គ្មានសេចក្តីសង្គ្រោះ ដោយសារអ្នកណាទៀតសោះ។ កិច្ចការ ៤:១២
បន្ទាប់ពីយន្តហោះរបស់លោកប្រេម ប្រាដហាំ(Prem Pradham ឆ្នាំ១៩២៤-១៩៩៨) ត្រូវគេបាញ់ទម្លាក់ ក្នុងអំឡុងសង្រ្គាមលោកលើកទី២ គាត់ក៏បានរងរបួស ក្នុងការលោតឆ័ត្រយោង ទៅរកទីសុវត្ថិភាព។ គាត់ក៏បានដើរជើងម្ខាង អស់មួយជីវិត។ គាត់ធ្លាប់និយាយថា “ខ្ញុំពិការជើងម្ខាង។ តើវាមិនចម្លែកទេឬ ដែលព្រះទ្រង់បានត្រាស់ហៅខ្ញុំ ឲ្យផ្សាយដំណឹងល្អ ក្នុងតំបន់ជួរភ្នំហិម៉ាឡៃ?” ហើយគាត់ក៏បានទៅផ្សាយដំណឹងល្អនៅប្រទេសនេប៉ាល់ ដោយជួបការបៀតបៀន ដែលរាប់បញ្ចូលការជាប់ឃុំខ្លួន ក្នុង “គុកមរណៈ” ដែលនៅទីនោះ អ្នកទោសត្រូវជួបស្ថានភាពពិបាកធ្ងន់ធ្ងរ។ ក្នុងរយៈពេល១៥ឆ្នាំ លោកប្រេមជាប់គុក នៅក្នុងពន្ធធនាគារ១៤កន្លែងខុសគ្នា។ ទោះជាយ៉ាងណាក៏ដោយ ការធ្វើបន្ទាល់ដ៏ក្លាហានរបស់គាត់ បានបង្កើតផលផ្លែនៃជីវិតផ្លាស់ប្រែ ថ្វាយព្រះគ្រីស្ទ ដែលរួមមាន អ្នកយាមគុក និងអ្នកទោស ដែលបាននាំដំណឹងល្អនៃព្រះយេស៊ូវ ទៅប្រាប់ប្រជាជនរបស់ខ្លួន។
សាវ័កពេត្រុសបានជួបការបៀតបៀន ដោយសារជំនឿលើព្រះយេស៊ូវ ដោយសារព្រះបានប្រើគាត់ឲ្យប្រោស “បុរសពិការម្នាក់” ឲ្យជា(កិច្ចការ ៤:៩)។ តែគាត់បានប្រើឱកាសពេលនោះ ដើម្បីថ្លែងអំពីព្រះគ្រីស្ទ ដោយចិត្តក្លាហាន(ខ.៨-១៣)។
សព្វថ្ងៃនេះ យើងក៏អាចជួបការបៀតបៀនដូចសាវ័កពេត្រុសផងដែរ(ខ.១០-១១) តែយើងមានសមាជិកគ្រួសារ មិត្តរួមការងារ មិត្តរួមថ្នាក់ និងអ្នកដទៃទៀតដែលយើងស្គាល់ ដែលត្រូវការឮអំពីព្រះមួយអង្គដែលមានសេចក្តីសង្រ្គោះ(ខ.១២) ដែលបានសុគត ដើម្បីបង់ថ្លៃលោះបាបយើង ហើយបានមានព្រះជន្មរស់ពីសុគត ជាភស្តុតាងបញ្ជាក់ថា ព្រះអង្គមានអំណាចអត់ទោសបាប(ខ.១០)។ ចូរយើងអធិស្ឋានឲ្យពួកគេបានឮដំណឹងល្អនៃសេចក្តីសង្រ្គោះ ដែលមានក្នុងព្រះយេស៊ូវ ពេលយើងប្រកាសប្រាប់ពួកគេ ដោយចិត្តក្លាហាន។—Arthur Jackson
តើអ្នកនឹងផ្សាយអំពីព្រះយេស៊ូវដោយចិត្តក្លាហានយ៉ាងដូចម្តេចខ្លះ នៅថ្ងៃនេះ? តើមានអ្វីរារាំងអ្នក មិនឲ្យប្រាប់អ្នកដទៃ អំពីព្រះអង្គ? តើអ្នកអាចរៀបចំខ្លួនយ៉ាងណាខ្លះ ដើម្បីឲ្យអាចផ្សាយដំណឹងល្អកាន់តែមានប្រសិទ្ធភាពឡើង?
ឱព្រះវរបិតា ទូលបង្គំសូមអរព្រះគុណ សម្រាប់ការអ្វីដែលព្រះអង្គបានធ្វើសម្រាប់ទូលបង្គំ។ សូមព្រះអង្គជួយទូលបង្គំ ឲ្យចែកចាយជំនឿទូលបង្គំដល់អ្នកដទៃ ក្នុងព្រះនាមព្រះយេស៊ូវ។
គម្រោងអានព្រះគម្ពីររយៈពេល១ឆ្នាំ : អេសេគាល ៣០-៣២ និង ១ពេត្រុស ៤
