ឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង។ អេសាយ ៤៣:៤
កាលពីក្មេង លោកធែននី(Tenny) មានអារម្មណ៍ថា ខ្វះទំនុកចិត្តលើសមត្ថភាពខ្លួនឯង។ គាត់បានស្វែងរកការគាំទ្រពីឪពុកគាត់ តែគាត់មិនដែលបានទទួលការគាំទ្រសោះឡើយ។ ការអ្វីក៏ដោយដែលគាត់បានធ្វើ ទោះនៅសាលារៀន ឬនៅផ្ទះក្តី ហាក់ដូចជាមិនល្អគ្រប់គ្រាន់សោះ។ សូម្បីតែនៅពេលដែលគាត់ពេញវ័យហើយ គាត់នៅតែខ្វះទំនុកចិត្ត។ គាត់នៅតែឆ្ងល់ថា តើខ្ញុំធ្វើបានល្អគ្រប់គ្រាន់ហើយឬនៅ?
ទាល់តែដល់ពេលដែលធែននីបានទទួលជឿព្រះយេស៊ូវ ជាព្រះអង្គសង្រ្គោះ គាត់ក៏បានរកឃើញទំនុកចិត្ត និងការគាំទ្រ ដែលគាត់ស្រេកឃ្លានចង់បានពីយូរមកហើយ។ គាត់ក៏បានដឹងថា ព្រះដែលបានបង្កើតគាត់មក ទ្រង់ស្រឡាញ់ និងឲ្យតម្លៃគាត់ ជាកូនរបស់ទ្រង់។ ទីបំផុត លោកធែននីអាចរស់នៅ ដោយមានទំនុកចិត្តថា ព្រះទ្រង់ពិតជាឲ្យតម្លៃ និងស្រឡាញ់គាត់។
ក្នុងបទគម្ពីរ អេសាយ ៤៣:១-៤ ព្រះទ្រង់បានប្រាប់រាស្រ្តដែលទ្រង់ជ្រើសតាំងថា ព្រះអង្គបានបង្កើតពួកគេមក ដូចនេះ ព្រះអង្គនឹងប្រើអំណាចចេស្តា និងសេចក្តីស្រឡាញ់របស់ទ្រង់ ដើម្បីលោះពួកគេ ឲ្យរួចពីបាប។ គឺដូចដែលព្រះអង្គបានប្រកាស់ថា “ឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង” (ខ.៤)។
តម្លៃដែលព្រះទ្រង់ប្រទានដល់អ្នកដែលទ្រង់ស្រឡាញ់ មិនកើតចេញពីអ្វីដែលយើងធ្វើនោះទេ តែពីសេចក្តីពិតដ៏សាមញ្ញ និងមានអំណាចចេស្តាដែលថា ព្រះអង្គបានជ្រើសរើសយើង ឲ្យធ្វើជាកម្មសិទ្ធិទ្រង់។
ព្រះបន្ទូល ក្នុងបទគម្ពីរអេសាយ ជំពូក៤៣ មិនគ្រាន់តែផ្តល់ឲ្យធែននីនូវទំនុកចិត្តដ៏អស្ចារ្យប៉ុណ្ណោះឡើយ តែក៏បានផ្តល់កម្លាំងឲ្យគាត់ មានទំនុកចិត្ត នៅក្នុងការធ្វើអ្វីដែលល្អបំផុតថ្វាយព្រះ ក្នុងកិច្ចការអ្វីក៏ដោយ ដែលព្រះអង្គបានត្រាស់ហៅឲ្យគាត់ធ្វើ។ សព្វថ្ងៃនេះ គាត់ជាគ្រូគង្វាលម្នាក់ ដែលបានខិតខំលើកទឹកចិត្តអ្នកដទៃ ដោយសេចក្តីពិតដែលផ្តល់ឲ្យនូវជីវិតដែលថា ព្រះយេស៊ូវបានទទួលយក និងទទួលស្គាល់យើង ក្នុងព្រះយេស៊ូវ។ ចូរយើងបង្ហាញឲ្យគេស្គាល់សេចក្តីពិតនេះ ក្នុងការរស់នៅរបស់យើង នៅថ្ងៃនេះផងដែរ។—Leslie Koh
តើអ្នកគិតថា ព្រះទ្រង់មានព្រះទ័យយល់ឃើញ អំពីអ្នកយ៉ាងណាខ្លះ? តើបទគម្ពីរ យ៉ូហាន ១:១២ បានប្រាប់អ្នកដូចម្តេចខ្លះ អំពីទំនាក់ទំនងដែលអ្នកមានជាមួយព្រះអង្គ? តើអ្នកបានរកឃើញការកម្សាន្តចិត្តអ្វីខ្លះ ក្នុងបទគម្ពីរនេះ?
ឱព្រះវរបិតា ដែលគង់នៅស្ថានសួគ៌ ទូលបង្គំដឹងថា ព្រះអង្គស្រឡាញ់ទូលបង្គំ ទទួលស្គាល់ទូលបង្គំ និងឲ្យតម្លៃទូលបង្គំ។ ទូលបង្គំសូមអរព្រះគុណព្រះអង្គ សម្រាប់ការទទួលទូលបង្គំជាកូន ហើយស្រឡាញ់ទូលបង្គំ ដោយគ្មានលក្ខខ័ណ្ឌ។
គម្រោងអានព្រះគម្ពីររយៈពេល១ឆ្នាំ : អេសេគាល ៥-៧ និង ហេព្រើរ ១២
