ដូច្នេះ កុំឲ្យខ្វល់ខ្វាយថា តើត្រូវបរិភោគអ្វី ឬស្លៀកពាក់អ្វីនោះឡើយ ដ្បិតគឺជាសាសន៍ដទៃទេតើ ដែលខំស្វែងរករបស់ទាំងនោះវិញ ឯព្រះវរបិតានៃអ្នករាល់គ្នា ដែលគង់នៅស្ថានសួគ៌ ទ្រង់ជ្រាបហើយ ថាអ្នករាល់គ្នាត្រូវការនឹងរបស់ទាំងនោះដែរ។ ម៉ាថាយ ៦:៣១-៣២
ព្រះយេស៊ូវសព្វព្រះទ័យឲ្យអ្នកដើរតាមព្រះអង្គ រួចផុតពីការព្រួយបារម្ភ។ ក្នុងបទគម្ពីរ ម៉ាថាយ ៦:២៥-៣៤ ព្រះអង្គបានលើកឧទាហរណ៍៧យ៉ាង ដើម្បីដកការថប់បារម្ភរបស់យើងចេញ។ ក្នុងចំណោមឧទាហរណ៍ទាំងនោះ ព្រះអង្គក៏បានមានបន្ទូលអំពីអាហារ ភេសជ្ជៈ និងសំលៀកបំពាក់ ហើយបន្ទាប់មក ព្រះអង្គមានបន្ទូលថា “ឯព្រះវរបិតានៃអ្នករាល់គ្នា ដែលគង់នៅស្ថានសួគ៌ ទ្រង់ជ្រាបហើយ ថាអ្នករាល់គ្នាត្រូវការនឹងរបស់ទាំងនោះដែរ”(ម៉ាថាយ ៦:៣២)។
ព្រះបន្ទូលព្រះយេស៊ូវប្រាកដជាមានន័យថា ព្រះទ្រង់ជ្រាបអំពីតម្រូវការយើង ហើយទន្ទឹមនឹងនោះ ព្រះអង្គក៏សព្វព្រះទ័យនឹងបំពេញតម្រូវការយើងផងដែរ។ ព្រះអង្គមានបន្ទូលសង្កត់ធ្ងន់ថា យើងមានព្រះវរបិតា។ ហើយព្រះវរបិតាល្អប្រសើរជាងឪពុកទាំងអស់នៅផែនដី។
ខ្ញុំមានកូន៥នាក់។ ខ្ញុំចូលចិត្តបំពេញតម្រូវការរបស់ពួកគេ។ តែការយល់ដឹងរបស់ខ្ញុំអំពីតម្រូវការរបស់ពួកគេ គឺខ្វះមិនដល់ការយល់ដឹងរបស់ព្រះ យ៉ាងហោចណាស់តាមរបៀប៣យ៉ាង។
ទី១ ពេលនេះ ខ្ញុំមិនដឹងថា កូនរបស់ខ្ញុំកំពុងនៅកន្លែងណាទេ។ ខ្ញុំអាចស្មានថា ពួកគេកំពុងនៅផ្ទះ ឬនៅកន្លែងធ្វើការ ឬនៅសាលារៀន ដោយមានសុខភាពល្អ និងសុវត្ថិភាព។ តែពួកគេប្រហែលកំពុងតែដេកដួលនៅលើចិញ្ចើមថ្នល់ ដោយសារគាំងបេះដូងក៏មិនដឹង។
ទី២ ខ្ញុំមិនដឹងថា ពួកគេកំពុងតែគិតអ្វីខ្លះ នៅក្នុងចិត្ត នៅពេលណាមួយ។ ខ្ញុំអាចស្មាន ពីពេលមួយទៅពេលមួយទៀត។ តែពួកគេប្រហែលកំពុងមានការភ័យខ្លាច ឬឈឺចាប់ ស្រេកឃ្លាន ឬក៏មានតម្រេក ភាពលោភលន់ ឬមួយមានអំណរ ឬក្តីសង្ឃឹមជាដើម។ ខ្ញុំមិនអាចមើលចិត្តរបស់ពួកគេឃើញទេ។ សូម្បីតែពួកគេក៏មិនស្គាល់ចិត្តខ្លួនឯងច្បាស់ដែរ។
ទី៣ ខ្ញុំមិនដឹងអំពីពេលអនាគតរបស់ពួកគេទេ។ ឥឡូវនេះ ពួកគេប្រហែលជាសុខសប្បាយ និងមានភាពនឹងនរ។ តែនៅថ្ងៃស្អែក ពួកគេប្រហែលជាសោកសង្រេងយ៉ាងខ្លាំង។
បានសេចក្តីថា ខ្ញុំមិនអាចធ្វើជាមូលហេតុដ៏រឹងមាំ ដែលនាំឲ្យពួកគេត្រូវឈប់ព្រួយបារម្ភនោះឡើយ។ អាចមានរឿងជាច្រើនដែលកំពុងកើតឡើងចំពោះពួកគេ នៅពេលឥឡូវនេះ ឬនៅថ្ងៃស្អែក ដែលខ្ញុំមិនបានដឹង។ តែព្រះវរបិតា នៅស្ថានសួគ៌ មិនដូច្នោះទេ។ ព្រះអង្គជ្រាបអំពីយើង គ្មានកន្លែងចន្លោះ ព្រះអង្គជ្រាបថា យើងនៅទីណា នៅពេលនេះ និងថ្ងៃស្អែក ជ្រាបទាំងក្រៅ និងក្នុងចិត្តយើងផង។ ព្រះអង្គជ្រាបអំពីតម្រូវការគ្រប់យ៉ាង។
ជាងនេះទៅទៀត ព្រះអង្គក៏សព្វព្រះទ័យនឹងបំពេញតម្រូវការយើង។ សូមយើងនឹកចាំពាក្យ “លើសជាងទៅទៀត” ក្នុងបទគម្ពីរម៉ាថាយ ៦:៣០ ដែលចែងថា “បើព្រះទ្រង់តុបតែងស្មៅយ៉ាងដូច្នោះ នោះឱមនុស្សមានជំនឿតិចអើយ តើទ្រង់មិនតុបតែងឲ្យអ្នករាល់គ្នា លើសជាងទៅទៀតទេឬអី?”
ម្យ៉ាងទៀត ព្រះអង្គមានសមត្ថភាពធ្វើអ្វីដែលព្រះអង្គសព្វព្រះទ័យនឹងធ្វើ (ព្រះអង្គចិញ្ចឹមសត្វបក្សីរាប់ពាន់លានក្បាល ជារៀងរាល់ម៉ោង នៅទូទាំងពិភពលោក, ម៉ាថាយ ៦:២៦)។
ដូចនេះ ចូរយើងទុកចិត្តព្រះបន្ទូលរបស់ព្រះយេស៊ូវ ដែលសន្យាថា ព្រះអង្គនឹងបំពេញតម្រូវការរបស់យើង។ គឺដូចដែលព្រះយេស៊ូវបានត្រាស់ហៅយើង ឲ្យទុកចិត្តព្រះអង្គ ដោយមានបន្ទូលថា “ឯព្រះវរបិតានៃអ្នករាល់គ្នា ដែលគង់នៅស្ថានសួគ៌ ទ្រង់ជ្រាបហើយ ថាអ្នករាល់គ្នាត្រូវការនឹងរបស់ទាំងនោះដែរ”។
