ឯពួកអ្នករាល់គ្នាខ្លះ ពីដើមក៏ជាមនុស្សយ៉ាងដូច្នោះដែរ តែបានលាងស្អាតហើយ ក៏បានញែកជាបរិសុទ្ធ ហើយរាប់ជាសុចរិតផង ដោយនូវព្រះនាមព្រះអម្ចាស់យេស៊ូវ និងព្រះវិញ្ញាណរបស់ព្រះនៃយើងរាល់គ្នា។ ១កូរិនថូស ៦:១១
មិត្តភក្តិខ្ញុំម្នាក់ឈ្មោះ ប៊ីល (Bill) បានរៀបរាប់ថា លោកជ័ររ៉ាដ(Gerard) ដែលជាមិត្តភក្តិរបស់គាត់ បានចេញឆ្ងាយពីព្រះ អស់រយៈពេលជាយូរមកហើយ។ ថ្ងៃមួយ លោកប៊ីលបានជួបលោកជ័ររ៉ាដ ហើយពន្យល់ប្រាប់គាត់ អំពីរបៀបដែលសេចក្តីស្រឡាញ់របស់ព្រះ បានបើកផ្លូវឲ្យយើងទទួលសេចក្តីសង្រ្គោះ។ លោកជ័ររ៉ាដក៏បានក្លាយជាអ្នកជឿព្រះយេស៊ូវ។ គាត់ក៏បានប្រែចិត្តចេញពីអំពើបាប ទាំងទឹកភ្នែក ហើយក៏បានថ្វាយជីវិតគាត់ដល់ព្រះគ្រីស្ទ។ ក្រោយមក លោកប៊ីលក៏បានសួរលោកជ័ររ៉ាដ អំពីអារម្មណ៍របស់ខ្លួន។ លោកជ័ររ៉ាដគ្រាន់តែបានឆ្លើយទាំងទឹកភ្នែកថា គាត់មានអារម្មណ៍ថា “បានជ្រះស្អាត” ហើយ។
នេះជាការឆ្លើយតប ដ៏ប្រសើរណាស់! នេះជាអត្ថន័យនៃសេចក្តីសង្រ្គោះ ដែលព្រះទ្រង់បានបើកទ្វារឲ្យយើងចូលមកទទួល ដោយជំនឿលើព្រះយេស៊ូវ និងការលះបង់របស់ព្រះអង្គ នៅលើឈើឆ្កាង ដើម្បីយើងរាល់គ្នា។ ក្នុងបទគម្ពីរ ១កូរិនថូស ជំពូក៦ បន្ទាប់ពីសាវ័កប៉ុលបានពន្យល់ថា ការមិនស្តាប់បង្គាប់ព្រះនាំឲ្យយើងដាច់ចេញពីព្រះអង្គ គាត់ក៏បានមានប្រសាសន៍ថា “ឯពួកអ្នករាល់គ្នាខ្លះ ពីដើមក៏ជាមនុស្សយ៉ាងដូច្នោះដែរ តែបានលាងស្អាតហើយ ក៏បានញែកជាបរិសុទ្ធ ហើយរាប់ជាសុចរិតផង ដោយនូវព្រះនាមព្រះអម្ចាស់យេស៊ូវ និងព្រះវិញ្ញាណរបស់ព្រះនៃយើងរាល់គ្នា”(ខ.១១)។ ពាក្យ “ការលាងស្អាត” “ការញែកជាបរិសុទ្ធ” ហើយ “ការរាប់ជាបរិសុទ្ធ” ជាពាក្យដែលបញ្ជាក់អំពីអត្តសញ្ញាណថ្មីរបស់អ្នកជឿ ដែលបានទទួលការអត់ទោសបាប ហើយជានឹងព្រះវិញ។
បទគម្ពីរទីតុស ៣:៤-៥ បានចែងអំពីសេចក្តីសេចក្តីសង្រ្គោះ ដែលជាសេចក្តីដ៏អស្ចារ្យ។ “ព្រះដ៏ជាព្រះអង្គសង្គ្រោះនៃយើង …ទ្រង់បានជួយសង្គ្រោះយើង មិនមែនដោយការដែលយើងបានប្រព្រឹត្តដោយសុចរិតនោះទេ គឺដោយសេចក្តីមេត្តាករុណារបស់ទ្រង់វិញ ដោយសារការសំអាតនៃសេចក្តីកើតជាថ្មី ហើយការប្រោសជាថ្មីឡើងវិញ នៃព្រះវិញ្ញាណបរិសុទ្ធ”។ អំពើបាបយើងជារនាំងរារាំងយើងមិនឲ្យចូលមករកព្រះ តែដោយសារសេចក្តីជំនឿលើព្រះយេស៊ូវ នោះយើងក៏បានរួចពីទោសនៃអំពើបាបរបស់យើង។ យើងក្លាយជាស្នាព្រះហស្តថ្មី(២កូរិនថូស ៥:១៧) មានផ្លូវចូលទៅរកព្រះវរបិតា ដែលគង់នៅស្ថានសួគ៌(អេភេសូរ ២:១៨) ហើយក៏បានជ្រះស្អាត(១យ៉ូហាន ១:៧)។ មានតែព្រះអង្គទេ ដែលអាចប្រទានការលាងសម្អាត នេះបាន។—Dave Branon
ហេតុអ្វីអ្នកចាំបាច់ត្រូវទទួលការលាងជម្រះ និងរាប់ជាសុចរិត ពីព្រះយេស៊ូវ? តើការទទួលជឿព្រះអង្គ មានន័យយ៉ាងណាចំពោះអ្នក?
ឱព្រះយេស៊ូវ ទូលបង្គំដឹងថា ទូលបង្គំបានធ្វើបាបទាស់នឹងព្រះអង្គ។ ហើយទូលបង្គំដឹងថា ទោសនៃអំពើបាបរបស់ទូលបង្គំ គឺជាការដាច់ចេញពីព្រះអង្គ។ ទូលបង្គំសូមអរព្រះគុណ សម្រាប់សេចក្តីសង្រ្គោះ ដែលព្រះអង្គបើកផ្លូវឲ្យទូលបង្គំអាចទទួល និងសម្រាប់ការនាំទូលបង្គំចូលទៅជិតព្រះអង្គជារៀងរហូត។
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ២៣-២៤ និង ម៉ាថាយ ៧
