ការសោកសង្រេងដែលមានន័យជ្រៅ
ដោយMike Wittmer
April 11, 2025
២ពង្សាវតាក្សត្រ ២:៧-១៤
ខ្ញុំស្បថដោយនូវព្រះយេហូវ៉ាដ៏មានព្រះជន្មរស់នៅ ហើយដោយព្រលឹងលោកដ៏រស់នៅដែរថា ខ្ញុំមិនព្រមឃ្លាតពីលោកទេ។ ២ពង្សាវតាក្សត្រ ២:២
បុរសម្នាក់ឈ្មោះ ហ៊ិដេសាប៊ូរ៉ុ អ៊ូអេណូ(Hidesaburō Ueno) បានធ្វើការជាគ្រូបង្រៀននៅសកលវិទ្យាល័យមួយ នៅទីក្រុងតូក្យូ នៅទសវត្សរ៍ឆ្នាំ១៩២០។ រៀងរាល់ពេលរសៀល គាត់តែងតែធ្វើដំណើរតាមរថភ្លើង ត្រឡប់មកផ្ទះវិញ នៅម៉ោង៣ ឃើញឆ្កែគាត់ ឈ្មោះ ហាឈិកុ(Hachiko) កំពុងរង់ចាំទទួលគាត់នៅស្ថានីយរថភ្លើង។ ថ្ងៃមួយ សាស្ត្រាចារ្យអ៊ូអេណូ ក៏បានដាច់សរសៃឈាមខួរក្បាល ក្នុងអំឡុងពេលបង្រៀន ហើយក៏បានទទួលមរណៈភាព។ ពេលដែលហាឈិកុមិនឃើញគាត់ចេញពីរថភ្លើងដូចសព្វមួយដង វាក៏បានបន្តនៅរង់ចាំអស់មួយរយៈពេល ហើយក៏បានត្រឡប់ទៅផ្ទះវិញ។ វាក៏បានត្រឡប់មករង់ចាំគាត់ នៅស្ថានីយរថភ្លើង នៅថ្ងៃបន្ទាប់ នៅម៉ោង៣ ហើយបន្តធ្វើដូចនេះទៀត ជារៀងរាល់ថ្ងៃ អស់រយៈពេល១០ឆ្នាំ។ ភាពស្មោះត្រង់របស់ហាឈិកុបានប៉ះពាល់ចិត្តជនជាតិជប៉ុនជាច្រើននាក់ ដែលបានមកអង្គុយនៅក្បែរវា។
រឿងនេះបានធ្វើឲ្យខ្ញុំនឹកចាំ អំពីការប្តេជ្ញាចិត្តដែលលោកអេលីសេមានចំពោះលោកអេលីយ៉ា ជាគ្រូរបស់គាត់។ ថ្ងៃមួយ លោកអេលីសេដឹងថា លោកអេលីយ៉ានឹងចាកចេញទៅ តែលោកអេលីសេចង់ឃាត់គាត់។ បន្ទាប់មក រទេះសេះភ្លើងក៏បានលើកគាត់ឡើងទៅស្ថានសួគ៌ នៅពីមុខគាត់។ ពេលដែលបានឃើញដូចនេះ លោកអេលីសេក៏ពោលឡើងថា “ឱលោកឪពុក លោកឪពុកខ្ញុំអើយ នុ៎ះន៏ ព្រះរាជរថនឹងទ័ពសេះរបស់ពួកអ៊ីស្រាអែលហើយ”(២ពង្សាវតាក្សត្រ ២:១២)។ គាត់ក៏បានរើសក្រម៉ារបស់លោកអេលីយ៉ា ជាតំណាងឲ្យអំណាចដែលហោរាអេលីយ៉ាបានទទួលពីព្រះ ដែលបានញែកទឹកទន្លេយ័រដាន់ មុននោះបនិ្តច(ខ.៨) ហើយក៏បានសួរថា “តើព្រះយេហូវ៉ា ជាព្រះនៃអេលីយ៉ា ទ្រង់គង់នៅឯណា?”(ខ.១៤)។ គាត់បានយកក្រមានោះវាយទឹក ទឹកទន្លេក៏ញែក ដូចកាលដែលគ្រូរបស់គាត់បានធ្វើដែរ។ ថ្ងៃនោះ ជាថ្ងៃដែលគាត់ស្គាល់រស់ជាតិល្វីងផងផ្អែមផង!
តើអ្នកបានបាត់បង់មនុស្សជាទីស្រឡាញ់ទេ? គ្មានពាក្យអ្វីដែលអាចពិពណ៌នាអំពីការឈឺចាប់របស់អ្នកបានឡើយ។ អ្នកប្រហែលជាសម្រក់ទឹកភ្នែក ដោយការនឹកចាំអំពីសេចក្តីស្រឡាញ់ដែលអ្នកមានចំពោះពួកគេ។ ការឈឺចាប់កើតមានក្នុងជម្រៅចិត្ត ព្រោះសេចក្តីស្រឡាញ់របស់អ្នកមានភាពជ្រាលជ្រៅណាស់។ នេះជាអារម្មណ៍ជូរល្វីងលាយផ្អែម! អរព្រះគុណព្រះអង្គ ដែលបានឲ្យអ្នកមានមនុស្សជាទីស្រឡាញ់នោះ និងបានឲ្យអ្នកមានសេចក្តីស្រឡាញ់ចំពោះគាត់។ លោកអេលីសេបានរើសក្រមារបស់លោកអេលីសេ ដោយនឹកចាំដល់គាត់។ តើអ្នកនឹងធ្វើអ្វី សម្រាប់ពួកគេ?—Mike Wittmer
តើមានអ្វីខ្លះដែលធ្វើឲ្យអ្នកនឹកចាំ អំពីមនុស្សជាទីស្រឡាញ់ដែលបានចាកចេញពីអ្នក? តើព្រះយេស៊ូវអាចជួយអ្នកសែងបន្ទុកនេះ យ៉ាងដូចម្តេចខ្លះ?
ឱព្រះវរបិតា ទូលបង្គំសូមអរព្រះគុណព្រះអង្គ ដែលបានឲ្យទូលបង្គំមានមនុស្សជាទីស្រឡាញ់ ក្នុងជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ១៧-១៨ និង លូកា ១១:១-២៨