កិច្ចការ ៩:៣៦-៤៣
មានសិស្សស្រីម្នាក់ឈ្មោះ តេប៊ីថា (ស្រាយថា នាងក្តាន់) នាងនោះបានធ្វើគុណ ហើយដាក់ទានជាច្រើន។ កិច្ចការ ៩:៣៦
តើអ្នកធ្លាប់បានឮគេនិយាយអំពីមន្ទីរតាំងពិព័រណ៍ស្នាដៃរបស់ជាងកាត់ដេរល្បីៗ ដែរឬទេ? គេបានបង្កើតកន្លែងតាំងពិព័រណ៍នេះនៅឆ្នាំ២០០១ ដោយទទួលស្គាល់បុគ្គល ដែលបាន “ជះឥទ្ធិពលដ៏យូរអង្វែង មកលើឧស្សាហ៍កម្មកាត់ដេរ ដោយការរួមចំណែកដែលពិសេស និងមានភាពប៉ិនប្រសប់ តាមរយៈការបង្រៀនកាត់ដេរ និងការឆ្នៃផលិតផលកាត់ដេរ”។ គេបានរាប់បញ្ចូលបុគ្គលល្បីៗ ដែលមានដូចជា អ្នកស្រី ម៉ាថា ភូលលិន(Martha Pullen) នៅក្នុងមន្ទីរតាំងពិព័រណ៍ នៅឆ្នាំ២០០៥ ដោយការពណ៌នាថា គាត់ជាស្រ្តីនៃបទគម្ពីរសុភាសិត ជំពូក៣១ ជាមនុស្ស … មិនដែលភ្លេចទទួលស្គាល់ជាសាធារណៈ អំពីប្រភពនៃកម្លាំង ការបណ្តាលចិត្ត និងព្រះពរដែលខ្លួនមាន។
មន្ទីរតាំងពិព័រណ៍ស្នាដៃរបស់ជាងកាត់ដេរល្បីៗ ត្រូវបានគេបានបង្កើតឡើង ក្នុងសតវត្សរ៍ទី២១ តែការទទួលស្គាល់ការរួមចំណែកដ៏សំខាន់របស់ជាងដេរ ក៏មានក្នុងអំឡុងសតវត្សរ៍ទី១ នៅប្រទេសអ៊ីស្រាអែលផងដែរ។ នៅសម័យនោះ មានស្រ្តីម្នាក់ឈ្មោះ តេប៊ីថា ជាជាងដេរដែលជឿព្រះយេស៊ូវ។ នាងបានចំណាយពេលកាត់ដេរសំលៀកបំពាក់សម្រាប់ស្រ្តីមេម៉ាយទាល់ក្រ ក្នុងសហគមន៍របស់នាង(កិច្ចការ ៩:៣៦,៣៩)។ បន្ទាប់ពីនាងធ្លាក់ខ្លួនឈឺរហូតបាត់បង់ជីវិត ពួកសាវ័កក៏បានឲ្យគេទៅហៅសាវ័កពេត្រុស មកអធិស្ឋានសូមព្រះអង្គធ្វើការអស្ចារ្យ តាមរយៈគាត់។ ពេលគាត់មកដល់ ស្រ្តីមេម៉ាយដែលកំពុងសោកសង្រេងក៏បានបង្ហាញរ៉ូប និងសំលៀកបំពាក់ដែលនាងតេប៊ីថា បានកាត់ដេរឲ្យពួកគេ(ខ.៣៩)។ សំលៀកបំពាក់ទាំងនោះជាភស្តុតាងបង្ហាញថា នាង “តែងតែធ្វើការល្អ” សម្រាប់អ្នកក្រ ក្នុងទីក្រុងរបស់នាង(ខ.៣៦)។ ព្រះទ្រង់ក៏បានប្រោសនាងតេប៊ីថា ឲ្យរស់ឡើងវិញ ដោយព្រះចេស្ដាព្រះអង្គ។
ព្រះទ្រង់ក៏បានត្រាស់ហៅ និងបំពាក់សមត្ថភាពដល់យើង ឲ្យប្រើជំនាញយើង ដើម្បីបំពេញតម្រូវការរបស់មនុស្ស នៅក្នុងសហគមន៍ និងពិភពលោកផងដែរ។ ចូរយើងប្រើជំនាញរបស់យើង នៅក្នុងការងារបម្រើព្រះយេស៊ូវ ហើយសូមឲ្យព្រះអង្គប្រើកិច្ចការនៃសេចក្តីស្រឡាញ់របស់យើង ដើម្បីស្អាងចិត្ត និងជីវិតរបស់អ្នកដទៃឡើង(អេភេសូរ ៤:១៦)។—Marvin Williams
តើអ្នកមានអំណោយទាន និងជំនាញអ្វីខ្លះ ដែលព្រះទ្រង់បានប្រទានអ្នក? តើអ្នកអាចប្រើអំណោយទាន និងជំនាញទាំងនោះ ដើម្បីជួយមនុស្សដែលកំពុងត្រូវការជំនួយ ដូចម្តេចខ្លះ?
ឱព្រះយេស៊ូវ សូមព្រះអង្គជួយទូលបង្គំ ឲ្យឆ្លើយតប ដោយសេចក្តីស្រឡាញ់ និងសេចក្តីអាណិត ចំពោះតម្រូវការរបស់អ្នកដទៃ។
គម្រោងអានព្រះគម្ពីររយៈពេល១ឆ្នាំ : អេសាយ ៥៣-៥៥ និង ២ថែស្សាឡូនិច ១
