លោកុប្បត្ដិ ៥០:១៥-២១
អ្នករាល់គ្នាបានគិតធ្វើអាក្រក់ដល់ខ្ញុំ តែព្រះទ្រង់សំរេចជាការល្អវិញ ដើម្បីនឹងសង្គ្រោះដល់ជីវិតនៃមនុស្សជាច្រើន។ លោកុប្បត្ដិ ៥០:២០
អ្នកស្រីអ៊ែន(Anne) បានចម្រើនវ័យធំឡើង នៅក្នុងភាពក្រីក្រ និងការឈឺជាប់។ បងប្អូនបង្កើតរបស់គាត់ពីរនាក់បានស្លាប់ មុនពេលពួកគេមានអាយុ១ឆ្នាំ។ ពេលគាត់មានអាយុ៥ឆ្នាំ ជំងឺភ្នែកបានធ្វើឲ្យភ្នែកគាត់ខ្វាក់ស្ទើរទាំងស្រុង បានជាគាត់មិនអាចរៀនអាន ឬសរសេរកើត។ ពេលគាត់មានអាយុ៨ឆ្នាំ ម្តាយរបស់គាត់ក៏បានបាត់បង់ជីវិតដោយសារជំងឺរបេង។ មិនយូរប៉ុន្មាន ឪពុករបស់គាត់ដែលចូលចិត្តប្រើអំពើហិង្សាមកលើគ្រួសារ ក៏បានបោះបង់ចោលកូនទំាង៣នាក់ ដែលកំពុងរស់នៅយ៉ាងត្រដាបត្រដួស។ សាច់ញាតិរបស់គាត់ក៏បានយកកូនពៅទៅនៅជាមួយ តែអ្នកស្រីអ៊ែន និងប្អូនប្រុសគាត់ឈ្មោះ ជីមមី(Jimmie) បានទៅរស់នៅក្នុងផ្ទះចាស់ទ្រុឌទ្រោមដែលមានមនុស្សរស់នៅប្រជ្រៀតគ្នា ក្នុងតំបន់ធូកបឺរី អាមហោស។ ពីរបីខែក្រោយមក ជីមមីក៏បានស្លាប់ចោលគាត់ទៀត។
ពេលគាត់មានអាយុ១៤ឆ្នាំ កាលៈទេសៈរបស់គាត់ក៏បានប្រែជាមានភាពភ្លឺស្វាងឡើង។ គេបានបញ្ជូនគាត់ឲ្យទៅរៀននៅសាលាសម្រាប់ជនពិការភ្នែក ដែលនៅទីនោះ គាត់ក៏បានទទួលការវះកាត់ភ្នែក ដើម្បីឲ្យអាចមើលច្បាស់ជាងមុន ហើយក៏បានរៀនអាន និងសរសេរ។ គាត់មានការពិបាកក្នុងការសម្របខ្លួននៅទីនោះ តែទោះជាយ៉ាងណាក៏ដោយ គាត់រៀនពូកែ ហើយក៏បានបញ្ចប់ការសិក្សា ដោយពិន្ទុខ្ពស់បំផុត។ ក្រោយមក អ្នកស្រីអ៊ែន ស៊ូលីវ៉ន(Anne Sullivan) ក៏បានក្លាយជាគ្រូបង្រៀន និងគូកនរបស់កញ្ញាហេឡិន ឃែរល័រ(Helen Keller)។ ដោយសារការប្រឹងប្រែង ការអត់ធ្មត់ និងសេចក្តីស្រឡាញ់ អ្នកស្រីអ៊ែនបានបង្រៀនកញ្ញាហេឡិន ជាជនពិការភ្នែក និងថ្លង់ ឲ្យចេះនិយាយ អានអក្សរសម្រាប់ជនពិការភ្នែក ហើយបានរៀនចប់មហាវិទ្យាល័យ។
លោកយ៉ូសែបក៏ត្រូវជម្នះទុក្ខលំបាក ក្នុងវ័យក្មេងផងដែរ។ កាលគាត់ មានអាយុ១៧ឆ្នាំ បងប្អូនគាត់ច្រណែនឈ្នានីសគាត់ ហើយក៏បានលក់គាត់ធ្វើជាទាសករ ហើយក្រោយមក ត្រូវគេចាប់ដាក់គុក ទាំងគ្មានទោស(លោកុប្បត្តិ ៣៧,៣៩-៤១)។ តែព្រះអម្ចាស់បានប្រើគាត់ ដើម្បីសង្រ្គោះនគរអេស៊ីព្ទ និងក្រុមគ្រួសារគាត់ឲ្យរួចផុតពីគ្រោះអត់ឃ្លាន(៥០:២០)។
យើងរាល់គ្នាសុទ្ធតែប្រឈមមុខដាក់ទុក្ខលំបាក និងបញ្ហា។ តែដែលព្រះទ្រង់បានជួយសង្គ្រោះលោកយ៉ូសែប និងអ្នកស្រីអ៊ែន ឲ្យជម្នះទុក្ខលំបាក ហើយក្លាយជាព្រះពរសម្រាប់អ្នកដទៃជាយ៉ាងណា នោះព្រះអង្គក៏អាចជួយយើង និងប្រើយើងផងដែរ។ ចូរយើងស្វែងរកជំនួយ និងការដឹកនាំរបស់ព្រះអង្គ។ ព្រះអង្គទតឃើញ និងស្តាប់ឮយើង។ —Alyson Kieda
តើព្រះទ្រង់បានជួយអ្នកឆ្លងកាត់ទុក្ខលំបាកយ៉ាងណាខ្លះ? តើអ្នកបានជួយអ្នកដទៃ ឲ្យជម្នះទុក្ខលំបាករបស់ពួកគេដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានជួយទូលបង្គំឆ្លងកាត់ទុក្ខលំបាក។ សូមព្រះអង្គជួយទូលបង្គំ ឲ្យអាចយកអសារអ្នកដទៃ។
To learn more about caring spiritually for others, visit ODBU.org/CC201.
គម្រោងអានព្រះគម្ពីររយៈពេល១ឆ្នាំ : ហូសេ ១២-១៤ និង វិវរណៈ៤
