បងប្អូនអើយ កុំឲ្យមានសេចក្តីជំនឿ ជឿដល់ព្រះយេស៊ូវគ្រីស្ទ ជាព្រះអម្ចាស់ដ៏ឧត្តមនៃយើង ដោយរើសមុខអ្នកណាឡើយ។ យ៉ាកុប ២:១
សោកនាដកម្មបានកើតឡើង នៅក្បែរទីក្រុងឡូស អែនជែលេស កាលពីខែមករា ឆ្នាំ ២០២០ ពេលដែលឧទ្ធម្ភាគចក្រមួយគ្រឿងបានធ្លាក់ បណ្តាលឲ្យមនុស្ស៩នាក់បាត់បង់ជីវិត។ នៅពេលនោះ សារព័ត៌មានភាគច្រើនបានផ្សាយថា “លោកកូប ប្រាយអិន(Kobe Bryant) ដែលជាកំពូលកីឡាកររបស់ក្រុម NBA និងកូនស្រីឈ្មោះ ជីអាណា(Gianna មានឈ្មោះក្រៅ ‘Gigi’)” និងមនុស្ស៧នាក់ទៀត បានបាត់បង់ជីវិតនៅក្នុងគ្រោះថ្នាក់នោះ”។
វាជារឿងធម្មតា ហើយស្រួលយល់ទេ ដែលគេផ្តោតទៅលើអ្នកដែលឈ្មោះល្បី នៅក្នុងហេតុការណ៍ដ៏រន្ធត់ដូចនេះ ហើយការបាត់បង់ជីវិតរបស់លោកកូបេ និងកូនស្រីវ័យជំទង់របស់គាត់ ឈ្មោះជីជី គឺពិតជាគួរឲ្យសោកសៅ លើសពាក្យពណ៌នា។ ប៉ុន្តែ យើងត្រូវតែចាំថា ក្នុងរូបភាពដ៏ធំនៃជីវិត គ្មានខ្សែបន្ទាត់ពុះចែកណាមួយ ដែលធ្វើឲ្យជីវិតរបស់ “មនុស្ស៧នាក់ទៀត” (Payton, Sarah, Christina, Alyssa, John, Keri, និង Ara) សំខាន់តិចជាងនោះឡើយ។
ជួនកាល យើងចាំបាច់ត្រូវចាំថា មនុស្សម្នាក់ៗសុទ្ធតែសំខាន់ នៅក្នុងព្រះនេត្រព្រះ។ សង្គមបានបញ្ចាំងពន្លឺដ៏ភ្លឺចិញ្ចាច មកលើអ្នកមាន និងអ្នកល្បីឈ្មោះ។ ប៉ុន្តែ ទ្រព្យសម្បត្តិ និងកេរ្តិ៍ឈ្មោះ មិនបានធ្វើឲ្យមនុស្សម្នាក់ សំខាន់ជាងអ្នកជិតខាងរបស់អ្នក ឬក្មេងដែលកំពុងលេងនៅតាមផ្លូវមុខផ្ទះអ្នក ឬក៏មនុស្សដែលកំពុងជួបរឿងអាក្រក់ ឬសំខាន់ជាងអ្នកនោះឡើយ។
ព្រះទ្រង់បានបង្កើតមនុស្សម្នាក់ៗនៅលើផែនដីនេះ ឲ្យដូចរូបអង្គទ្រង់(លោកុប្បត្តិ ១:២៧) ទោះពួកគេជាអ្នកមាន ឬក្រក៏ដោយ(សុភាសិត ២២:២)។ ក្នុងព្រះនេត្រព្រះ ទ្រង់មិនបានឲ្យតម្លៃនរណាម្នាក់ ខ្លាំងជាងអ្នកផ្សេងទៀត(រ៉ូម ២:១១) ហើយមនុស្សម្នាក់ៗត្រូវការព្រះអង្គសង្រ្គោះ(៣:២៣)។
យើងកំពុងថ្វាយសិរីល្អដល់ព្រះដ៏ធំប្រសើរនៃយើង ពេលណាយើងមិនមានភាពលម្អៀង ឬរើសមុខ ទោះនៅព្រះវិហារ(យ៉ាកុប ២:១-៤) ឬក្នុងសង្គមក៏ដោយ។—Dave Branon
តើអ្នកអាចបង្ហាញសេចក្តីស្រឡាញ់ដូចម្តេចខ្លះ ដល់មនុស្សទាំងអស់ ទាំងអ្នកមាន អ្នកក្រ អ្នកល្បីឈ្មោះ ឬអ្នកដែលគ្មានគេស្គាល់? តើព្រះយេស៊ូវបានបង្ហាញសេចក្តីស្រឡាញ់ប្រភេទនេះ យ៉ាងដូចម្តេចខ្លះ?
ឱព្រះវរបិតាដែលគង់នៅស្ថានសួគ៌ សូមព្រះអង្គជួយទូលបង្គំឲ្យបង្ហាញសេចក្តីស្រឡាញ់ និងភាពសប្បុរសដល់មនុស្សទាំងអស់ ទោះពួកគេមានឋានៈដូចម្តេចក៏ដោយក្នុងជីវិត។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១៦-១៨ និង លូកា ២:១-២៤
