សន្តិភាពដែលព្រះយេស៊ូវបានបង្កើត
ដោយJohn Blase
March 17, 2025
កូល៉ុស ១:១៥-២០
ដ្បិតព្រះបានសព្វព្រះហឫទ័យ ...ឲ្យបានផ្សះផ្សាគ្រប់ទាំងអស់ ឲ្យជានឹងអង្គទ្រង់ ដោយសារព្រះរាជបុត្រានោះ ... ដោយសារព្រះលោហិតនៃឈើឆ្កាងទ្រង់។ កូល៉ុស ១:១៩-២០
លោកភីលីព ពេទីត(Philippe Petit) ជាសិល្បករដើរនៅលើខ្សែពួរ ដែលមានឈ្មោះល្បីល្បាញ នៅឆ្នាំ១៩៧១ កាលគាត់ដើរនៅលើខ្សែពួរ ពីប៉មមួយទៅប៉មមួយទៀត របស់ព្រះវិហារធំណូធ័រ ដាម នៅទីក្រុងប៉ារីស។ បីឆ្នាំក្រោយមក គាត់ត្រូវប៉ូលិសចាប់ខ្លួន ដោយសារគាត់បានដើរលើខ្សែពួរឲ្យគ្មានការអនុញ្ញាត នៅចន្លោះអាគារភ្លោះ ដែលធ្លាប់តែជាអាគាខ្ពស់ដ៏ល្បីល្បាញប្រចាំទីក្រុងញូយ៉ក។ តែនៅឆ្នាំ១៩៨៧ លោកពេទីតបានដើរនៅលើខ្សែពួរ តាមរបៀបខុសពីមុន។ ចៅហ្វាយក្រុងរបស់ទីក្រុងយេរូសាឡិមបានអញ្ជើញគាត់ ឲ្យដើរនៅលើខ្សែពួរឆ្លងកាត់ជ្រលងហ៊ីនណូន ធ្វើជាផ្នែកមួយនៃការប្រារព្ធពិធីបុណ្យរបស់ប្រទេសអ៊ីស្រាអែលនៅឆ្នាំនោះ។ នៅពេលដែលគាត់ដើរនៅលើខ្សែពួរបានពាក់កណ្តាល គាត់ក៏បានប្រលែងសត្វព្រាបមួយក្បាល ជានិមិត្តរូបតំណាងឲ្យសម្រស់នៃសន្តិភាព។ នេះជាការសម្ដែងដ៏គ្រោះថ្នាក់ខុសប្លែកពីធម្មតា ក្នុងបុព្វហេតុដើម្បីសន្តិភាព។ ក្រោយមក លោកពេទីតក៏បាននិយាយថា “ក្នុងរយៈពេលមួយភ្លែតនោះ ហ្វូងមនុស្សទាំងមូលដែលកំពុងទស្សនា មិនបានភ្លេចការប្រកាន់ពូជសាសន៍ និងនិន្នាការនយោបាយ”។
ព្រឹត្តិការណ៍នៃការដើរនៅលើខ្សែពួររបស់លោកពេទីត បានធ្វើឲ្យខ្ញុំនឹកចាំ អំពីព្រឹត្តិការណ៍ដ៏សំខាន់មួយ ដែលបានកើតឡើង នៅពេលដែលព្រះកាយរបស់ព្រះយេស៊ូវ កំពុងជាប់នៅលើឈើឆ្កាង នៅចន្លោះផែនដី និងស្ថានសួគ៌។ សាវ័កប៉ុលបានប្រាប់យើងថា “ដ្បិតព្រះបានសព្វព្រះហឫទ័យ ឲ្យគ្រប់ទាំងសេចក្តីពោរពេញបានស្ថិតនៅក្នុងទ្រង់ ហើយឲ្យបានផ្សះផ្សាគ្រប់ទាំងអស់ ឲ្យជានឹងអង្គទ្រង់ ដោយសារព្រះរាជបុត្រានោះ ទោះបើរបស់នៅស្ថានសួគ៌ ឬនៅផែនដីក្តី ទាំងតាំងស្ពានមេត្រី ដោយសារព្រះលោហិតនៃឈើឆ្កាងទ្រង់”(កូល៉ុស ១:១៩-២០)។ សាវ័កប៉ុលបានមានប្រសាសន៍ទៀតថា កាលពីដើម យើងជាខ្មាំងសត្រូវរបស់ព្រះ(ខ.២១) តែឥឡូវនេះ យើងមិនមែនជាខ្មាំងសត្រូវរបស់ព្រះអង្គទៀតទេ។ ព្រះអង្គមិនគ្រាន់តែបានផ្សព្វផ្សាយសន្តិភាពប៉ុណ្ណោះទេ តែថែមទាំងបានបង្កើតសន្តិភាព ដោយបង្ហូរព្រះលោហិតទ្រង់ នៅលើឈើឆ្កាង។ ព្រះអង្គបានសម្រេចជោគជ័យ ដែលគ្មាននរណាអាចធ្វើបានដូចព្រះអង្គ។ សន្តិភាពដែលព្រះអង្គបានប្រទាននឹងស្ថិតស្ថេរជារៀងរហូត។—John Blasé
តើពាក្យ សន្តិភាព មានអត្ថន័យយ៉ាងណាសម្រាប់អ្នក? តើអ្នកបានដកពិសោធន៍ជាមួយនឹងសន្តិភាពរបស់ព្រះយេស៊ូវ ដូចម្តេចខ្លះ?
ឱព្រះយេស៊ូវ ទូលបង្គំសូមសរសើរដំកើងព្រះអង្គ សម្រាប់ការប្រទានអំណោយនៃសន្តិភាព។
គម្រោងអានព្រះគម្ពីររយៈពេល១ឆ្នាំ : ចោទិយកថា ៣០-៣១ និង ម៉ាកុស ១៥:១-២៥