ព្រះយេស៊ូវមានព្រះបន្ទូលទៅនាងថា ប្អូននាងនឹងរស់ឡើងវិញ។ យ៉ូហាន ១១:២៣
គ្រូគង្វាលរបស់ខ្ញុំជាជាតិអាមេរិក បានមកលេងទីប្រជុំជនតូចមួយ នៅតំបន់អាហ្វ្រិកខាងលិច។ គាត់បានព្យាយាមមកព្រះវិហារឲ្យទាន់ម៉ោង ដើម្បីចូលរួមកម្មវិធីថ្វាយបង្គំនៅម៉ោង១០ព្រឹក។ ទោះជាយ៉ាងក៏ដោយ ពេលគាត់មកដល់ គាត់មិនឃើញមាននរណាម្នាក់មានវត្តមាននៅទីនោះសោះ។ ដូចនេះ គាត់ក៏បានរង់ចាំ អស់មួយម៉ោងហើយ មួយម៉ោងទៀត។ ទីបំផុត នៅម៉ោងប្រហែល១២ ៣០នាទី លោកគ្រូគង្វាលប្រចាំតំបន់បានមកដល់ បន្ទាប់ពីការដើរមកពីចម្ងាយ ដោយមានក្រុមចម្រៀងមកជាមួយ និងសមាជិកពួកជំនុំនៅក្នុងក្រុងនោះ ហើយកម្មវិធីថ្វាយបង្គំក៏បានចាប់ផ្តើម។ ក្រោយមកគាត់ថា កម្មវិធីនោះបានចាប់ផ្តើមតាមពេលដែលព្រះបានកំណត់។ គាត់ថា “ព្រះវិញ្ញាណបានស្វាគមន៍យើងចូលក្នុងការថ្វាយបង្គំ ហើយព្រះទ្រង់មិនដែលយឺតឡើយ”។ គ្រូគង្វាលរបស់ខ្ញុំបានដឹងថា វប្បធម៌នៅទីនោះ មានភាពខុសប្លែកពីវប្បធម៌របស់គាត់ ដោយមូលហេតុដ៏ល្អ។
ការកំណត់ពេលវេលាហាក់ដូចជាមានភាពខុសគ្នាពីកន្លែងមួយទៅកន្លែងមួយ តែព្រះគម្ពីរទាំងមូលបានចែង អំពីលក្ខណៈដ៏ឥតខ្ចោះរបស់ព្រះ ដែលតែងតែទាន់ពេលជានិច្ច។ ហេតុនេះហើយបានជា ព្រះយេស៊ូវបានធ្វើដំណើរមកប្រោសលោកឡាសា បន្ទាប់ពីគាត់បានស្លាប់អស់៤ថ្ងៃហើយ។ កាលនោះ បងស្រីរបស់លោកឡាសាបានសួរព្រះអង្គថា “ព្រះអម្ចាស់អើយ បើសិនជាទ្រង់បានគង់នៅទីនេះ នោះប្អូនខ្ញុំម្ចាស់មិនបានស្លាប់ទេ”(យ៉ូហាន ១១:២១)។ យើងប្រហែលជាគិតដូចនេះផងដែរ ដោយឆ្ងល់ថា ហេតុអ្វីព្រះទ្រង់មិនប្រញាប់ជួយដោះស្រាយបញ្ហាយើង។ តែយកល្អ យើងគួរតែរង់ចាំចម្លើយ និងព្រះចេស្តាព្រះអង្គ ដោយជំនឿ។
គឺដូចដែលទេវវិទូឈ្មោះ ហោវើត ធួរមិន(Howard Thurman) បានសរសេរថា “ឱព្រះវរបិតា យើងខ្ញុំរង់ចាំព្រះអង្គ ទាល់តែយើងខ្ញុំបានទទួលកម្លាំងពីព្រះអង្គ ទាល់តែយើងខ្ញុំមានចិត្តដូចព្រះទ័យព្រះអង្គ ហើយទាល់តែទូលបង្គំអត់ទោសឲ្យគេ ដូចព្រះអង្គបានអត់ទោសឲ្យទូលបង្គំ។ ឱព្រះអង្គអើយ ទូលបង្គំសូមរង់ចាំហើយ រង់ចាំទៀត”។ ដូចនេះ ពេលណាព្រះទ្រង់ឆ្លើយតប យើងនឹងបានទទួលព្រះពរដោយការអស្ចារ្យ ដូចលោកឡាសាដែរ ដោយព្រះអង្គមិនដែលយឺតពេលឡើយ។—PATRICIA RAYBON
តើអ្នកកំពុងរង់ចាំព្រះធ្វើអ្វី ឬប្រទានអ្វីដល់អ្នក? តើអ្នកអាចរង់ចាំព្រះអង្គ ដោយជំនឿយ៉ាងដូចម្តេចខ្លះ?
ឱព្រះវរបិតា ទូលបង្គំរង់ចាំព្រះអង្គ។ សូមព្រះអង្គប្រទានទូលបង្គំ នូវកម្លាំង និងក្តីសង្ឃឹម ខណៈពេលដែលទូលបង្គំកំពុងរង់ចាំព្រះអង្គ ដោយចិត្តស្មោះត្រង់។
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ៤១-៤២ និង ម៉ាថាយ ១២:១-២៣
