ភីលីព ២:១២-១៦
អ្នករាល់គ្នាភ្លឺនៅកណ្តាលគេ ដូចជាតួពន្លឺនៅក្នុងលោក ទាំងហុចព្រះបន្ទូលនៃជីវិតដល់គេ។ ភីលីព ២:១៥-១៦
បញ្ហាទីមួយ ដែលខ្ញុំបានកត់សំគាល់ឃើញក្នុងទីក្រុងមួយនោះ គឺតំបន់បនល្បែងស៊ីសង។ បន្ទាប់មក ខ្ញុំក៏បានឃើញហាងលក់កញ្ឆា ហាងលក់សម្ភារៈអាសអាភាស និងផ្ទាំងផ្សាយពាណិជ្ជកម្មធំៗ អំពីមេធាវីឱកាសនិយម ដែលរកផលចំណេញពីទុក្ខលំបាករបស់អ្នកដទៃ។ ខ្ញុំបានទៅដល់ទីក្រុងជាច្រើនដែលមានអំពើបាប តែទីក្រុងមួយនេះហាក់ដូចជាអាក្រក់ខ្លាំងជាងគេ។
ទោះជាយ៉ាងណាក៏ដោយ អារម្មណ៍របស់ខ្ញុំក៏បានភ្លឺស្វាង ពេលខ្ញុំជជែកគ្នាជាមួយអ្នកបើកបរតាក់ស៊ី នៅពេលព្រឹកថ្ងៃបន្ទាប់។ គាត់ថា គាត់បានអធិស្ឋានដល់ព្រះអម្ចាស់ជារៀងរាល់ថ្ងៃ សូមព្រះអង្គចាត់មនុស្សដែលព្រះអង្គចង់ឲ្យគាត់ជួយ។ គាត់ថា គាត់ឃើញល្បែងស៊ីសង ការញៀនថ្នាំ អំពើពេស្យាចារ និងមនុស្សដែលបែកបាក់គ្រួសារបានមកចែកចាយបញ្ហារបស់ពួកគេ ទាំងទឹកភ្នែក ឲ្យគាត់ស្តាប់។ គាត់បានឈប់ឡាន ដើម្បីស្តាប់ពួកគេនិយាយ ហើយក៏បានអធិស្ឋានឲ្យពួកគេ។ នេះជាការងារដែលគាត់បានធ្វើថ្វាយព្រះអង្គជារៀងរាល់ថ្ងៃ។
សាវ័កប៉ុលបានពិពណ៌នា អំពីការដែលព្រះយេស៊ូវយាងចុះមកចាប់កំណើតក្នុងលោកិយដែលពេញដោយបាប(ភីលីព ២:៥-៨) ហើយព្រះអង្គមានការត្រាស់ហៅ សម្រាប់អ្នកជឿម្នាក់ៗ។ ពេលណាយើងខិតខំធ្វើតាមបំណងព្រះទ័យព្រះអង្គ(ខ.១៣) ហើយប្រកាន់ខ្ជាប់តាម “ព្រះបន្ទូលនៃជីវិត” ដែលជាដំណឹងល្អ(ខ.១៦) យើងនឹងក្លាយជាកូនព្រះដែល “រកបន្ទោសមិនបាននៅក្នុងដំណមនុស្សវៀច ហើយខិលខូច ដែលអ្នករាល់គ្នាភ្លឺនៅកណ្តាលគេ ដូចជាតួពន្លឺនៅក្នុងលោក”(ខ.១៥)។ យើងត្រូវនាំពន្លឺរបស់ព្រះយេស៊ូវ ចូលក្នុងភាពងងឹតក្នុងលោកិយ ដូចអ្នកបើកបរតាក់ស៊ីនោះផងដែរ។
អ្នកជឿព្រះគ្រីស្ទត្រូវរស់នៅ ដោយចិត្តស្មោះត្រង់ ដើម្បីកែប្រែលោកិយ គឺដូចដែលលោកគ្រីស្ទោហ្វ័រ ដវសិន(Christopher Dawson) មានប្រសាសន៍ថា ការរស់នៅយ៉ាងដូចនេះ “បង្កប់ទៅដោយអាថ៌កំបាំងនៃជីវិតដែលព្រះប្រទាន”។ ចូរយើងទូលសូមព្រះវិញ្ញាណព្រះអង្គប្រទានកម្លាំងយើង ឲ្យរស់នៅ ដោយចិត្តស្មោះត្រង់ ជារាស្រ្តរបស់ព្រះយេស៊ូវ ដែលបញ្ចេញពន្លឺរបស់ព្រះអង្គ នៅកន្លែងដែលងងឹតបំផុតក្នុងលោកិយ។—Sheridan Voysey
តើអ្នកអាចផ្តោតទៅលើព្រះគ្រីស្ទ ជាជាងផ្តោតទៅលើការអាក្រក់ក្នុងលោកិយ យ៉ាងដូចម្តេចខ្លះ? តើអ្នកអាចបញ្ចេញពន្លឺរបស់ព្រះអង្គ ក្នុងតំបន់ដែលអ្នករស់នៅយ៉ាងដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ ដែលបានធ្វើជាពន្លឺនៃលោកិយនេះ ដែលបាននាំទូលបង្គំចេញពីភាពងងឹត។
គម្រោងអានព្រះគម្ពីររយៈពេល១ឆ្នាំ : អេសេគាល ១៨-១៩ និង យ៉ាកុប ៤
