ្យមានភាពពិតត្រង់ ក្នុងទំនាក់ទំនង ដោយសេចក្តីស្រឡាញ់ ចំពោះព្រះអង្គ និងអ្នកដទៃ។
គម្រោងអានព្រះគម្ពីររយៈពេល១ឆ្នាំ : លេវីវិន័យ ២៣-២៤ និងម៉ាកុស ១:១-២២