ចូររង់ចាំព្រះយេហូវ៉ាចុះ ចូរមានកំឡាំង ហើយឲ្យចិត្តក្លាហានឡើង អើ គួររង់ចាំព្រះយេហូវ៉ាទៅ។ ទំនុកដំកើង ២៧:១៤
“តើយើងធ្វើអ្វីខ្លះ នៅពេលទំនេរ?” សំណួរនេះជាខ្លឹមសារនៃអត្ថបទ ដែលបោះពុម្ពផ្សាយក្នុងឆ្នាំ១៩៣០ ដោយអ្នកជំនាញផ្នែកសេដ្ឋកិច្ច ឈ្មោះ ចន មេយណាត ខេន(John Maynard Keynes)។ ក្នុងអត្ថបទនោះ លោកខេន បានលើកឡើងថា នៅក្នុងរយៈពេល១រយឆ្នំាទៀត ភាពរីកចម្រើននៃបច្ចេកវិទ្យា និងសេដ្ឋកិច្ច នឹងនំាមនុស្សជាតិ ទៅដល់ចំណុចមួយ ដែលយើងនឹងធ្វើការតែ១ថ្ងៃ ៣ម៉ោង និង១៤ម៉ោង ក្នុង១សប្តាហ៍ប៉ុណ្ណោះ។
អត្ថបទដ៏ល្បីល្បាញនេះបានបោះពុម្ពផ្សាយ ជាង៩០ឆ្នាំហើយ តែបច្ចេកវិទ្យាមិនបានជួយឲ្យយើងមានពេលកម្សាន្តកាន់តែច្រើននោះឡើយ តែផ្ទុយទៅវិញ យើងកាន់តែមានការរវល់កាន់តែខ្លាំង។ មនុស្សជាច្រើន ខិតខំធ្វើការរកស៊ីពេញមួយថ្ងៃ ស្ទើរតែរកពេលទំនេរមិនបាន ហើយកិច្ចការដែលយើងធ្វើប្រចាំថ្ងៃ ដូចជាការធ្វើដំណើរ និងបរិភោគអាហារ ចំណាយពេលតិចជាងមុន ដូចនេះ យើងពេញដោយភាពប្រញាប់ប្រញាល់។
ទាក់ទងនឹងបញ្ហានេះ ស្តេចដាវីឌបានបង្ហាញយើង អំពីរបៀបរស់នៅ ដោយភាពនឹងនរ ក្នុងភាពប្រញាប់ប្រញាល់នៃជីវិត។ កាលស្តេចដាវីឌកំពុងរត់គេចពីស្តេចសូល(ដែលតាមសម្លាប់ទ្រង់) ទ្រង់បានទូលសួរស្តេចនគរម៉ូអាប់ថា “សូមទ្រង់អនុញ្ញាតឲ្យឪពុកម្តាយរបស់ទូលបង្គំមកនៅអាស្រ័យនឹងទ្រង់ផង ដរាបដល់ទូលបង្គំបានដឹងជាព្រះទ្រង់នឹងប្រព្រឹត្តដល់ទូលបង្គំជាយ៉ាងណា”(១សាំយ៉ូអែល ២២:៣)។ ស្តេចដាវីឌកំពុងជាប់រវល់រត់គេចពីការតាមសម្លាប់របស់ស្តេចសូល និងជួយទំនុកបម្រុងគ្រួសារទ្រង់។ តែទោះទ្រង់មានការប្រញាប់ប្រញាល់យ៉ាងណាក៏ដោយ ទ្រង់បានចំណាយពេលរង់ចាំព្រះ។
ពេលដែលភាពប្រញាប់ប្រញាល់នៃជីវិតកំពុងរុញច្រានយើង យើងអាចទុកចិត្តព្រះ ដែលទ្រង់អាចថែរក្សាយើង ឲ្យមានសេចក្តីសុខពេញខ្នាត(អេសាយ ២៦:៣)។ ស្តេចដាវីឌបានឆ្លើយតបដោយសង្ខេប ចំពោះបញ្ហានេះ ដោយបន្ទូលថា “ចូររង់ចាំព្រះយេហូវ៉ាចុះ ចូរមានកំឡាំង ហើយឲ្យចិត្តក្លាហានឡើង អើ គួររង់ចាំព្រះយេហូវ៉ាទៅ”(ទំនុកដំកើង ២៧:១៤)។—James Banks
តើអ្នកអាចរង់ចាំព្រះយ៉ាងដូចម្តេចខ្លះ ពេលដែលជីវិតកំពុងជួបភាពមមាញឹក? តើអ្នកត្រូវការជំនួយរបស់ព្រះ ដើម្បីឲ្យអាចទុកចិត្តព្រះអង្គ ក្នុងផ្នែកណាខ្លះនៃជីវិតអ្នក នៅថ្ងៃនេះ?
ឱព្រះវរបិតា ព្រះអង្គប្រទានភាពស្ងប់សុខដល់ទូលបង្គំ ក្នុងពេលដែលមានភាពប្រញាប់ប្រញាល់។ ទូលបង្គំសូមអរព្រះគុណព្រះអង្គ សម្រាប់ការប្រទានទូលបង្គំនូវសន្តិភាព ខណៈពេលដែលទូលបង្គំបន្តទុកចិត្តព្រះអង្គ។
គម្រោងអានព្រះគម្ពីររយៈពេល១ឆ្នាំ : យ៉ូប ៣៤-៣៥ និង កិច្ចការ ១៥:១-២១
