ឯចោរ វាមកប្រយោជន៍តែនឹងលួច សំឡាប់ ហើយបំផ្លាញប៉ុណ្ណោះ តែឯខ្ញុំវិញ ខ្ញុំបានមក ដើម្បីឲ្យវារាល់គ្នាមានជីវិត ហើយឲ្យមានជីវិតនោះពេញបរិបូរផង។ យ៉ូហាន ១០:១០
អ្នកជំនាញផ្នែកចិត្តវិទ្យា ឈ្មោះម៉ាដេលីន លេវ៉ាញ(Madeline Levine) បានកត់សំគាល់ឃើញថា ក្មេងស្រីអាយុ១៥ឆ្នាំម្នាក់ ពាក់អាវយឺតដៃវែងមួយប្រភេទ ដែលមនុស្សធ្លាប់ធ្វើបាបខ្លួនឯង បានប្រើដើម្បីលាក់ស្នាមអារកដៃ។ ពេលដែលក្មេងស្រីនោះទាញដៃអាវឡើងលើ អ្នកស្រីលេវ៉ាញក៏បានដឹងថា ក្មេងស្រីនោះធ្លាប់យកឡាមមកអារកដៃខ្លួន។ នាងអាណិតក្មេងស្រីនោះណាស់ តែនាងអរព្រះគុណព្រះ ដែលក្មេងស្រីនោះបើកចំហចិត្ត ទទួលជំនួយដែលខ្លួនត្រូវការយ៉ាងខ្លាំង។
ក្មេងស្រីម្នាក់នេះ ជាតំណាងឲ្យមនុស្សជាច្រើន ដែលកំពុងមានចន្លោះប្រហោងក្នុងចិត្ត។ កណ្ឌគម្ពីរយ៉ូហានបានចែងថា ព្រះយេស៊ូវបានយាងមកដើម្បីឲ្យយើងមានជីវិត ហើយឲ្យជីវិតនោះពេញបរិបូរ (យ៉ូហាន ១០:១០)។ ព្រះទ្រង់បានដាក់នៅក្នុងចិត្តមនុស្សម្នាក់ៗ នូវចិត្តដែលចង់មានជីវិតពេញលេញ ហើយព្រះអង្គសព្វព្រះទ័យឲ្យមនុស្ស ពិសោធន៍នឹងទំនាក់ទំនងនៃក្តីស្រឡាញ់ ជាមួយព្រះអង្គ។ តែព្រះអង្គក៏បានដាស់តឿនពួកគេថា “ចោរ” ដែលមកបំផ្លាញ នឹងប្រើមនុស្ស សម្ភារៈ និងកាលៈទេសៈ ដើម្បីបំផ្លាញជីវិតពួកគេ(ខ.១,១០)។ ការដែលវាអះអាងថា វានឹងនំាមកនូវជីវិត សុទ្ធតែជាការបោកប្រាស់។ ផ្ទុយទៅវិញ ព្រះយេស៊ូវប្រទានអ្វីដែលពិត គឺ “ជីវិតអស់កល្ប” ហើយសន្យាថា “គ្មានអ្នកណាឆក់យកយើង ពីព្រះហស្តព្រះអង្គបាន” (ខ.២៨)។
មានតែព្រះយេស៊ូវទេ ដែលអាចបំពេញចន្លោះប្រហោង ក្នុងចិត្តយើងបាន។ បើអ្នកមានអារម្មណ៍ថា មានចន្លោះប្រហោង ចូរស្រែករកព្រះអង្គ នៅថ្ងៃនេះ។ ហើយបើអ្នកកំពុងតែពិសោធន៍នឹងទុក្ខលំបាកធ្ងន់ធ្ងរ ចូរស្វែងរកការប្រឹក្សាដែលប្រកបដោយការគោរពប្រតិបត្តិព្រះ។ មានតែព្រះគ្រីស្ទទេ ដែលអាចប្រទានជីវិត ពេញបរិបូរ គឺជីវិតមានន័យក្នុងព្រះអង្គ។—Marvin Williams
ក្នុងពេលដែលអ្នកស្វែងរកតម្លៃ និងភាពរំភើបរីករាយ តើមានការអ្វីខ្លះធ្វើឲ្យអ្នកខកចិត្ត? តើព្រះយេស៊ូវបានធ្វើឲ្យជីវិតអ្នកពេញបរិបូរ ដោយរបៀបណា?
ឱព្រះយេស៊ូវ ខណៈពេលដែលទូលបង្គំពិចារណា អំពីជីវិតពេញបរិបូរ និងពេញលេញ ដែលព្រះអង្គប្រទានមកទូលបង្គំ សូមព្រះអង្គជួយទូលបង្គំកុំឲ្យងាកបែរចេញពីព្រះអង្គ ទៅរកអ្វីផ្សេងទៀត ដើម្បីធ្វើឲ្យស្កប់ចិត្តខ្លួនឯងនោះឡើយ។
គម្រោងអានព្រះគម្ពីររយៈពេល១ឆ្នាំ : អេសេគាល ១៤-១៥ និង យ៉ាកុប ២
