លោកុប្បត្ដិ ១៣-១៥ និង ម៉ាថាយ ៥:១-២៦
ចោទិយកថា ៣០:១៥-២០
ចូរឲ្យឯងរាល់គ្នាឈរតាមផ្លូវ ហើយមើលចុះ ត្រូវឲ្យសួររកផ្លូវចាស់ទាំងប៉ុន្មាន មើលជាមានផ្លូវណាដែលល្អ រួចឲ្យដើរតាមផ្លូវនោះចុះ។ យេរេមា ៦:១៦
បន្ទាប់ពីស្វាមីខ្ញុំមានជំងឺ ហើយក្តៅខ្លួនខ្លាំងជាច្រើនថ្ងៃ ច្បាស់ណាស់ ស្វាមីខ្ញុំត្រូវទៅពេទ្យជាបន្ទាន់។ មន្ទីរពេទ្យក៏បានទទួលគាត់ឲ្យចូលសម្រាកព្យាបាលភ្លាមៗ។ បន្ទាប់ពីគាត់សម្រាកព្យាបាលបានពីរបីថ្ងៃ សុខភាពគាត់មានភាពល្អប្រសើរជាងមុន តែមិនទាន់ល្អគ្រប់គ្រាន់ល្មមនឹងឲ្យគាត់ចេញពីពេទ្យបាន។ ខ្ញុំត្រូវធ្វើការសម្រេចចិត្តដ៏ពិបាកថា ត្រូវនៅមើលគាត់ ឬត្រូវចុះបេសកកម្មដ៏សំខាន់ ដែលមានមនុស្សជាច្រើនចូលរួម។ ស្វាមីខ្ញុំបានប្រាប់ខ្ញុំមិនឲ្យព្រួយបារម្ភ ព្រោះគាត់អាចបន្តសម្រាកនៅមន្ទីរពេទ្យតែម្នាក់ឯងបាន។ តែចិត្តរបស់ខ្ញុំនៅចង់នៅមើលថែគាត់ផង ចង់ទៅធ្វើការផង។
រឿងនេះបានធ្វើឲ្យខ្ញុំនឹកចាំ អំពីពេលដែលរាស្រ្តរបស់ព្រះ ត្រូវការជំនួយរបស់ព្រះអង្គ នៅពេលដែលពួកគេត្រូវធ្វើការសម្រេចចិត្តដ៏សំខាន់ក្នុងជីវិត។ មានពេលជាច្រើនដងពេកហើយ ដែលពួកគេមិនបានស្តាប់តាមការបង្គាប់ដែលព្រះអង្គបានបើកសម្ដែង។ ដូចនេះ លោកម៉ូសេក៏បានជំរុញពួកបណ្តាជនឲ្យ “ជ្រើសរើសយកជីវិត” ដោយស្តាប់តាមព្រះរាជបញ្ជារបស់ព្រះអង្គ(ចោទិយកថា ៣០:១៩)។ នៅសម័យក្រោយមក ហោរាយេរេមាក៏បានកែតម្រង់រាស្រ្តរបស់ព្រះអង្គ ដែលកំពុងដើរខុសផ្លូវ ដោយបញ្ចុះបញ្ចូលពួកគេឲ្យដើរតាមផ្លូវព្រះអង្គ ដោយប្រាប់ពួកគេថា “ចូរឲ្យឯងរាល់គ្នាឈរតាមផ្លូវ ហើយមើលចុះ ត្រូវឲ្យសួររកផ្លូវចាស់ទាំងប៉ុន្មាន មើលជាមានផ្លូវណាដែលល្អ រួចឲ្យដើរតាមផ្លូវនោះចុះ”(យេរេមា ៦:១៦)។ ផ្លូវចាស់របស់ព្រះគម្ពីរ និងការផ្គត់ផ្គង់របស់ព្រះអង្គកាលពីមុន អាចនាំផ្លូវយើង។
ខ្ញុំស្រមៃថា កាលនោះ ខ្ញុំកំពុងតែឈរនៅលើផ្លូវបំបែក ហើយខ្ញុំក៏បានប្រើប្រាជ្ញានៅក្នុងកណ្ឌគម្ពីរយេរេមា។ ស្វាមីខ្ញុំត្រូវការខ្ញុំ។ ការងាររបស់ខ្ញុំក៏ត្រូវការខ្ញុំផងដែរ។ ភ្លាមៗនោះ អ្នកគ្រប់គ្រងនៅកន្លែងធ្វើការខ្ញុំ ក៏បានទូរស័ព្ទមក ហើយលើកទឹកចិត្តខ្ញុំ ឲ្យនៅផ្ទះមើលថែស្វាមីខ្ញុំ។ ខ្ញុំក៏បានដកដង្ហើមធំ ហើយអរព្រះគុណព្រះ សម្រាប់ការប្រទានដំណោះស្រាយ នៅពេលដែលខ្ញុំពិបាកសម្រេចចិត្ត។ ទិសដៅដែលព្រះទ្រង់ប្រទាន មិនតែងតែបង្ហាញខ្លួនឲ្យយើងឃើញច្បាស់ឡើយ តែព្រះអង្គពិតជាបានប្រទានវាមកមែន។ ពេលណាយើងត្រូវធ្វើការសម្រេចចិត្តជ្រើសរើសដ៏ពិបាក ចូរយើងប្រាកដថា យើងស្វែងរកបំណងព្រះទ័យព្រះអង្គ។—Elisa Morgan
តើនៅថ្ងៃនេះ អ្នកត្រូវការការទិសដៅពីព្រះអង្គ សម្រាប់ការសម្រេចចិត្តអ្វីខ្លះ? តើព្រះទ្រង់អាចបង្ហាញព្រះហឫទ័យព្រះអង្គ ដល់អ្នកយ៉ាងដូចម្តេចខ្លះ?
ឱព្រះអម្ចាស់ ពេលណាទូលបង្គំមានការស្ទាក់ស្ទើរក្នុងការសម្រេចចិត្ត សូមព្រះអង្គជួយទូលបង្គំ ឲ្យស្វែងរកបំណងព្រះទ័យព្រះអង្គ មុននឹងធ្វើការសម្រេចចិត្ត។
គម្រោងអានព្រះគម្ពីររយៈពេល១ឆ្នាំ : លោកុប្បត្ដិ ១៣-១៥ និង ម៉ាថាយ ៥:១-២៦
