ចូរខំដកគ្រប់ទាំងសេចក្តីជូរល្វីង ក្តៅក្រហាយ កំហឹង ឡូឡា ជេរប្រមាថ និងគ្រប់ទាំងសេចក្តីអាក្រក់ ចេញពីពួកអ្នករាល់គ្នាទៅ។ អេភេសូរ ៤:៣១
កាលអគារមជ្ឈមណ្ឌលពាណិជ្ជកម្មពិភពលោក បានដួលរំលំ នៅថ្ងៃទី១១ ខែកញ្ញា ឆ្នាំ២០០១ លោកក្រេក រ៉ូឌ្រីកេស(Greg Rodriguez) ស្ថិតក្នុងចំណោមជនរងគ្រោះ ដែលបានស្លាប់ នៅក្នុងសំណល់បាក់បែក។ ខណៈពេលដែលអ្នកស្រីភីលីស(Phyllis) ជាម្តាយរបស់គាត់ និងឪពុកគាត់កំពុងសោកសង្រេង ពួកគេក៏បានពិចារណាយ៉ាងប្រុងប្រយ័ត្ន អំពីការឆ្លើយតបរបស់ពួកគេ ចំពោះការវាយប្រហារដ៏តក់ស្លុតនេះ។ នៅឆ្នាំ២០០២ អ្នកស្រីភីលីសក៏បានជួបអ្នកស្រី អៃខា អែល វ៉ាហ្វេ(Aicha el-Wafe) ជាម្តាយរបស់បុរសម្នាក់ ក្នុងចំណោមពួកអ្នកដែលគេបានចោលប្រកាន់ថា បានធ្វើការវាយប្រហារដ៏គួរឲ្យតក់ស្លុតនេះ។ អ្នកស្រីភីលីសក៏បាននិយាយថា “ខ្ញុំបានដើរចូលទៅជិតអ្នកស្រីអៃខា ហើយក៏បានឱបគ្នាយំ … ភ្លាមៗនោះ ខ្ញុំ និងអ្នកស្រីអៃខាមានចំណងមិត្តភាព … ដោយសារយើងទាំងពីរនាក់សុទ្ធតែសោកសង្រេង ដោយសារកូនប្រុសដូចគ្នា”។
អ្នកស្រីភីលីស បានជួបអ្នកស្រីអៃខា ក្នុងពេលដែលមានការឈឺចាប់ និងសោកសង្រេងដូចគ្នា។ អ្នកស្រីភីលីសជឿថា កំហឹងដែលកើតឡើង ដោយសារការស្លាប់របស់កូនប្រុសគាត់ មិនអាចព្យាបាលការឈឺចាប់របស់គាត់បានឡើយ។ ពេលគាត់បានស្តាប់រឿងគ្រួសាររបស់អ្នកស្រីអៃខា គាត់ក៏មានចិត្តអាណិត ដោយជម្នះចិត្តដែលចង់គិតថា ពួកគេគ្រាន់តែជាខ្មាំងសត្រូវប៉ុណ្ណោះ។ គាត់ចង់បានយុត្តិធម៌ ប៉ុន្តែ គាត់ជឿថា យើងត្រូវតែលះបង់ចិត្តដែលចង់សងសឹក ដែលច្រើនតែចងរឹតយើងមិនឲ្យមានសេរីភាព។
សាវ័កប៉ុលក៏បានទទួលការបណ្តាលចិត្តឲ្យគិតដូចនេះផងដែរ បានជាគាត់បង្គាប់យើង ឲ្យ “ចូរខំដកគ្រប់ទាំងសេចក្តីជូរល្វីង ក្តៅក្រហាយ កំហឹង ឡូឡា ជេរប្រមាថ និងគ្រប់ទាំងសេចក្តីអាក្រក់ចេញ”(អេភេសូរ ៤:៣១)។ ខណៈពេលដែលយើងលះបង់អំណាចដែលបង្ហិនបង្ហោចទាំងនេះ ព្រះវិញ្ញាណនៃព្រះនឹងបំពេញយើង ដោយផ្នត់គំនិតថ្មី។ សាវ័កប៉ុលបានបង្រៀនផងដែរថា “ចូរមានចិត្តសប្បុរសនឹងគ្នាទៅវិញទៅមក ព្រមទាំងមានចិត្តទន់សន្តោស ហើយអត់ទោសគ្នា”(ខ.៣២)។ យើងអាចស្វែងរកយុត្តិធម៌ឃើញ ដោយមិនបដិសេធន៍មិនព្រមសងសឹក ទាំងកំហឹង។ សូមព្រះវិញ្ញាណជួយយើង ឲ្យបង្ហាញក្តីអាណិត ដែលអាចឈ្នះភាពល្វីងជូរចត់។—WINN COLLIER
តើអ្នកបានជាប់ចំណងនៃភាពល្វីងជូរចត់ និងកំហឹង នៅត្រង់ផ្នែកណាខ្លះ? តើព្រះទ្រង់អាចជួយអ្នកបង្ហាញចេញនូវចិត្តអាណិត ជាជាងការសងសឹក យ៉ាងដូចម្តេចខ្លះ?
ឱព្រះអម្ចាស់ លោកិយនេះបានធ្វើខុសជាច្រើនមកលើទូលបង្គំ។ សូមព្រះអង្គប្រទានទូលបង្គំចិត្តអាណិត ជំនួសឲ្យភាពល្វីងជូរចត់។
គម្រោងអានព្រះគម្ពីរយៈពេល១ឆ្នាំ : សុភាសិត ១០-១២ និង ២កូរិនថូស ៤
