នោះឯងរាល់គ្នាបានចូលមកឈរនៅជិតជើងភ្នំ ហើយភ្នំក៏ឆេះឡើងជាភ្លើង នាំឲ្យស្រអាប់ពេញផ្ទៃមេឃ ហើយក៏មានពពក និងងងឹតសូន្យសុងផង។ ចោទិយកថា ៤:១១
ក្នុងឆ្នាំ២០២០ ភ្នំភ្លើងឈ្មោះសានហ្កាយ នៅប្រទេសអេក្វាឌ័រ បានផ្ទុះឡើង។ ប៉ុស្តិ៍ទូរទស្សន៍BBC បានពិពណ៌នាថា មានផ្សែងផេះខ្មៅងងឹតបាញ់ទៅលើមេឃ ដល់កម្ពស់ជាង១២០០០ម៉ែត្រ។ ផេះដែលបានបាញ់ចេញមក បានគ្រប់ដណ្តប់ផ្ទៃដី៤ខេត្ត(ជាងរាប់ម៉ឺនហិចតា) ។ ផ្ទៃមេឃបានប្រែងងឹត គួរឲ្យខ្លាច ហើយខ្យល់អាកាសក៏មានភាពកក្វក់ ធ្វើឲ្យពិបាកដកដង្ហើម។ កសិករម្នាក់ ឈ្មោះ ហ្វេលីស៊ីអានូ អីនហ្កា(Feliciano Inga) បានរៀបរាប់អំពីទិដ្ឋភាពដ៏គួរឲ្យព្រួយបារម្ភ ទៅកាន់កាសែត អែល ខាំមែស៊ីអូ (El Comercio) ថា “យើងមិនដឹងថា ធូលីដីនោះបានចេញពីណាមកទេ …យើងឃើញផ្ទៃមេឃប្រែជាងងឹត ហើយក៏មានការភ័យខ្លាច”។
ពួកអ៊ីស្រាអែលមានការភ័យខ្លាចស្រដៀងនេះផងដែរ នៅជើងភ្នំស៊ីណាយ ខណៈពេលដែលពួកគេកំពុងតែឈរនៅទីនោះ ឃើញ “ភ្នំក៏ឆេះឡើងជាភ្លើង នាំឲ្យស្រអាប់ពេញផ្ទៃមេឃ ហើយក៏មានពពក និងងងឹតសូន្យសុង”(ចោទិយកថា ៤:១១)។ ព្រះសូរសៀងរបស់ព្រះអង្គលាន់ឡើងដូចផ្គរលាន់ ហើយពួកបណ្តាជនក៏មានការភ័យញ័រ។ វាជាបទពិសោធន៍ដ៏គួរឲ្យភ័យតក់ស្លត់ គួរឲ្យស្ញែងខ្លាច និងញ័រក្បាលជង្គង់ ពេលដែលពួកគេជួបព្រះដ៏មានព្រះជន្មរស់ដោយផ្ទាល់។
ព្រះអម្ចាស់បានមានបន្ទូលឡើង “ពួកគេរាល់គ្នាក៏បានឮព្រះសូរសៀងនៃព្រះបន្ទូលនោះ តែមិនឃើញរូបអង្គណាសោះ គ្រាន់តែឮសំឡេងប៉ុណ្ណោះ”(ខ.១២)។ ព្រះសូរសៀងដែលធ្វើឲ្យញ័រដល់ឆ្អឹងរបស់ពួកគេ បាននាំមកនូវជីវិត និងក្តីសង្ឃឹម។ ព្រះទ្រង់ប្រទានក្រឹត្យវិន័យ១០ប្រការដល់រាស្រ្តអ៊ីស្រាអែល ហើយក៏បានតាំងសញ្ញាជាថ្មីជាមួយពួកគេ។ ព្រះសូរសៀងចេញពីពពកខ្មៅបានបណ្តាលឲ្យពួកគេភ័យញ័រ តែបានទាក់ទាញចិត្ត និងស្រឡាញ់ពួកគេ ដោយព្រះទ័យមិនប្រែប្រួល(និក្ខមនំ ៣៤:៦-៧)។
ព្រះទ្រង់មានអំណាចចេស្តា ហួសពីលទ្ធភាពដែលយើងអាចឈោងដល់ ហើយថែមទាំងគួរឲ្យស្ញែងខ្លាច។ តែព្រះអង្គមានពេញដោយក្តីស្រឡាញ់ ហើយឈោងមករកយើងជានិច្ច។ ព្រះដែលមានអំណាចចេស្តា និងពេញដោយក្តីស្រឡាញ់ ជាព្រះដែលយើងត្រូវការដោយខ្វះមិនបាន។—Winn Collier
តើពេលណា អ្នកចូលព្រះវត្តមានព្រះ ដោយការភ័យញ័រ? តើពេលនោះ ព្រះអង្គបានបង្ហាញក្តីស្រឡាញ់មកអ្នក យ៉ាងណាខ្លះ?
ឱព្រះអម្ចាស់ ពេលខ្លះ ទូលបង្គំបានចូលមករកព្រះអង្គ មិនបានទៀងទាត់។ ទូលបង្គំសូមអរព្រះគុណព្រះអង្គ ដែលមានព្រះទ័យអត់ធ្មត់ ចំពោះទូលបង្គំ។ ហើយសូមអរព្រះគុណ សម្រាប់សេចក្តីស្រឡាញ់របស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : បរិទេវ ៣-៥ និង ហេព្រើរ ១០:១៩-៣៩
